‘മറ്റെന്തും സഹിക്കാം, പുറം പൊളിയുന്ന ചുമ താങ്ങാനാവില്ല…’ ചുമച്ചു തുടങ്ങുമ്പോഴേ മിക്കവാറും ആളുകള് മെഡിക്കല് ഷോപ്പുകളിലേക്ക് പായും, ഏതെങ്കിലും കഫ് സിറപ്പ് വാങ്ങി കുടിക്കും. വിശ്വാസം അതാണെല്ലോ എല്ലാം! ചിലര്ക്ക് റെഡിയാവും ചിലര്ക്ക് റെഡിയാവില്ല എന്ന മട്ടിലാവും ഇവ പ്രവര്ത്തിക്കുക.
ശരീരത്തിലെ പ്രതിരോധ സംവിധാനത്തിന്റെ ഒരു സ്വാഭാവിക പ്രതികരണമാണ് ചുമ. ശ്വാസനാളിയില് രൂപപ്പെടുന്ന കഫവും അണുക്കളെയും അന്യവസ്തുക്കളെയും പുറന്തള്ളി ശ്വാസകോശവും ശ്വസനനാളിയും സംരക്ഷിക്കുന്നതില് ചുമയ്ക്ക് വലിയ പങ്കുണ്ട്.
ഓവര് ദ് കൗണ്ടറായി കഫ് സിറപ്പ് മെഡിക്കല് ഷോപ്പില് നിന്ന് വാങ്ങി കുടികുന്നതിന് പിന്നില് വലിയ അപകടങ്ങള് പതിഞ്ഞിരിപ്പുണ്ട്. കാരണം, ചുമയുടെ സ്വഭാവം തിരിച്ചറിഞ്ഞിട്ടാവണം എന്നില്ല നമ്മള് കഫ് സിറപ്പ് വാങ്ങുന്നത്. ശരിയായ കഫ് സിറപ്പ് വാങ്ങിയില്ലെങ്കില് അത് ഗുണത്തെക്കാള് ദോഷവും ചെയ്യാം.
കഫമുള്ള ചുമ ഉള്ളയാള് ചുമയെ അമര്ച്ച ചെയ്യുന്നതിനുള്ള സിറപ്പ് വാങ്ങിയാല് കഫം ഉള്ളില് കെട്ടിക്കിടന്ന് അണുബാധ വര്ധിക്കാം. അതേസമയം കഫം ഇല്ലാത്ത ചുമയുള്ള വ്യക്തി, കഫത്തെ പുറത്തു കളയുന്നതിനുള്ള സിറപ്പാണു കഴിക്കുന്നതെങ്കില് ചുമ വര്ധിക്കും. മാത്രമല്ല, കഫ് സിറപ്പുകളിലെ ചില ചേരുവകള് പാര്ശ്വഫലങ്ങളും ഉണ്ടാക്കാം.
അത്തരം സിറപ്പുകള് നിര്ദേശം കൂടാതെ ഉപയോഗിക്കരുത്. കുട്ടികള്ക്കും ഓവര് ദ കൗണ്ടറായി കഫ് സിറപ്പുകള് നല്കരുത്. കഫ് സിറപ്പു കഴിക്കേണ്ടതു ഡോക്ടര് നിര്ദേശിക്കുന്ന അളവിലാണ്. ഇനി ശരിയായ കഫ് സിറപ്പ് ആണ് ഉപയോഗിക്കുന്നതെങ്കിലോ, രോഗിക്ക് താല്ക്കാലിക ആശ്വാസം കിട്ടുന്നതോടെ ഡോക്ടറെ കാണാന് വൈകും.
ഇത്, ചുമയ്ക്ക് പിന്നില് മറ്റെന്തെങ്കിലും രോഗമുണ്ടെങ്കില് കണ്ടെത്താന് വൈകുകയും ചെയ്യുന്നു. മാത്രമല്ല ഒരാള് കഴിക്കുന്ന കഫ് സിറപ്പ് മറ്റൊരാള്ക്ക് അനുയോജ്യമാകില്ല. അടുത്തിടെ ഗുണനിലവാരം കുറഞ്ഞ കഫ് സിറപ്പ് ഉപയോഗിക്കുന്നതിനെതിരെ ലോകാരോഗ്യ സംഘടന മുന്നറിയിപ്പ് നല്കിയിരുന്നു. ചുമയ്ക്ക് സ്വയം ചികിത്സ ഒഴിവാക്കുന്നതാണ് ഉചിതം.
