- Advertisement -Newspaper WordPress Theme
HEALTHമുഴുപ്പാൽ, ചീസ് കഴിച്ചാൽ തടി കൂടുമോ? കൊളസ്‌ട്രോളും ഉയരുമോ? പുതിയ പഠനത്തിലെ കണ്ടെത്തലുകൾ ശ്രദ്ധേയം!

മുഴുപ്പാൽ, ചീസ് കഴിച്ചാൽ തടി കൂടുമോ? കൊളസ്‌ട്രോളും ഉയരുമോ? പുതിയ പഠനത്തിലെ കണ്ടെത്തലുകൾ ശ്രദ്ധേയം!

ഹൃദയാരോഗ്യം സംരക്ഷിക്കാൻ കൊഴുപ്പ് കൂടിയ പാലും ചീസും ഒഴിവാക്കുന്നവർക്കായി പുതിയ പഠനത്തിന്റെ കണ്ടെത്തൽ ശ്രദ്ധേയമാകുന്നു. മുഴുവൻ കൊഴുപ്പുള്ള പാൽ, ചീസ്, തൈര് തുടങ്ങിയ പാലുൽപ്പന്നങ്ങൾ കഴിച്ചതുകൊണ്ട് ശരീരഭാരമോ കൊഴുപ്പോ വർധിക്കുന്നില്ലെന്നും കൊളസ്‌ട്രോൾ, രക്തത്തിലെ കൊഴുപ്പ്, രക്തത്തിലെ പഞ്ചസാര എന്നിവയിൽ മോശം മാറ്റങ്ങളുണ്ടാകുന്നില്ലെന്നുമാണ് പഠനം വ്യക്തമാക്കുന്നത്. കാനഡയിലെ ടൊറന്റോ സർവകലാശാലയിലെ ഗവേഷകർ അമിതഭാരമുള്ള 74 പേരിൽ 12 ആഴ്ച നടത്തിയ പരീക്ഷണത്തിലാണ് ഈ കണ്ടെത്തൽ.

പഠനത്തിൽ പങ്കെടുത്തവരെ മൂന്ന് ഗ്രൂപ്പുകളായി തിരിച്ചു. ഒരു വിഭാഗം വളരെ കുറഞ്ഞ അളവിൽ പാലുൽപ്പന്നങ്ങൾ ഉൾപ്പെടുത്തിയ ഭക്ഷണക്രമം പിന്തുടർന്നപ്പോൾ മറ്റ് രണ്ട് വിഭാഗങ്ങൾ ദിവസവും മൂന്ന് തവണ മുഴുവൻ കൊഴുപ്പുള്ള പാലുൽപ്പന്നങ്ങൾ കഴിച്ചു. 12 ആഴ്ചയ്ക്കുശേഷം പാലുൽപ്പന്നങ്ങൾ കഴിച്ചവരിൽ ശരീരഭാരത്തിലോ ശരീരത്തിലെ കൊഴുപ്പിന്റെ അളവിലോ പ്രതികൂല മാറ്റങ്ങളുണ്ടായില്ല. മാത്രമല്ല, അവരുടെ ഭക്ഷണത്തിൽ കാൽസ്യം, പ്രോട്ടീൻ, വിറ്റാമിൻ ഡി എന്നിവയുടെ അളവ് വർധിക്കുകയും ചില വിഭാഗങ്ങളിൽ രക്തസമ്മർദം കുറയുകയും ചെയ്തു. പാലിലെ കൊഴുപ്പിനൊപ്പം അടങ്ങിയിരിക്കുന്ന കസീൻ, വേ പ്രോട്ടീനുകൾ ശരീരത്തിൽ പ്രവർത്തിക്കുന്ന രീതിയും ഇതിന് കാരണമായേക്കാമെന്നാണ് ഗവേഷകരുടെ വിലയിരുത്തൽ.

എന്നാൽ മുഴുവൻ കൊഴുപ്പുള്ള പാലുൽപ്പന്നങ്ങൾ ഹൃദ്രോഗസാധ്യതയോ പ്രമേഹസാധ്യതയോ ദീർഘകാലാടിസ്ഥാനത്തിൽ കുറയ്ക്കുമെന്ന് ഈ പഠനം തെളിയിക്കുന്നില്ല. വെറും 74 പേരിൽ മൂന്ന് മാസം മാത്രം നടത്തിയ പഠനമായതിനാൽ കൂടുതൽ ദീർഘകാല ഗവേഷണങ്ങൾ ആവശ്യമാണ്. കനേഡിയൻ ക്ഷീരോൽപ്പന്ന ഗവേഷണ പദ്ധതിയുടെ ഭാഗിക സാമ്പത്തിക സഹായത്തോടെയാണ് പഠനം നടന്നതെന്ന കാര്യവും ശ്രദ്ധേയമാണ്. എന്തായാലും കൊഴുപ്പ് കൂടിയ പാലുൽപ്പന്നങ്ങൾ ആരോഗ്യത്തിന് ദോഷകരമാണെന്ന ദീർഘകാല ധാരണയെ വീണ്ടും പരിശോധിക്കാൻ പ്രേരിപ്പിക്കുന്നതാണ് പുതിയ കണ്ടെത്തൽ.

Latest

- Advertisement -Newspaper WordPress Theme
- Advertisement -Newspaper WordPress Theme

Latest article

More article

- Advertisement -Newspaper WordPress Theme