ആർത്തവം അവസാനിക്കുന്ന കാലയാളവിൽ ഓർമക്കുറവ് മുതൽ ഹൃദ്രോഗം വരെയുള്ള ആരോഗ്യപ്രശ്നങ്ങൾ ഉണ്ടാകാനുള്ള സാധ്യതയുണ്ടെന്ന് ഡോക്ടർമാർ. ഹൃദയം,തലച്ചോർ, അസ്ഥികൾ എന്നിവയുടെ പ്രതിരോധശേഷിയെ ഇത് ദോഷകരമായി ബാധിക്കാമെന്ന് ഡോക്ടർ വ്യക്തമാക്കുന്നു.
മെനോപോസ് എന്നത് ആർത്തവം അവസാനിക്കുന്നതിൽ മാത്രം ഒതുങ്ങുന്നില്ല.
മെനോപോസിനെ കുറിച്ചുള്ള ചർച്ചകൾ പലപ്പോഴും അനുഭവങ്ങൾ, മാനസികാവസ്ഥയിലെ മാറ്റങ്ങൾ, ആർത്തവ ക്രമക്കേടുകൾ എന്നിവയിൽ ഒതുങ്ങാറുണ്ട്. എന്നാൽ മെനോപോസിന്റെ മറ്റൊരു നിർണായക വശം പലപ്പോഴും ശ്രദ്ധിക്കപ്പെടാതെ പോകുന്നു. സ്ത്രീകളുടെ ദീർഘകാല ആരോഗ്യത്തെ ഇത് ഗണ്യമായി ബാധിക്കുമെന്നാണ് ആരോഗ്യവിദഗ്ധരുടെ മുന്നറിയിപ്പ്.
ഈ ഘട്ടത്തിൽ ശരീരത്തിലെ ഈസ്ട്രജൻ (Estrogen) ഹോർമോണിന്റെ അളവ് കുത്തനെ കുറയുന്നു. പ്രത്യുത്പാദനത്തിന് പുറമെ ഹൃദയം, അസ്ഥികൾ, തലച്ചോർ, രക്തക്കുഴലുകൾ, പ്രതിരോധ സംവിധാനം തുടങ്ങി നിരവധി അവയവങ്ങളുടെ ആരോഗ്യസംരക്ഷണത്തിൽ നിർണായക പങ്ക് വഹിക്കുന്ന ഹോർമോണാണ് ഈസ്ട്രജൻ. അതിനാൽ ഇതിന്റെ കുറവ് ഹൃദ്രോഗം, അസ്ഥിക്ഷയം (ഓസ്റ്റിയോപോറോസിസ്), പ്രമേഹം, ഓർമ്മക്കുറവ്, ചില അണുബാധകൾ എന്നിവയുടെ സാധ്യത വർധിപ്പിക്കും.
മെനോപോസ് എപ്പോൾ സംഭവിക്കും?
തുടർച്ചയായി 12 മാസം ആർത്തവം ഇല്ലാതാകുമ്പോഴാണ് മെനോപോസ് സ്ഥിരീകരിക്കുന്നത്. സാധാരണയായി 45 മുതൽ 55 വയസിനിടയിലാണ് ഇത് സംഭവിക്കുന്നത്. 45 വയസിന് മുമ്പ് സംഭവിച്ചാൽ ‘നേരത്തെയുള്ള ആർത്തവ വിരാമം’ എന്നും 40 വയസിന് മുമ്പാണെങ്കിൽ ‘അകാല ആർത്തവ വിരാമം’ എന്നും വിളിക്കുന്നു.
മെനോപോസിന് ശേഷം രാത്രിയിലെ അമിത വിയർപ്പ്, ഉറക്കക്കുറവ്, യോനിവരൾച്ച, മാനസികാവസ്ഥയിലെ വ്യതിയാനങ്ങൾ, ലൈംഗികതാൽപര്യം കുറയൽ, മൂത്രാശയവുമായി ബന്ധപ്പെട്ട അസ്വസ്ഥതകൾ തുടങ്ങിയ ലക്ഷണങ്ങൾ അനുഭവപ്പെടാൻ സാധ്യതയുണ്ടെന്ന് ഗൈനക്കോളജിസ്റ്റായ ഡോ. കിരൺ എസ്. കോയ്ലോ വിശദീകരിച്ചു.
ഹൃദ്രോഗ സാധ്യത ഉയരുന്നത് എന്തുകൊണ്ട്?
സ്ത്രീകളിലെ ഹൃദ്രോഗ സാധ്യത മെനോപോസിന് ശേഷം വർധിക്കുന്നതിന് പ്രധാന കാരണം ഈസ്ട്രജന്റെ കുറവാണ്. മെനോപോസിന് ശേഷം ‘ചീത്ത’ കൊളസ്ട്രോളായ എൽഡിഎല്ലും ട്രൈഗ്ലിസറൈഡുകളും വർധിക്കുകയും ‘നല്ല’ കൊളസ്ട്രോളായ എച്ച്ഡിഎൽ കുറയുകയും ചെയ്യാം. ഇതോടെ വയറിലെ കൊഴുപ്പ് കൂടുക, രക്തക്കുഴലുകൾ കട്ടിയാകുക, ഉയർന്ന രക്തസമ്മർദം എന്നിവയ്ക്കുള്ള സാധ്യത ഉയരും. ഈ മാറ്റങ്ങൾ ഹൃദ്രോഗത്തിനുള്ള സാധ്യത വർധിപ്പിക്കും.
ക്രമമായ വ്യായാമം, ശരീരഭാരം നിയന്ത്രിക്കൽ, ആരോഗ്യകരമായ ഭക്ഷണശീലം എന്നിവ ഈ അപകടസാധ്യത കുറയ്ക്കാൻ സഹായിക്കും.
ഈസ്ട്രജൻ കുറയുമ്പോൾ അസ്ഥികളുടെ സാന്ദ്രത കുറയുകയും കാത്സ്യം ശരീരത്തിൽ ആഗിരണം ചെയ്യാനുള്ള കഴിവ് കുറഞ്ഞുവരികയും ചെയ്യുന്നു. ഇതുമൂലം അസ്ഥിക്ഷയത്തിനും എല്ല് പൊട്ടലിനും സാധ്യത കൂടും.
തലച്ചോറിനെയും മെനോപോസ് ബാധിക്കും. ഓർമ്മശക്തി കുറയൽ, ശ്രദ്ധക്കുറവ്, മാനസികാവസ്ഥയിലെ മാറ്റങ്ങൾ, ചിന്താശേഷിയിലെ കുറവ് എന്നിവ ചില സ്ത്രീകളിൽ കണ്ടുവരാം. ഈസ്ട്രജൻ കുറയുന്നത് രക്തക്കുഴലുകളുടെ ആരോഗ്യത്തെ ബാധിക്കുന്നതിനാൽ സ്ട്രോക്കിന്റെ സാധ്യതയും വർധിക്കാം.
രക്തത്തിലെ പഞ്ചസാരയുടെ അളവ് ഉയരാൻ സാധ്യത
ഇൻസുലിൻ റെസിസ്റ്റൻസ് കൂടുന്നതിനാൽ രക്തത്തിലെ പഞ്ചസാരയുടെ അളവ് ഉയരാനും ശരീരത്തിന്റെ മെറ്റബോളിസം മന്ദഗതിയിലാകാനും സാധ്യതയുണ്ട്. ഉറക്കക്കുറവും കോർട്ടിസോൾ ഹോർമോണിന്റെ വർധനയും പ്രമേഹസാധ്യത കൂട്ടുന്ന ഘടകങ്ങളാണ്.
മെനോപോസിന്റെ ലക്ഷണങ്ങൾ സഹിച്ചുകൊണ്ട് ജീവിക്കണമെന്ന ധാരണ തെറ്റാണെന്ന് ഡോ. കോയ്ലോ പറയുന്നു. ഇത്തരം ലക്ഷണങ്ങൾ അനുഭവപ്പെടുന്ന സ്ത്രീകൾ ഗൈനക്കോളജിസ്റ്റിനെയോ ആരോഗ്യവിദഗ്ധനെയോ സമീപിക്കണം.
വിശദമായ പരിശോധനയ്ക്ക് ശേഷം കൗൺസലിംഗ്, കോഗ്നിറ്റീവ് ബിഹേവിയറൽ തെറാപ്പി (CBT), ആവശ്യമായാൽ എസ്എസ്ആർഐ (SSRI), എസ്എൻആർഐ (SNRI) വിഭാഗത്തിലെ മരുന്നുകൾ എന്നിവ നൽകാം.
മെനോപോസ് ജീവിതത്തിന്റെ ഭാഗമാണ്. എന്നാൽ അതിനോടൊപ്പം ഉണ്ടാകുന്ന ആരോഗ്യപ്രശ്നങ്ങളെക്കുറിച്ച് അവബോധമുണ്ടാകുകയും കൃത്യമായ ആരോഗ്യപരിശോധന, രക്തത്തിലെ പഞ്ചസാര നിയന്ത്രണം, സമീകൃത ഭക്ഷണം, വ്യായാമം എന്നിവ പാലിക്കുകയും ചെയ്താൽ ദീർഘകാല ആരോഗ്യവും ജീവിതനിലവാരവും സംരക്ഷിക്കാൻ കഴിയുമെന്ന് വിദഗ്ധർ വ്യക്തമാക്കുന്നു.
