പോഷകഗുണത്തില് മുന്പന്തിയില് തന്നെയാണ് കൂണുകളുടെ സ്ഥാനം. വിറ്റാമിന് ഡി ലഭ്യമാകുന്നതിന് ഏറ്റവും മികച്ച മാര്ഗവും. എന്നാല് കടയില് നിന്ന് വാങ്ങുന്ന കൂണുകള് വളരെ പെട്ടെന്ന് തന്നെ മോശമായി പോകുമെന്നതാണ് പ്രധാന വെല്ലുവിളി. ഒന്നോ രണ്ടോ ദിവസത്തിനുള്ളില് തന്നെ അവ വഴുവഴുപ്പുള്ളതാവുകയോ കറുത്ത പാടുകള് ഉണ്ടാവുകയോ ചെയ്യാം.
കൂണിന്റെ ഏറിയ പങ്കും ജലാംശമായതിനാല് ഈര്പ്പം തങ്ങിനില്ക്കുന്ന അന്തരീക്ഷത്തിലോ വളരെ മുറുക്കി അടച്ച പാത്രങ്ങളിലോ വെച്ചാല് ഇത് പെട്ടെന്ന് നശിച്ചുപോകാം. കൂണ് ശരിയായ രീതിയില് സൂക്ഷിക്കുന്നത് ഇവയുടെ ഘടന നിലനിര്ത്താനും പോഷകങ്ങള് സംരക്ഷിക്കാനും സഹായിക്കും.
കൂണുകള് എങ്ങനെ സൂക്ഷിക്കാം
പേപ്പര് ബാഗിലോ, തുണിയില് പൊതിഞ്ഞോ സൂക്ഷിക്കാം കൂണുകള് ഫ്രിഡ്ജില് സൂക്ഷിക്കാവുന്നതാണ്. വായുസഞ്ചാരം നിലനിര്ത്താന് സഹായിക്കുന്ന തരത്തില് സൂക്ഷിക്കാന് ശ്രദ്ധിക്കുക. കൂണ് അവയുടെ ഗുണമേന്മ അനുസരിച്ച് അഞ്ച് മുതല് ഏഴ് ദിവസം വരെ ഫ്രഷായി സൂക്ഷിക്കാം.
പ്ലാസ്റ്റിക് കവറുകളോ ബാഗുകളോ ഈര്പ്പം തങ്ങിനിര്ത്തുന്നതിനാല് കൂണ് പെട്ടെന്ന് കേടാകാന് സാധ്യതയുണ്ട്. വായുകടക്കാത്ത എയര്ടൈറ്റ് പാക്കേജിങ്ങും ഒഴിവാക്കാം. കൂണ് സംഭരിച്ചിരിക്കുന്ന പാത്രങ്ങള്ക്ക് മുകളില് മറ്റു സാധനങ്ങള് വെക്കാതിരിക്കാനും ശ്രദ്ധിക്കുക. പാചകം ചെയ്യാന് എടുക്കുമ്പോള് മാത്രം ഇവ വൃത്തിയാക്കുക.
ദീര്ഘകാല സംഭരണം വേണമെങ്കില്
കൂണുകള് ചെറുതായി ഒന്ന് വഴട്ടിയ ശേഷം തണുപ്പിക്കാം. ശേഷം ഇവ ഫ്രീസ് ചെയ്തു സൂക്ഷിക്കുന്നത് രണ്ട് മാസം വരെ കേടാകാതെ ഇരിക്കും
