മുലപ്പാല് വര്ദ്ധിപ്പിക്കാന് ഏറ്റവും ലളിതമായി ചെയ്യാവുന്ന ഒരു കാര്യം കുഞ്ഞിന് മുല കൊടുത്ത് കൊണ്ടിരിക്കുക എന്നതാണ്. മുല കൊടുക്കുമ്പോള് ഞരമ്പുകള് കൂടുതല് ഉത്തേജിപ്പിക്കപ്പെട്ട് കൂടുതല് കൂടുതല് പാലുല്പ്പാദനം നടക്കുന്നു. ഓരോ തവണ കുഞ്ഞ് പാലു കുടിച്ച് കഴിയുമ്പോള് ശരീരം വീണ്ടും പാല് ഉല്പ്പാദിപ്പിക്കാന് തുടങ്ങുന്നു. ഈ പ്രക്രിയ നിരന്തരം നടക്കുകയും കുഞ്ഞിന് ധാരാളം പാല് കിട്ടുകയും ചെയ്യുന്നു. പാലുല്പ്പാദനം കൂട്ടാനുള്ള ഏറ്റവും ലളിതമായ മാര്ഗ്ഗം ഇതാണ്.ഈ പ്രക്രിയ കൊണ്ട് കുഞ്ഞിന് ആവശ്യമുള്ളത്ര പാലു കിട്ടുന്നില്ലെന്ന സംശയം അമ്മക്കുണ്ടായാല് പാലുല്പ്പാദനം വര്ദ്ധിക്കാന് സഹായിക്കുന്ന ഭക്ഷണം കഴിക്കാം. പാലുല്പ്പാദനം വര്ദ്ധിക്കാന് സഹായിക്കുന്ന ഭക്ഷണങ്ങളെ ഗാലക്റ്റഗോഗ്സ് എന്നു പറയുന്നു. ഈ ഭക്ഷണങ്ങള് പാല് വര്ദ്ധിപ്പിക്കുന്നതിനു പുറമെ അമ്മയുടെ ആരോഗ്യം മെച്ചപ്പെടുത്തുകയും ചെയ്യുന്നു.
ഓട്ട്മീല്
പ്രസവശേഷം ഉണ്ടാകുന്ന പ്രമേഹം നിയന്ത്രിക്കാന് ഓട്ട്മീല് ഉത്തമമാണ്. ഇവയില് ധാരാളം ഫൈബര് അടങ്ങിയിട്ടുണ്ട്. അവ ദഹനത്തിനു നല്ലതാണ്. ഓട്ട്മീല് അമ്മക്ക് ധാരാളം ഊര്ജ്ജം പ്രദാനം ചെയ്യുന്നു. പ്രഭാതഭക്ഷണമായി ഒരു ബൌള് ഓട്ട്മീല് കഴിക്കുക.
പച്ചപപ്പായ
പപ്പായ ഒരു പ്രകൃതിദത്ത ഉറക്കമരുന്ന് ആണ്. ഇത് അമ്മയെ നന്നായി റിലാക്സ് ചെയ്യാനും ഉറങ്ങാനും സഹായിക്കും. പച്ചപപ്പായ കറി വെച്ച് കഴിക്കാം
പച്ചച്ചീരയും ബീറ്റ്റൂട്ട് ഇലകളും
ഇതില് ധാരാളം അയേണ്, കാല്സ്യം, ഫോളിക്ക് ആസിഡ് എന്നിവയടങ്ങിയിരിക്കുന്നു. രക്തക്കുറവുള്ള അമ്മമാര്ക്ക് ഇത് വളരെ നല്ലതാണ്. ഈ ഇലകള്ക്ക് ശരീരത്തിലെ വിഷാംശങ്ങള് പുറന്തള്ളാനുള്ള കഴിവുണ്ട്. ഇതിലടങ്ങിയിരിക്കുന്ന രാസവസ്തുക്കള്ക്ക് ബ്രെസ്റ്റ് കാന്സര് തടയാന് കഴിയും. ഈ ഇലകള് സൂപ്പ് വെച്ച് കഴിക്കാം. ചപ്പാത്തി മാവില് ചേര്ത്ത് പറാത്ത ഉണ്ടാക്കി കഴിക്കാം. പച്ചച്ചീര മിതമായ അളവില് കഴിക്കാന് ശ്രദ്ധിക്കണം അല്ലെങ്കില് കുഞ്ഞിന് വയറിളക്കം ഉണ്ടാകും
വെളുത്തുള്ളി
മുലപ്പാല് വര്ദ്ധിപ്പിക്കാന് ഏറ്റവും നല്ലതാണ് വെളുത്തുള്ളി. ഇതിലടങ്ങിയിരിക്കുന്ന രാസപദാര്ത്ഥങ്ങള് മുലപ്പാലുണ്ടാക്കാന് സഹായിക്കുന്നു. വെളുത്തുള്ളി കാന്സറിനെ തടയുന്നു. ഇത് സൂപ്പിലും കറികളിലും ചേര്ത്ത് കഴിക്കാം. ഒരുപിടി വെളുത്തുള്ളി അല്ലിയെടുത്ത് നെയ്യില് വറുക്കുക. ഇത് ചോറില് ചേര്ത്ത് കഴിക്കാം. ഒന്നിടവിട്ട ദിവസങ്ങളില്.
കറുത്ത എള്ള്
കറുത്ത എള്ളില് ധാരാളം കാല്സ്യം അടങ്ങിയിരിക്കുന്നു. എള്ള് മുലപ്പാല് വര്ദ്ധിപ്പിക്കുന്നതിനുത്തമമാണ്. എള്ള്, പഞ്ചസാര, ബദാം എന്നിവ പാലിലടിച്ച് കഴിക്കുക. മിതമായ അളവില് കഴിക്കണം.
കാരറ്റ്
മുലപ്പാലുണ്ടാവാന് കാരറ്റ് വളരെ നല്ലതാണ്. കാരട്ടില് ധാരാളം വൈറ്റമിന് എ അടങ്ങിയിരിക്കുന്നു. ഇത് മുലപ്പാലിന്റെ ഗുണം വര്ദ്ധിപ്പിക്കുന്നു. പ്രഭാത ഭക്ഷണത്തിന്റെ കൂടെയോ ഉച്ച ഭക്ഷണത്തിന്റെ കൂടെയോ ഒരു ഗ്ലാസ്സ് കാരട്ട് ജ്യൂസ് കഴിക്കുക. കാരറ്റ് പച്ചക്ക് കഴിക്കാം. അല്ലെങ്കില് സൂപ്പ് ആക്കി കഴിക്കാം. തണുപ്പ് കാലത്ത് കാരട്ട് പ്യൂരി പാലും പഞ്ചസാരയും ചേര്ത്ത് കഴിക്കാം.
വെള്ളവും ജ്യൂസും
ഇവ മുലപ്പാലിന്റെ അളവ് വര്ദ്ധിപ്പിക്കുന്നു. ഓരോ തവണയും കൊടുക്കുന്ന പാലിന്റെ അളവ് കൂടുതലായിരിക്കും. നിര്ജ്ജലീകരണം തടയുന്നു. കുഞ്ഞിന് പാലു കൊടുക്കുന്നതിനു മുന്പ് ഒരു ഗ്ലാസ്സ് വെള്ളം കുടിക്കാന് ഓര്മ്മ വെക്കുക.
പെരുഞ്ചീരകം
ഇത് മുലപ്പാലിന്റെ അളവ് വര്ദ്ധിപ്പിക്കാന് സഹായിക്കുന്നു. പെരുഞ്ചീരകം ഒരു നല്ല ദഹനസഹായിയാണ്. ഇത് കുഞ്ഞുങ്ങള്ക്കുണ്ടാകുന്ന വയറുവേദന കുറക്കുന്നു. ഇവ കറികളില് ചേര്ത്ത് കഴിക്കാം. ചായയില് ചേര്ക്കാം. ഒരു ടീസ്പൂണ് പെരുഞ്ചീരകം പാലില് ചേര്ത്ത് തിളപ്പിച്ച് കുടിക്കുക. ഭക്ഷണത്തിനു ശേഷം ഇത് വായിലിട്ട് ചവക്കാം. വായിലെ ദുര്ഗന്ധം മാറ്റും. പാല് ഉല്പ്പാദനത്തിനു സഹായിക്കുകയും ചെയ്യും.
ഉലുവ
മുലപ്പാലുണ്ടാവാന് ഏറ്റവും സഹായകമായ ഒരു ഭക്ഷണമാണ് ഉലുവ. മുളപ്പിച്ച ഉലുവ ചവച്ച് തിന്നു പാലു കുടിക്കുന്നത് പ്രസവശേഷമുണ്ടാകുന്ന മലബന്ധത്തിനു ഉത്തമമാണ്. കറികളില് കടുക് വറുത്തിടുമ്പോള് ഉലുവ ചേര്ക്കാം. ദോശക്ക് അരക്കുമ്പോള് ഉലുവ ചേര്ത്തരക്കുന്നത് നല്ലതാണ്.
