യു എ ഇയില്‍ മരിച്ചവരുടെ എണ്ണം 174 ആയി. ഇന്ന് 553 പേര്‍ക്ക് പുതുതായി രോഗം സ്ഥിരീകരിച്ചു
യു എ ഇയില്‍ കോവിഡ് ബാധിച്ച് ഇന്ന് ഒമ്പത് പേര്‍ കൂടി മരിച്ചു. മരിച്ചവരില്‍ മൂന്ന് മലയാളികള്‍ ഉള്‍പ്പെടുന്നതായി ബന്ധുക്കളും സ്ഥിരീകരിച്ചിട്ടുണ്ട്. ഇതോടെ യു എ ഇയില്‍ മരിച്ചവരുടെ എണ്ണം 174 ആയി. ഇന്ന് 553 പേര്‍ക്ക് പുതുതായി രോഗം സ്ഥിരീകരിച്ചു.
ഫുജൈറയില്‍ തലശ്ശേരി സ്വദേശി ടി സി അഹമ്മദ് (58), അബൂദബിയില്‍ തൃശൂര്‍ പാവറട്ടി സ്വദേശി പാറാട്ട് വീട്ടില്‍ ഹുസൈന്‍ (45) , വളാഞ്ചേരി എടയൂര്‍ പൂക്കാട്ടിരി ബാവപ്പടി തൈവളപ്പില്‍ ഇസമായില്‍ (65) എന്നിവരാണ് മരിച്ച മലയാളികള്‍. ഫുജൈറയില്‍ ഒപ്റ്റിക്കല്‍ ബിസിനസ് നടത്തുകയായിരുന്നു അഹ്മദ്. കോവിഡ് ലക്ഷണങ്ങളെ തുടര്‍ന്ന് രണ്ടു ദിവസം മുന്‍പ് പരിശോധന നടത്തിയിരുന്നു. ഭാര്യ: തലശേരി അച്ചാരത്തുറോഡ് ആര്‍.എം ഹൗസില്‍ ഹസീന. ഫുജൈറയില്‍ ആദ്യമായാണ് കോവിഡ് അനുബന്ധ മരണം റിപ്പോര്‍ട്ട് ചെയ്യുന്നത്.
ഹുസൈന്‍ അബൂദബി മഫ്രഖ് ശൈഖ് ഷഖ്ബൂത്ത് മെഡിക്കല്‍ സിറ്റിയില്‍ രണ്ടാഴ്ചയായി ചികില്‍സയിലായിരുന്നു. വെള്ളിയാഴ്ച മരിച്ച ഹുസൈന്റെ മൃതദേഹം ബനിയാസില്‍ ഖബറടക്കി. ഭാര്യ: ഷെഹനാസ്. മക്കള്‍: ഷാഹിന്‍ഷ ഷെഹിന്‍, ഫൈസന്‍.
വളാഞ്ചേരി സ്വദേശി ഇസ്മയില്‍ മൂന്നു മാസം മുമ്പാണ് നാട്ടില്‍ വന്നുമടങ്ങിയത്. കീഴാംകളത്തില്‍ മരക്കാറിന്റെയും ആയിഷയുടേയും മകനാണ്. ദുബൈയില്‍ ബിസിനസായിരുന്നു. ഭാര്യ: ജമീല. മക്കള്‍: ഡോ. സലീം ഇസ്മയില്‍ (മെഡിക്കല്‍ ഓഫിസര്‍, തിരുനാവായ പി.എച്ച്.സി), സജി ഇസ്മയില്‍ (ഫിസിയോതെറാപ്പിസ്റ്റ്, ദുബൈ), സോണിയ. മരുമക്കള്‍: ബേനസീറ, സീനത്ത് (ഫിസിയോതെറാപ്പിസ്റ്റ്, ദുബൈ), ഷറഫുദ്ധീന്‍ (വല്ലപ്പുഴ).
മൊത്തം രോഗബാധിതര്‍ 16,793 ആയി ഉയര്‍ന്നു. 265 പേര്‍ക്ക് കൂടി രോഗം പൂര്‍ണമായും ഭേദമായി. രോഗത്തെ അതിജീവിച്ചവര്‍ ഇതോടെ 3837 ആയി.