തിരുവനന്തപുരം: വ്യാജ സൗന്ദര്യവർധക വസ്തുക്കളുടെ വിപണനം തടയുന്നതിനായി ഡ്രഗ്സ് കൺട്രോൾ വകുപ്പ് നടപ്പാക്കുന്ന ‘ഓപ്പറേഷൻ സൗന്ദര്യ’യുടെ ഭാഗമായി 9.64 ലക്ഷം രൂപയുടെ വ്യാജ ഉൽപ്പന്നങ്ങൾ പിടികൂടിയതായി മന്ത്രി കെ. മുരളീധരൻ അറിയിച്ചു. ജൂലൈ അവസാനവാരത്തോടെ പദ്ധതിയുടെ നാല് ഘട്ടങ്ങൾ പൂർത്തിയായപ്പോഴുള്ള കണക്കാണിത്.
ആദ്യഘട്ടത്തിൽ 5,09,303 രൂപയുടെയും രണ്ടാംഘട്ടത്തിൽ 2.50 ലക്ഷം രൂപയുടെയും മൂന്നാംഘട്ടത്തിൽ 1.50 ലക്ഷം രൂപയുടെയും നാലാംഘട്ടത്തിൽ 55,000 രൂപയുടെയും വ്യാജ സൗന്ദര്യവർധക വസ്തുക്കളാണ് പിടിച്ചെടുത്തത്. കോസ്മെറ്റിക്സ് റൂൾസ് 2020 പ്രകാരമുള്ള മാനദണ്ഡങ്ങൾ പാലിക്കാത്തതും മതിയായ നിർമ്മാണ ലൈസൻസില്ലാതെ നിർമിച്ച് വിതരണം ചെയ്തതുമായ ഉൽപ്പന്നങ്ങളാണ് പിടികൂടിയത്.
കൗമാരക്കാരിലും കുട്ടികളിലും ഫേസ് ക്രീമുകളുടെ അമിത ഉപയോഗവുമായി ബന്ധപ്പെട്ട ആരോഗ്യപ്രശ്നങ്ങൾ ഉയരുന്ന സാഹചര്യത്തിലാണ് സംസ്ഥാന വ്യാപകമായി പരിശോധന നടത്തിയത്. വിവിധ സൗന്ദര്യവർധക വസ്തുക്കളുടെ സാമ്പിളുകൾ ശേഖരിച്ച് തിരുവനന്തപുരം, എറണാകുളം ഡ്രഗ്സ് ടെസ്റ്റിംഗ് ലബോറട്ടറികളിൽ ഗുണനിലവാര പരിശോധനയ്ക്ക് വിധേയമാക്കി.
പരിശോധനയിൽ ചില ലിപ്സ്റ്റിക്, ഫേസ് ക്രീം സാമ്പിളുകളിൽ അനുവദനീയമായ പരിധിയേക്കാൾ കൂടുതലായി മെർക്കുറി കണ്ടെത്തി. വിപണിയിൽ നിന്ന് പിടിച്ചെടുത്ത പാകിസ്ഥാൻ നിർമിത ‘ഫൈസ’, ‘ഗോറി’ എന്നീ ഫേസ് ക്രീമുകളിൽ 20,000 പി.പി.എം വരെ മെർക്കുറിയുടെ അംശം കണ്ടെത്തിയതായി മന്ത്രി അറിയിച്ചു.
ഇത്തരം ഉൽപ്പന്നങ്ങൾ ഗുരുതരമായ ത്വക്ക് രോഗങ്ങൾക്കും മറ്റ് ആരോഗ്യപ്രശ്നങ്ങൾക്കും കാരണമാകാമെന്നും പർച്ചേസ് ബില്ലുകൾ പോലുമില്ലാതെ വിപണിയിലെത്തുന്ന ഇത്തരം ക്രീമുകൾ ഉപയോഗിക്കരുതെന്നും അധികൃതർ മുന്നറിയിപ്പ് നൽകി. നിയമലംഘനം നടത്തിയവർക്കെതിരെ നടപടി സ്വീകരിക്കുകയും ഉൽപ്പന്നങ്ങൾ വിപണിയിൽനിന്ന് പിൻവലിക്കുന്നതിനുള്ള നടപടികൾ ആരംഭിക്കുകയും ചെയ്തിട്ടുണ്ട്.
ലിപ്സ്റ്റിക്, ബേബി പൗഡർ, ബേബി സോപ്പ്, ബേബി ഓയിൽ തുടങ്ങിയ ഉൽപ്പന്നങ്ങളും പരിശോധനയ്ക്ക് വിധേയമാക്കി. നിയമാനുസൃത ലൈസൻസുകളോടെയും ഗുണനിലവാര മാനദണ്ഡങ്ങൾ പാലിച്ചും നിർമിക്കുന്ന സൗന്ദര്യവർധക വസ്തുക്കൾ മാത്രമേ വിപണിയിൽ ലഭ്യമാകുന്നുള്ളൂവെന്ന് ഉറപ്പാക്കാൻ ഡ്രഗ്സ് കൺട്രോൾ വിഭാഗത്തിന് മന്ത്രി നിർദേശം നൽകി.
സംശയാസ്പദമായ സൗന്ദര്യവർധക ഉൽപ്പന്നങ്ങളെക്കുറിച്ചും നിയമലംഘനങ്ങളെക്കുറിച്ചും ഡ്രഗ്സ് കൺട്രോൾ വകുപ്പിന്റെ ടോൾഫ്രീ ഹെൽപ്ലൈൻ 1800-425-3182 വഴി പരാതിപ്പെടാം.
