ഹൈപ്പര്‍ടെന്‍ഷന്‍ കൂടിയാല്‍ വൃക്കയുടെ ആരോഗ്യത്തെ സാരമായി ബാധിക്കാവുന്നതാണ്.
ഹൈപ്പര്‍ടെന്‍ഷന്‍ നിയന്ത്രിക്കുന്നത് വൃക്കകളുടെ ആരോഗ്യത്തിന് പ്രധാനമാണ്. കാരണം ഉയര്‍ന്ന രക്തസമ്മര്‍ദ്ദം വൃക്കയിലെ ചെറിയ രക്തക്കുഴലുകള്‍ക്ക് കേടുവരുത്തും. ഇത് വൃക്കരോഗത്തിലേക്ക് നയിക്കുന്നു അല്ലെങ്കില്‍ നിലവിലുള്ള വൃക്കകളുടെ അവസ്ഥയെ കൂടുതല്‍ വഷളാക്കുന്നു.
ശരിയായ രീതിയില്‍ രക്തസമ്മര്‍ദ്ദം നിയന്ത്രിക്കുന്നത് ആരോഗ്യകരമായ ജീവിതശൈലി, പതിവ് വൈദ്യപരിശോധന എന്നിവയ്ക്കൊപ്പം വൃക്കസംബന്ധമായ പ്രശ്‌നങ്ങള്‍ തടയാനും സഹായിക്കും.
ഉയര്‍ന്ന ബ്ലഡ് പ്രഷര്‍ വൃക്ക രോഗങ്ങള്‍ക്ക് കാരണമാകുമോ? നിങ്ങളുടെ വൃക്കകളും രക്തചംക്രമണവ്യൂഹവും നല്ല ആരോഗ്യത്തിന് പരസ്പരം ആശ്രയിച്ചിരിക്കുന്നു. ധാരാളം രക്തക്കുഴലുകള്‍ ഉപയോഗിച്ച് രക്തത്തിലെ മാലിന്യങ്ങളും അധിക ദ്രാവകങ്ങളും ഫില്‍ട്ടര്‍ ചെയ്യാന്‍ സഹായിക്കുന്നത് വൃക്കകളാണ്.
രക്തക്കുഴലുകള്‍ക്ക് കേടുപാടുകള്‍ സംഭവിക്കുമ്പോള്‍, നിങ്ങളുടെ രക്തം ഫില്‍ട്ടര്‍ ചെയ്യുന്ന നെഫ്രോണുകള്‍ക്ക് അവ നന്നായി പ്രവര്‍ത്തിക്കാന്‍ ആവശ്യമായ ഓക്‌സിജനും പോഷകങ്ങളും ലഭിക്കുന്നില്ല. അതുകൊണ്ടാണ് ഉയര്‍ന്ന രക്തസമ്മര്‍ദ്ദം വൃക്ക തകരാര്‍ ഉണ്ടാക്കുനവയില്‍ പ്രധാന കാരണങ്ങളില്‍ ഒന്നായി കണക്കാക്കുന്നത്.
വൃക്കകളിലെ നെഫ്രോണുകള്‍ എന്നത് രക്തക്കുഴലുകളുടെ ഇടതൂര്‍ന്ന ശൃംഖലയാണ്, അവയിലൂടെ ഉയര്‍ന്ന അളവിലുള്ള രക്തപ്രവാഹം നടക്കുന്നു.
കാലക്രമേണ, അനിയന്ത്രിതമായ ഉയര്‍ന്ന രക്തസമ്മര്‍ദ്ദം വൃക്കകള്‍ക്ക് ചുറ്റുമുള്ള ധമനികള്‍ ഇടുങ്ങിയതാക്കുകയോ ദുര്‍ബലപ്പെടുത്തുകയോ കഠിനമാക്കുകയോ ചെയ്യും. ഈ കേടായ ധമനികള്‍ക്ക് കിഡ്നി ടിഷ്യുവിലേക്ക് ആവശ്യമായ രക്തം എത്തിക്കാന്‍ കഴിയില്ല. അങ്ങനെ വൃക്കയുടെ സ്വാഭാവിക പ്രവര്‍ത്തനത്തിന് തടസ്സം നേരിടുന്നു. അതുകൊണ്ട് തന്നെ ഹൈപ്പര്‍ ടെന്‍ഷന്‍ നിയന്ത്രിക്കേണ്ടതും ചികിത്സിക്കേണ്ടതും അത്യാവശ്യമാണ്.