സംസ്ഥാനത്ത് മഴ ശക്തമാകുന്നതിനൊപ്പം ഡെങ്കിപ്പനി ഭീഷണിയും ഉയരുന്നു. Dengue Fever പകരുന്നത് പ്രധാനമായും Aedes mosquito കടിയിലൂടെയാണ്. ശുദ്ധജലത്തിൽ വളരുന്ന ഈഡിസ് കൊതുകുകളുടെ വ്യാപനം മഴക്കാലത്ത് വർധിക്കുന്നതിനാൽ ജാഗ്രത അനിവാര്യമാണ്.
ഡെങ്കിപ്പനിയുടെ ആദ്യ ലക്ഷണം സാധാരണയായി പെട്ടെന്നുണ്ടാകുന്ന കടുത്ത പനിയാകുന്നു. ശരീരതാപനില 102 മുതൽ 104 ഡിഗ്രി ഫാരൻഹീറ്റ് വരെ ഉയരാം. ഈ പനി രണ്ട് മുതൽ ഏഴ് ദിവസം വരെ നീണ്ടുനിൽക്കുകയും വിറയലും കടുത്ത ക്ഷീണവും ഉണ്ടാക്കുകയും ചെയ്യും.
ശക്തമായ തലവേദനയും കണ്ണിന് പിന്നിലെ വേദനയും ഡെങ്കിപ്പനിയുടെ പ്രധാന ലക്ഷണങ്ങളിലൊന്നാണ്. കണ്ണുകൾ ചലിപ്പിക്കുമ്പോഴോ വെളിച്ചത്തിലേക്ക് നോക്കുമ്പോഴോ വേദന കൂടുതൽ അനുഭവപ്പെടാം. കൂടാതെ പേശിവേദന, സന്ധിവേദന, കടുത്ത ദേഹവേദന എന്നിവയും രോഗബാധിതരിൽ സാധാരണമാണ്.
ചിലരിൽ ശരീരത്തിൽ ചുവന്ന പാടുകളോ തടിപ്പുകളോ പ്രത്യക്ഷപ്പെടാം. പനി കുറഞ്ഞ ശേഷവും ദീർഘകാല ക്ഷീണവും ഊർജക്കുറവും അനുഭവപ്പെടാൻ സാധ്യതയുണ്ട്.
ഡെങ്കിപ്പനി പ്രതിരോധിക്കാൻ വീടിനകത്തും പരിസരത്തും വെള്ളം കെട്ടിക്കിടക്കുന്നത് ഒഴിവാക്കണം. പൂച്ചട്ടി, ബക്കറ്റ്, ടയർ, ഡ്രം തുടങ്ങിയവ പതിവായി വൃത്തിയാക്കണം. വാട്ടർ ടാങ്കുകൾ മൂടിവെക്കുകയും കൊതുക് വളരാൻ ഇടയാകുന്ന സാഹചര്യം ഒഴിവാക്കുകയും വേണം.
ശരീരം പരമാവധി മൂടുന്ന വസ്ത്രങ്ങൾ ധരിക്കുക, കൊതുകുവല ഉപയോഗിക്കുക, ജനലുകളിൽ നെറ്റ് സ്ഥാപിക്കുക, കൊതുക് നശീകരണ മാർഗങ്ങൾ സ്വീകരിക്കുക എന്നിവയും പ്രതിരോധത്തിന് സഹായകരമാണ്.
കടുത്ത പനി, തലവേദന, ദേഹവേദന, ചുവന്ന പാടുകൾ, അമിത ക്ഷീണം തുടങ്ങിയ ലക്ഷണങ്ങൾ കണ്ടാൽ ഉടൻ വൈദ്യസഹായം തേടണം. രോഗബാധ സംശയിക്കുന്നവർ ധാരാളം വെള്ളം കുടിച്ച് നിർജ്ജലീകരണം ഒഴിവാക്കണമെന്നും ആരോഗ്യ വിദഗ്ധർ നിർദേശിക്കുന്നു.
