നമ്മുടെ വയസ്സ് കേവലം ഒരു സംഖ്യ മാത്രമാണെന്ന് പറയാറുണ്ടെങ്കിലും, ശരീരം യഥാർത്ഥത്തിൽ എങ്ങനെയാണ് പ്രായമാകുന്നത് എന്ന് ചോദിച്ചാൽ പലർക്കും വ്യക്തമായ ഉത്തരമില്ല. ലോകപ്രശസ്ത ഹാർവാർഡ് സർവകലാശാലയിലെ ജനിതകശാസ്ത്രജ്ഞനും ദീർഘായുസ്സിനെക്കുറിച്ചുള്ള ഗവേഷകനുമായ ഡോ. ഡേവിഡ് സിൻക്ലെയർ, പ്രശസ്ത ഇൻഫ്ലുവൻസർ രാജ് ഷമാനിയുമായി നടത്തിയ അഭിമുഖത്തിൽ വെളിപ്പെടുത്തിയ വിവരങ്ങൾ ശാസ്ത്രലോകത്ത് വലിയ ചർച്ചയായിരിക്കുകയാണ്. മനുഷ്യശരീരത്തിലെ ഓരോ അവയവങ്ങളും വ്യത്യസ്ത വേഗതയിലാണ് പ്രായമാകുന്നത് എന്ന ഞെട്ടിക്കുന്ന സത്യമാണ് അദ്ദേഹം പങ്കുവെക്കുന്നത്. ഒരു വ്യക്തിയുടെ ശരീരം മുഴുവൻ വാർധക്യത്തിലേക്ക് വീഴാൻ ശരീരത്തിലെ ഏതെങ്കിലും ഒരു അവയവത്തിനുണ്ടാകുന്ന തകരാറ് മാത്രം മതിയെന്നാണ് അദ്ദേഹത്തിന്റെ പ്രധാന കണ്ടെത്തൽ.
അവയവങ്ങൾ തമ്മിലുള്ള ആശയവിനിമയവും പ്രായമാകലും
ശരീരത്തിലെ വിവിധ ഭാഗങ്ങളും കലകളും നിരന്തരം പരസ്പരം വിവരങ്ങൾ കൈമാറുന്നുണ്ട്. ഏതെങ്കിലും ഒരു ഭാഗത്ത് പ്രായമാകുമ്പോൾ, ആ ഭാഗത്തുനിന്നുള്ള സന്ദേശങ്ങൾ മറ്റ് അവയവങ്ങളിലേക്കും വാർധക്യത്തെ വേഗത്തിൽ പടർത്തുകയാണ് ചെയ്യുന്നത്. ലബോറട്ടറിയിൽ നടത്തിയ പരീക്ഷണങ്ങളിൽ പ്രായമായ എലികളിൽ നിന്നുള്ള കൊഴുപ്പ് ചെറുപ്പമായ എലികളിലേക്ക് മാറ്റിസ്ഥാപിച്ചപ്പോൾ, ആ ചെറുപ്പമായ എലികളുടെ ശരീരവും വളരെ പെട്ടെന്ന് വാർധക്യ ലക്ഷണങ്ങൾ കാണിക്കാൻ തുടങ്ങി. ശരീരത്തിൽ അമിതമായി അടിഞ്ഞുകൂടുന്ന പ്രായമായ കൊഴുപ്പ് കോശങ്ങൾ പുറപ്പെടുവിക്കുന്ന ‘ഇൻഫ്ലമേറ്ററി സൈറ്റോകിനുകൾ’ എന്ന പദാർത്ഥമാണ് ശരീരത്തിലുടനീളം വീക്കവും ദോഷകരമായ മാറ്റങ്ങളും വരുത്തി മറ്റ് അവയവങ്ങളുടെ പ്രവർത്തനം തകരാറിലാക്കുന്നത്.
തലച്ചോറിന്റെ അടിഭാഗത്തുള്ള ‘ഹൈപ്പോതലാമസ്’ എന്ന ഭാഗത്തിനും ഇതിൽ വലിയ പങ്കുണ്ട്. ഹോർമോണുകൾ വഴിയാണ് ഹൈപ്പോതലാമസ് ശരീരത്തിന്റെ മറ്റ് ഭാഗങ്ങളുമായി ആശയവിനിമയം നടത്തുന്നത്. ഹൈപ്പോതലാമസിന് പ്രായമാകുമ്പോൾ ശരീരം മുഴുവൻ വേഗത്തിൽ പ്രായമാകുന്നു. എന്നാൽ ഈ ഭാഗത്തെ ആരോഗ്യത്തോടെയും ചെറുപ്പമായും നിലനിർത്താൻ കഴിഞ്ഞാൽ, അത് ശരീരം മുഴുവൻ വാർധക്യത്തിൽ നിന്ന് സംരക്ഷിക്കാൻ സഹായിക്കും.
രക്തയോട്ടവും വാർധക്യത്തിന്റെ വേഗതയും
പ്രായമാകുമ്പോൾ നമ്മൾ നേരിടുന്ന ഏറ്റവും വലിയ വെല്ലുവിളികളിലൊന്ന് ശരീരത്തിലെ സൂക്ഷ്മ രക്തധമനികളുടെ എണ്ണത്തിൽ ഉണ്ടാകുന്ന കുറവാണ്. ചെറുപ്പത്തിൽ ശരീരത്തിലൂടെയും തലച്ചോറിലൂടെയും രക്തം സുഗമമായി ഒഴുകുമെങ്കിൽ, പ്രായമാകുമ്പോൾ രക്തപ്രവാഹത്തിന് തടസ്സങ്ങൾ നേരിടുന്നു. കായികമായ ശേഷിയും ഉന്മേഷവും കുറയുന്നതിന് പ്രധാന കാരണം ഇതാണ്. ശരീരകലകളിലേക്ക്, പ്രത്യേകിച്ച് തലച്ചോറിലേക്ക് കൃത്യമായ അളവിൽ ഓക്സിജനും പോഷകങ്ങളും എത്താതിരിക്കുന്നത് വാർധക്യ ലക്ഷണങ്ങളെ വേഗത്തിലാക്കുന്നു.
രക്തയോട്ടം കൂട്ടാൻ വ്യായാമം അത്യന്താപേക്ഷിതമാണ്. ഇതിനുപുറമെ, രക്തക്കുഴലുകൾ വികസിക്കുന്നതിനും അവയുടെ വഴക്കം വർധിപ്പിക്കുന്നതിനുമായി ഇ.ഡി പ്രതിരോധ മരുന്നുകളുടെ ചെറിയ അളവിലുള്ള ഡോസുകൾ ഉപയോഗിക്കുന്ന രീതിയും ഡേവിഡ് സിൻക്ലെയർ പങ്കുവെക്കുന്നു. രക്തക്കുഴലുകൾ വികസിപ്പിച്ച് തലച്ചോറിലേക്കും ശരീരകലകളിലേക്കും ആവശ്യത്തിന് ഓക്സിജൻ എത്തിക്കാൻ ഇത്തരം രീതികൾ സഹായിക്കുമെന്നാണ് അദ്ദേഹത്തിന്റെ നിരീക്ഷണം.
തലച്ചോറിലെ രക്തയോട്ടം അളക്കുന്ന പുതിയ സാങ്കേതികവിദ്യകൾ
തലച്ചോറിലെ രക്തയോട്ടം കൃത്യമായി നിരീക്ഷിക്കുക എന്നത് വാർധക്യത്തെ ചെറുക്കുന്നതിൽ നിർണായകമാണ്. നിലവിൽ എംആർഐ സ്കാൻ വഴി മാത്രമേ ഇത് കൃത്യമായി അളക്കാൻ സാധിക്കൂ എന്നതിനാൽ എല്ലാവർക്കും ഇത് പ്രാപ്യമല്ല. എന്നാൽ പോളിഫിനോളുകൾ അടങ്ങിയ ആഹാരരീതി, ഉപവാസം, കൃത്യമായ വ്യായാമം എന്നിവ തലച്ചോറിലെ രക്തയോട്ടവും ആരോഗ്യവും വർധിപ്പിക്കും. വ്യായാമം ചെയ്യുമ്പോഴും സാവധാനത്തിലുള്ള ശ്വസനക്രിയകൾ ചെയ്യുമ്പോഴും സാവൂണ പോലെയുള്ള തെറാപ്പികൾ ചെയ്യുമ്പോഴും തലച്ചോറിലെ രക്തയോട്ടം തത്സമയം ഉയരുന്നതായി ശാസ്ത്രീയമായി തെളിഞ്ഞിട്ടുണ്ട്.
നിത്യ യൗവനത്തിന് നിർദ്ദേശിക്കുന്ന 4 വഴികൾ
ശരീരത്തിന് ചെറിയ സമ്മർദ്ദങ്ങൾ നൽകുക: മിതമായ ഉപവാസം, കഠിനമായ വ്യായാമം തുടങ്ങിയ രീതികളിലൂടെ ശരീരത്തിന് ചെറിയ രീതിയിലുള്ള സ്ട്രെസ് നൽകുന്നത് കോശങ്ങളെ കൂടുതൽ സജീവമാക്കും.
ആഹാര നിയന്ത്രണം കൃത്യമാക്കുക: ആവശ്യത്തിലധികം ഭക്ഷണം കഴിക്കുന്നത് ഒഴിവാക്കുകയും കലോറി നിയന്ത്രിക്കുകയും ചെയ്യുക.
പോളിഫിനോളുകൾ ഭക്ഷണത്തിൽ ഉൾപ്പെടുത്തുക: തലച്ചോറിന്റെയും കോശങ്ങളുടെയും ആരോഗ്യം സംരക്ഷിക്കാൻ സഹായിക്കുന്ന സസ്യ അധിഷ്ഠിത പോഷകങ്ങൾ ഭക്ഷണക്രമത്തിന്റെ ഭാഗമാക്കുക.
രക്തചംക്രമണം വർധിപ്പിക്കുക: എയ്റോബിക് വ്യായാമങ്ങളിലൂടെയും ശരിയായ ജീവിതശൈലിയിലൂടെയും ശരീരത്തിലെ സൂക്ഷ്മ രക്തധമനികളിലെ രക്തയോട്ടം എപ്പോഴും സജീവമായി നിലനിർത്തുക.
പ്രായമാകുന്നത് പൂർണ്ണമായി തടയാൻ സാധ്യമല്ലെങ്കിലും, അവയവങ്ങളുടെ പ്രവർത്തനം മനസ്സിലാക്കി അവയിലേക്കുള്ള രക്തയോട്ടം നിലനിർത്തിയാൽ വാർധക്യത്തിന്റെ വേഗത കുറയ്ക്കാനും കൂടുതൽ കാലം ആരോഗ്യത്തോടെ ജീവിക്കാനും സാധിക്കും
