- Advertisement -Newspaper WordPress Theme
HEALTHനടത്തം കുറയുന്നു, ഓർമ്മക്കുറവും ഉണ്ടോ? വാർധക്യമെന്ന് കരുതി തള്ളരുത്; ഗുരുതര മസ്തിഷ്കരോഗത്തിന്റെ മുന്നറിയിപ്പാകാം!

നടത്തം കുറയുന്നു, ഓർമ്മക്കുറവും ഉണ്ടോ? വാർധക്യമെന്ന് കരുതി തള്ളരുത്; ഗുരുതര മസ്തിഷ്കരോഗത്തിന്റെ മുന്നറിയിപ്പാകാം!

പ്രായമാകുമ്പോൾ അച്ഛനോ അമ്മയോ പഴയതുപോലെ നടക്കാതിരിക്കുകയോ, ചെറിയ കാര്യങ്ങൾ മറന്നുപോവുകയോ, മൂത്രം നിയന്ത്രിക്കാൻ ബുദ്ധിമുട്ട് നേരിടുകയോ ചെയ്യുമ്പോൾ നമ്മൾ പലപ്പോഴും അതൊക്കെ വാർധക്യത്തിന്റെ സ്വാഭാവിക ലക്ഷണങ്ങളായി കരുതി അവഗണിക്കാറുണ്ട്. എന്നാൽ ഇത്തരം ലക്ഷണങ്ങൾക്ക് പിന്നിൽ ചികിത്സയിലൂടെ മാറ്റിയെടുക്കാൻ കഴിയുന്ന ‘നോർമൽ പ്രഷർ ഹൈഡ്രോസെഫാലസ്’എന്ന മസ്തിഷ്കരോഗമാകാൻ സാധ്യതയുണ്ടെന്ന് വിദഗ്ധർ വ്യക്തമാക്കുന്നു.

തലച്ചോറിനെയും സുഷുമ്നാനാഡിയെയും സംരക്ഷിക്കുന്ന സെറിബ്രോസ്പൈനൽ ഫ്ലൂയിഡ് എന്ന ദ്രാവകത്തിന്റെ സഞ്ചാരത്തിലോ ആഗിരണത്തിലോ ഉണ്ടാകുന്ന തകരാറുകൾ മൂലം തലച്ചോറിലെ അറകൾ വികസിക്കുന്നതാണ് ഈ അവസ്ഥയ്ക്ക് കാരണം. പ്രധാനമായും 60 വയസ്സിനു മുകളിലുള്ളവരിലാണ് ഈ രോഗം കണ്ടുവരുന്നത്

ശ്രദ്ധിക്കേണ്ട പ്രധാന ലക്ഷണങ്ങൾ

നടത്തത്തിലെ മാറ്റങ്ങൾ: കാലുകൾ നിലത്ത് ഒട്ടിപ്പിടിച്ചതുപോലെ തോന്നുക, ചെറിയ ചുവടുകൾ വെക്കുക, നടക്കാൻ തുടങ്ങാൻ പ്രയാസപ്പെടുക, തിരിയുമ്പോൾ ബാലൻസ് നഷ്ടപ്പെടുക.

ഓർമ്മശക്തിയിലും ചിന്താശേഷിയിലും കുറവ്: കാര്യങ്ങൾ ഓർത്തെടുക്കാനുള്ള ബുദ്ധിമുട്ട്, തീരുമാനമെടുക്കാൻ കൂടുതൽ സമയമെടുക്കുക, ശ്രദ്ധക്കുറവ്.

മൂത്രനിയന്ത്രണത്തിലെ തകരാറുകൾ: ഇടയ്ക്കിടെ മൂത്രമൊഴിക്കേണ്ടിവരുക, പെട്ടെന്ന് മൂത്രശങ്ക അനുഭവപ്പെടുക.

ഈ ലക്ഷണങ്ങളെല്ലാം ഒരേസമയം ഉണ്ടാകണമെന്നില്ല. പാർക്കിൻസൺസ്, അൽഷിമേഴ്സ് രോഗങ്ങളുമായി ചില സാമ്യതകൾ ഉണ്ടെങ്കിലും, ഈ രോഗത്തിൽ ആദ്യം പ്രകടമാകുന്നത് നടത്തത്തിലെ മാറ്റങ്ങളാണ്.

രോഗനിർണ്ണയവും ചികിത്സയും

തലച്ചോറിന്റെ എം.ആർ.ഐ അല്ലെങ്കിൽ സി.ടി. സ്കാൻ പരിശോധനയിലൂടെയും, ചിലരിൽ നടത്തുന്ന ‘സി.എസ്.എഫ്. ടാപ്പ് ടെസ്റ്റ്’ വഴിയും രോഗം തിരിച്ചറിയാൻ സാധിക്കും. ഷണ്ട് ശസ്ത്രക്രിയ വഴി അധികമുള്ള മസ്തിഷ്കദ്രാവകം വയറിനുള്ളിലേക്ക് തിരിച്ചുവിട്ട് ആഗിരണം ചെയ്യാൻ സഹായിക്കുന്നതിലൂടെ രോഗികളിൽ ഗണ്യമായ പുരോഗതി ഉണ്ടാക്കാൻ സാധിക്കും. പ്രത്യേകിച്ച് നടത്തത്തിലുള്ള ബുദ്ധിമുട്ടുകൾക്ക് മികച്ച മാറ്റം ലഭിക്കാറുണ്ട്.

പ്രായമാകുന്നതിന്റെ ഭാഗമായുള്ള സ്വാഭാവിക മാറ്റങ്ങളെന്ന് കരുതി ഇത്തരം ലക്ഷണങ്ങളെ അവഗണിക്കുന്നത് വലിയ തിരിച്ചടിയാകും. വീട്ടിലോ പരിസരത്തോ ഇത്തരത്തിലുള്ള ബുദ്ധിമുട്ടുകൾ അനുഭവിക്കുന്ന മുതിർന്നവരുണ്ടെങ്കിൽ അവരെ എത്രയും പെട്ടെന്ന് ഒരു നാഡീരോഗവിദഗ്ധന്റെയോ ന്യൂറോസർജന്റെയോ അടുത്ത് എത്തിച്ച് വിദഗ്ധ പരിശോധനയും ചികിത്സയും ഉറപ്പാക്കേണ്ടതാണ്.

Latest

- Advertisement -Newspaper WordPress Theme
- Advertisement -Newspaper WordPress Theme

Latest article

More article

- Advertisement -Newspaper WordPress Theme