പ്രായമാകുമ്പോൾ പേശികളുടെ ബലം ക്രമേണ നഷ്ടപ്പെടുന്നത് സാധാരണമാണ്. ഈ പ്രായവുമായി ബന്ധപ്പെട്ട അവസ്ഥയെ സാർകോപീനിയ എന്ന് വിളിക്കുന്നു. പ്രായം കൂടുന്നതിനനുസരിച്ച്പേശികളുടെ പിണ്ഡവും ശക്തിയും സ്വാഭാവികമായി കുറയുകയും, ചിലപ്പോൾ സാർകോപീനിയ എന്നറിയപ്പെടുന്ന അവസ്ഥയിലേക്ക് എത്തുകയും ചെയ്യും. വിട്ടുമാറാത്ത പരിക്കുകള് ചിലരിലുണ്ടാകുന്നതിന്റെ കാരണങ്ങളിലൊന്നും ഇതാണ്. കാലക്രമേണ, ഇത് സ്റ്റാമിന കുറയുന്നതിനും ചലനങ്ങൾ മന്ദഗതിയിലാകുന്നതിനും നടത്തം, ഉയർത്തൽ, പടികൾ കയറൽ തുടങ്ങിയ ദൈനംദിന ജോലികളിൽ കൂടുതൽ ബുദ്ധിമുട്ടുകൾക്കും കാരണമാകും.
പേശികളുടെ ആരോഗ്യം നിലനിര്ത്തുന്നതിനായി സാർകോപീനിയ നേരത്തെ കണ്ടെത്തുകയും ചികിത്സ നടത്തുകയും ചെയ്യേണ്ടത് നിര്ണായകമാണ്. 30 വയസിനു ശേഷം, എല്ലാ വർഷവും നിങ്ങളുടെ പേശികളുടെ 1% നഷ്ടപ്പെടാൻ തുടങ്ങും – വളരെ നിശബ്ദമായി, ശ്രദ്ധിക്കാതെ. അതിനെയാണ് സാർകോപീനിയ എന്ന് വിളിക്കുന്നത്. പ്രായത്തിനനുസരിച്ച് ക്രമേണ പേശി നഷ്ടം കൂടി വരികയും ചെയ്യുമെന്ന് ഗ്യാസ്ട്രോഎൻട്രോളജിസ്റ്റ് സൗരഭ് സേഥി ഇന്സ്റ്റഗ്രാമില് പങ്കുവെച്ച പോസ്റ്റില് പറയുന്നു.
എന്നാൽ ശരിയായ വ്യായാമം, പോഷകാഹാരം, പ്രൊഫഷണൽ മാർഗ്ഗനിർദ്ദേശം എന്നിവയിലൂടെ പ്രായമായവർക്ക് പേശികളുടെ അളവ് സുരക്ഷിതമായി സംരക്ഷിക്കാനും പുനർനിർമ്മിക്കാനും കഴിയും.
സാർകോപീനിയയുടെ പ്രാരംഭ ലക്ഷണങ്ങൾ
അപ്രതീക്ഷിതമായ ക്ഷീണവും പേശികളുടെ ശക്തി കുറയുന്നതും സാർകോപീനിയയുടെ പ്രാരംഭ ലക്ഷണങ്ങളാണ്. നടത്തത്തിന്റെ വേഗത കുറയുന്നതും പടികൾ കയറുകയോ കസേരയിൽ നിന്ന് എഴുന്നേൽക്കുകയോ പോലുള്ള ദൈനംദിന ജോലികൾ ചെയ്യാൻ ബുദ്ധിമുട്ട് അനുഭവപ്പെടുന്നതും ചെയ്യാം. പേശികളുടെ അളവ് ക്രമേണ കുറയുന്നതും ബാലൻസ് മോശമാകുന്നതും മറ്റ് പ്രധാന ലക്ഷണങ്ങളാണ്.
മസിൽ ശരീരത്തിലെ ഏറ്റവും വലിയ ഗ്ലൂക്കോസ് സ്പോഞ്ച് ആണ്. ഇത് രക്തത്തിൽ നിന്ന് പഞ്ചസാര ആഗിരണം ചെയ്യുകയും രക്തത്തിലെ പഞ്ചസാര സ്ഥിരമായി നിലനിർത്താൻ സഹായിക്കുകയും ചെയ്യുന്നു. സ്ത്രീകളെ സംബന്ധിച്ചിടത്തോളം, പേശികളുടെ നഷ്ടം പലപ്പോഴും 35 നും 40 നും ഇടയിൽ ത്വരിതപ്പെടുത്തുന്നു. ഈസ്ട്രജൻ കുറയുമ്പോൾ, പേശികളുടെ തകർച്ച വേഗത്തിലാകുന്നു. അതുകൊണ്ടാണ് പല ആർത്തവവിരാമം നേരിടുന്ന സ്ത്രീകളില് പലരും ആരോഗ്യപരമായി ദുർബലരായി കാണപ്പെടുന്നത്.
പേശികളുടെ ശക്തി എങ്ങനെ മെച്ചപ്പെടുത്താം?
ദൈനംദിന ഭക്ഷണത്തിൽ “1.2 കിലോഗ്രാം മുതൽ 1.6 കിലോഗ്രാം വരെ പ്രോട്ടീൻ” അടങ്ങിയിരിക്കണമെന്ന് ഡോക്ടര്മാര് നിര്ദേശിക്കുന്നു. വേഗത്തിലുള്ള നടത്തം പോലുള്ള പതിവ് ശാരീരിക പ്രവർത്തനങ്ങൾ പേശികളുടെ ശക്തി നിലനിർത്തുന്നതിലും പേശികളുടെ നഷ്ടത്തിന്റെ പുരോഗതി മന്ദഗതിയിലാക്കുന്നതിലും പ്രധാന പങ്ക് വഹിക്കുന്നു. രാത്രിയിൽ നല്ല ഉറക്കവും ആവശ്യത്തിന് വിറ്റാമിൻ ഡി ഉറപ്പാക്കുന്നത് പേശികളുടെ ആരോഗ്യത്തിന് നല്ലതാണ്.
അതേസമയം, പേശികളുടെ ആരോഗ്യം സംരക്ഷിക്കാന് പ്രായമാകുന്നത് വരെ കാത്തിരിക്കരുതെന്നും ഡോക്ടര്മാര് മുന്നറിയിപ്പ് നല്കുന്നു. ചെറുപ്പം മുതല് പേശികളുടെ ആരോഗ്യം അടിസ്ഥാനമാക്കിയുള്ള ജീവിത ശൈലി പിന്തുടരണമെന്നും ഡോക്ടര്മാര് പറയുന്നു.
