ഇന്നത്തെ കാലത്ത് പ്രഗ്നൻസി കിറ്റുകൾ വഴി നിമിഷങ്ങൾക്കുള്ളിൽ ഗർഭധാരണം സ്ഥിരീകരിക്കാം. എന്നാൽ ആധുനിക വൈദ്യശാസ്ത്രം ഇത്രയേറെ പുരോഗമിക്കുന്നതിന് മുമ്പ് നമ്മുടെ മുത്തശ്ശിമാർ ഗർഭധാരണം തിരിച്ചറിഞ്ഞിരുന്നത് എങ്ങനെയായിരുന്നെന്ന് ചിന്തിച്ചിട്ടുണ്ടോ? അന്ന് വീട്ടുപകരണങ്ങളും അടുക്കളയിലെ സാധനങ്ങളും വെച്ചായിരുന്നു ഇത്തരം പരിശോധനകൾ നടത്തിയിരുന്നത്. ശാസ്ത്രീയ അടിത്തറയൊന്നുമില്ലെങ്കിലും, തലമുറകളായി കൈമാറ്റം ചെയ്യപ്പെട്ട ആ രസകരമായ നാടൻ രീതികൾ ഇതാ.
- ഉപ്പ് പരിശോധന: ഒരു പാത്രത്തിൽ പ്രഭാതത്തിലെ മൂത്രം എടുത്ത് അതിലേക്ക് അൽപ്പം ഉപ്പ് ചേർക്കുക. മിനിറ്റുകൾക്കുള്ളിൽ വെളുത്ത കട്ടകളോ പതയോ ഉണ്ടാവുകയാണെങ്കിൽ അത് ഗർഭധാരണത്തിന്റെ ലക്ഷണമായി കരുതിയിരുന്നു.
- പഞ്ചസാര: ഒരു ടേബിൾസ്പൂൺ പഞ്ചസാരയിലേക്ക് മൂത്രമൊഴിച്ചു വെക്കുക. പഞ്ചസാര അലിഞ്ഞുപോകുന്നതിന് പകരം കട്ടയായി മാറുന്നുണ്ടെങ്കിൽ അത് ഗർഭധാരണത്തെ സൂചിപ്പിക്കുന്നതായി വിശ്വസിക്കപ്പെടുന്നു.
- ബേക്കിംഗ് സോഡ: മൂത്ര സാമ്പിളിൽ ഒരു ടീസ്പൂൺ ബേക്കിംഗ് സോഡ ചേർക്കുമ്പോൾ കുമിളകൾ പ്രത്യക്ഷപ്പെടുകയാണെങ്കിൽ അതൊരു പോസിറ്റീവ് സൂചനയാണെന്നാണ് വിശ്വാസം.
- ഗോതമ്പ്, ബാർലി: മൂത്രത്തിൽ ധാന്യങ്ങൾ കുതിർത്തുവെച്ച് കുറച്ചു ദിവസങ്ങൾക്ക് ശേഷം അവ മുളയ്ക്കുന്നുണ്ടെങ്കിൽ ഗർഭധാരണം നടന്നതായി കണക്കാക്കുന്നു.
- വൈറ്റ് വിനാഗിരി: വിനാഗിരിയും മൂത്രവും ചേർത്ത ശേഷം നിറവ്യത്യാസമോ കുമിളകളോ വരുന്നുണ്ടോ എന്ന് നിരീക്ഷിക്കുന്ന രീതിയാണിത്.
- സോപ്പ്: സോപ്പിന് മുകളിൽ മൂത്രമൊഴിച്ച ശേഷം നുരയോ പതയോ വരുന്നുണ്ടോ എന്ന് പരിശോധിക്കുന്നു.
- സംഭരിച്ച മൂത്ര പരിശോധന: ഒരു ഗ്ലാസ് പാത്രത്തിൽ മൂത്രം 24 മണിക്കൂർ അനക്കാതെ വെക്കുമ്പോൾ മുകളിൽ നേർത്ത പാളി രൂപപ്പെടുന്നുണ്ടെങ്കിൽ അത് ഗർഭലക്ഷണമായി കരുതിപ്പോന്നു.
എങ്കിലും, ഒരു കാര്യം പ്രത്യേകം ശ്രദ്ധിക്കുക. ഇവയൊന്നും തന്നെ ശാസ്ത്രീയമായി തെളിയിക്കപ്പെട്ട മാർഗ്ഗങ്ങളല്ല. ഹോർമോൺ വ്യതിയാനങ്ങളും മറ്റ് ശാരീരിക കാരണങ്ങളും ഇത്തരം ഫലങ്ങളെ സ്വാധീനിച്ചേക്കാം. അതിനാൽ ഗർഭധാരണം സ്ഥിരീകരിക്കുന്നതിനായി ഇത്തരം പരീക്ഷണങ്ങൾക്ക് പകരം വിപണിയിൽ ലഭ്യമായ സർട്ടിഫൈഡ് കിറ്റുകൾ ഉപയോഗിക്കുകയോ ഡോക്ടറുടെ സഹായം തേടുകയോ ചെയ്യുന്നതാണ് ഏറ്റവും ഉചിതം. അറിവിനായി ഇത്തരം കാര്യങ്ങൾ മനസ്സിലാക്കാമെങ്കിലും, കൃത്യമായ ഫലത്തിനായി ശാസ്ത്രീയമായ വഴികൾ തന്നെ പിന്തുടരണമെന്ന് ചുരുക്കം.
