ആധുനിക വൈദ്യശാസ്ത്രം വളരെയധികം പുരോഗമിച്ചുവെങ്കിലും മനുഷ്യനെ ഭയപ്പെടുത്തുന്ന അസുഖങ്ങളുടെ പട്ടികയില് ഒന്നാമതാണ് ക്യാന്സര്. അതില് തന്നെ ഏറ്റവും കൂടുതല് പേരെ ബാധിക്കുന്നത് തൊണ്ടയിലെ ക്യാന്സര് ആണ്. പുകയിലയുടെ അമിതമായ ഉപയോഗമാണ് ഈ സ്ഥിതിയിലേക്ക് എത്തിക്കുന്നതും. എന്നാല് ലൈംഗികബന്ധത്തിലേര്പ്പെടുമ്പോള് ഓറല് സെക്സ് കാരണം തനിക്ക് ക്യാന്സര് ബാധിച്ചുവെന്ന നടന്റെ വെളിപ്പെടുത്തലാണ് ശ്രദ്ധേയമാകുന്നത്.
അമേരിക്കന് നടനും നിര്മാതാവുമായി മൈക്കിള് ഡഗ്ലസ് ‘ദി ഗാര്ഡിയന്’ നല്കിയ അഭിമുഖത്തിലാണ് വെളിപ്പെടുത്തല് നടത്തിയത്. ഓറല് സെക്സിലൂടെ പകരുന്ന എച്ച്പിവി വൈറസാണ് തന്റെ തൊണ്ടയിലെ കാന്സറിന് കാരണമായതെന്നായിരുന്നു അദ്ദേഹം തുറന്ന് പറഞ്ഞത്. 2010ല് ആയിരുന്നു നടന് ക്യാന്സര് സ്ഥിരീകരിച്ചത്. വളരെയധികം ബുദ്ധിമുട്ട് അസുഖ സമയത്ത് താന് നേരിട്ടുവെന്ന് അദ്ദേഹം പറഞ്ഞപ്പോള് രോഗത്തിന് കാരണമായ പുകവലിയും മദ്യപാനവും പശ്ചാത്തപിക്കാന് കാരണമാകുന്നുണ്ടോ എന്നായിരുന്നു അവതാരകന് തിരികെ ചോദിച്ചത്.
ഇതിന് മറുപടിയെന്നോണമാണ് അദ്ദേഹം ഓറല് സെക്സിലൂടെ തനിക്ക് രോഗം ബാധിച്ചുവെന്ന് വെളിപ്പെടുത്തിയത്. അമേരിക്കയില് ഓറല് സെക്സ് കാരണം 60 മുതല് 70 ശതമാനം വരെ രോഗം വ്യാപിക്കുന്നുണ്ടെന്നാണ് കണക്കുകള് സൂചിപ്പിക്കുന്നത്. എന്നാല് ഇതില് 90 ശതമാനവും രോഗം പൂര്ണമായും ഭേദമാകുന്ന അവസ്ഥയിലായിരിക്കുമെന്നും പഠനങ്ങള് പറയുന്നു.
പുരുഷന്മാരില് 10% പേരെയും സ്ത്രീകളില് 3.6% പേരെയും ഈ വൈറസ് ബാധിക്കുന്നുണ്ടെന്നാണ് കണക്കുകള്.ചെവിവേദന, വിട്ടുമാറാത്ത തൊണ്ടവേദന. കഴുത്തില് കാണുന്ന മുഴകള്. ആഹാരം ചവയ്ക്കാനാവാത്ത അവസ്ഥ, ശബ്ദത്തിലെ മാറ്റം, നിലയ്ക്കാത്ത ചുമ, ശരീരഭാരം കുറയല് എന്നിവയാണ് ഈ രോഗാവസ്ഥയുടെ പ്രധാന ലക്ഷണം. 2023ലെ കണക്ക് അനുസരിച്ച് ഇന്ത്യയില് ക്യാന്സര് സ്ഥിരീകരിക്കുന്ന ആകെ രോഗികളില് നല്ലൊരു വിഭാഗവും തൊണ്ടയിലെ ക്യാന്സര് ബാധിതരാണ്.
