പൊതുവില്‍ ഹോര്‍മോണ്‍ വ്യതിയാനം സ്ത്രീകള്‍ക്ക് മാത്രമാണ് സംഭവിക്കുന്നത് എന്ന ധാരണ പലര്‍ക്കും ഉണ്ട്. എന്നാല്‍, സ്ത്രീകള്‍ക്ക് മാത്രമല്ല, പുരുഷന്മാര്‍ക്കും ഹോര്‍മോണ്‍ വ്യതിയാനം സംഭവിക്കാം. ഇത് മൂലം ഇവര്‍ക്ക് നിരവധി ആരോഗ്യ പ്രശ്നങ്ങളും കണ്ട് വരുന്നുണ്ട്. പുരുഷന്മാരില്‍ ഹോര്‍മോണ്‍ വ്യതിയാനം സംഭവിക്കുമ്പോള്‍ ഉണ്ടാകുന്ന മാറ്റങ്ങളും പ്രശ്നങ്ങളും എന്തെല്ലാമെന്ന് നോക്കാം.
ഹോര്‍മോണ്‍
പുരുഷന്മാരില്‍ പ്രധാനമായും കണ്ട് വരുന്ന ഹോര്‍മോണ്‍ ടെക്സ്റ്റോസ്റ്റെറോണ്‍ ആണ്. അതുപോലെ തന്നെ, കോര്‍ട്ടിസോള്‍ ഇന്‍സുലിന്‍, തൈറോയ്ഡ് ഹോര്‍മോണ്‍ എന്നിങ്ങനെയുള്ള ഹോര്‍മോണുകളും കണ്ട് വരുന്നു. ഈ ഓരോ ഹോര്‍മോണിലും ഉണ്ടാകുന്ന വ്യത്യാസങ്ങള്‍ സത്യത്തില്‍ ശരീരത്തില്‍ ഓരോ അവസ്ഥകള്‍ക്കും കാരണമാകുന്നു. ടെസ്റ്റോസ്റ്റെറോണ്‍ കുറയുന്നതിനനുസരിച്ച് ഇത് ആന്‍ഡ്രപോസ് എന്ന അവസ്ഥയിലേയ്ക്ക് നയിക്കുന്നു. ഇതിനെ പൊതുവില്‍ പുരുഷന്മാരിലെ ആര്‍ത്തവ വിരാമം എന്നാണ് വിശേഷിപ്പിക്കുന്നത്.അതുപോലെ തന്നെ സ്ട്രെസ്സ് ഹോര്‍മോണായ കോര്‍ട്ടിസോളില്‍ ഉള്ള വ്യത്യാസം സത്യത്തില്‍ ആന്‍ഡ്രിനല്‍ ഫാറ്റിഗ് ലേയ്ക്ക് നയിക്കുന്നു. ഇത് നിങ്ങള്‍ക്ക് ദീര്‍ഘകാലം സ്ട്രെസ്സ് വരുന്നതിന് കാരണമാണ്. അതുപോലെ തന്നെ തൈറോയ്ഡ് ഹോര്‍മോണ്‍സില്‍ ഉണ്ടാകുന്ന വ്യതിയനങ്ങള്‍ ഹൈപ്പര്‍തൈറോയ്ഡിസം അതുപോലെ തന്നെ ഹൈപ്പോതൈറോയ്ഡിസം എന്നീ അവസ്ഥകള്‍ക്കും കാരണമാണ്.
ലക്ഷണങ്ങള്‍
സത്രീകള്‍ക്ക് എന്നത് പോലെ തന്നെ പുരുഷന്മാരിലും ഹോര്‍മോണ്‍ വ്യതിയാനം ഉണ്ടാകുമ്പോള്‍ പലവിധത്തിലുള്ള ലക്ഷണങ്ങള്‍ കാണിക്കും. പ്രത്യേകിച്ച് ഹോര്‍മോണ്‍ വ്യതിയാനം മൂലം ചിലര്‍ക്ക് ശരീരഭാരം അമിതമായി കുറയാം. ചിലര്‍ക്ക് ശരീരഭാരം വര്‍ദ്ധിക്കാനുള്ള സാധ്യതയും കൂടുതലാണ്. അതുപോലെ തന്നെ അമിതമായി വിയര്‍പ്പ് വരുന്നത്, ഉറങ്ങാന്‍ സാധിക്കാത്ത അവസ്ഥ, നല്ലപോലെ തലവേദനിക്കുക, ചര്‍മ്മം വരണ്ട് പോകുന്നത്, ഹൃദയമിടിപ്പിലുണ്ടാകുന്ന വ്യത്യാസം, രക്തസമ്മര്‍ദ്ദം വര്‍ദ്ധിക്കുന്നത്, എല്ലുകളുടെ ആരോഗ്യം ക്ഷയിക്കുക, അമിതമായട്ടുള്ള ക്ഷീണം എന്നിവയെല്ലാം തന്നെ പുരുഷന്മാരില്‍ ഹോര്‍മോണ്‍ വ്യതിയാനം സംഭവിക്കുമ്പോള്‍ ഉണ്ടാകുന്ന ലക്ഷണങ്ങളാണ്.
കാരണങ്ങള്‍ എന്തെല്ലാം
പതിവായി സ്ട്രെസ്സ് അനുഭവിക്കുന്നവരില്‍ അല്ലെങ്കില്‍ പ്രമേഹം ഉള്ളവരില്‍ അതുപോലെ തന്നെ ഹൈപ്പര്‍ഗ്ലൈസീമിയ, ഹൈപ്പോഗ്ലൈസീമിയ എന്നീ അവസ്ഥകള്‍ ഉണ്ടെങ്കില്‍, ഹൈപ്പോതൈറോയ്ഡിസം, ഹൈപ്പര്‍ തൈറോയ്ഡിസം എന്നിവ വന്നാലും കൃത്യമായി ഡയറ്റും വ്യായാമവും ചെയ്യാതിരുന്നാലും അമിതമായി വണ്ണം ഉള്ളവരിലും ഇത്തരത്തില്‍ ഹോര്‍മോണ്‍ വ്യതിയാനം വരാന്‍ സാധ്യത കൂടുതലാണ്. അതുപോലെ തന്നെ കോര്‍ട്ടിസോളിന്റെ അളവ് വര്‍ദ്ധിക്കുന്നതും അയഡിന്‍ കുറയുന്നതും ഹോര്‍മോണ്‍ വ്യതിയാനങ്ങള്‍ക്ക് കാരണമാണ്
ശ്രദ്ധിക്കേണ്ടത്
ഹോര്‍മോണ്‍ വ്യതിയാനം വരാതിരിക്കാന്‍ ശ്രദ്ധിക്കേണ്ട കുറച്ച് കാര്യങ്ങളുണ്ട്. അതില്‍ തന്നെ, നല്ലപോലെ പ്രോട്ടീനും അതുപോലെ തന്നെ അമിനോ ആസിഡും അടങ്ങിയ ആഹാരങ്ങള്‍ കഴിക്കുക എന്നതാണ് ഏറ്റവും പ്രധാനപ്പെട്ടത്. അതുപോലെ തന്നെ കൃത്യമായി വ്യായാമം ചെയ്യുന്നത് നല്ലതാണ്. അമിതമായി മധുരം കഴിക്കുന്നത് ഒഴിവാക്കാം. സ്ട്രെസ്സ് കുറയ്ക്കാന്‍ ശ്രദ്ധിക്കണം. അതുപോലെ തന്നെ നല്ല ഹെല്‍ത്തി ഫാറ്റ് അടങ്ങിയ ആഹാരങ്ങള്‍ കഴിക്കാനും ശ്രദ്ധിക്കാം.
