മഴക്കാലം വരുമ്പോൾ വീട്ടിൽ പാറ്റകളും പല്ലികളും പെരുകുന്നത് സാധാരണമാണ്. ഇവയെ തുരത്താൻ രാസവസ്തുക്കൾ ഉപയോഗിക്കുന്നവർ അറിയുക, പ്രകൃതിദത്തമായ മാർഗ്ഗങ്ങളിലൂടെ എളുപ്പത്തിൽ ഈ ശല്യം ഒഴിവാക്കാം. നിങ്ങളുടെ അടുക്കളയിൽ എപ്പോഴും ലഭ്യമായ ചില സാധനങ്ങൾ ഉപയോഗിച്ച് ഈ കീടങ്ങളെ എന്നെന്നേക്കുമായി അകറ്റിനിർത്താൻ സാധിക്കും. എങ്ങനെയാണെന്ന് നോക്കാം.
കീടങ്ങൾക്ക് പെറ്റുപെരുകാൻ മഴക്കാലത്തെ ഈർപ്പമുള്ള അന്തരീക്ഷം ഏറ്റവും അനുയോജ്യമായ സാഹചര്യമൊരുക്കുന്നുണ്ട്. വീടിൻ്റെ ഓരോ മൂലയിലും ഇവ കൂടുകെട്ടി വീടിൻ്റെ സൗന്ദര്യവും വൃത്തിയും നശിപ്പിക്കുന്നു. ദോഷകരമായ രാസവസ്തുക്കൾ ഉപയോഗിക്കുന്നതിന് പകരം, നമ്മുടെ വീട്ടിൽത്തന്നെയുള്ള ലളിതമായ ചേരുവകൾ ഉപയോഗിച്ച് ഈ പ്രശ്നം പരിഹരിക്കാം.
പല്ലിയെയും പാറ്റയെയും തുരത്താൻ 7 വഴികൾ
കർപ്പൂരവും ഗ്രാമ്പൂവും: 5-6 കർപ്പൂര കഷണങ്ങൾ പൊടിച്ച് വെള്ളത്തിൽ കലർത്തുക. ഇതിലേക്ക് ഏതാനും തുള്ളി ഗ്രാമ്പൂ എണ്ണ ചേർത്ത് തറ തുടയ്ക്കുക. കർപ്പൂരത്തിന്റെയും ഗ്രാമ്പൂവിൻ്റെയും രൂക്ഷഗന്ധം ഈ കീടങ്ങളെ വീടിനുള്ളിൽനിന്ന് അകറ്റും. വീടിന്റെ മൂലകളിലും വാതിലുകൾക്ക് സമീപവും ഗ്രാമ്പൂ വെക്കുന്നതും ഫലപ്രദമാണ്.
ഉള്ളിയും വെളുത്തുള്ളിയും: ഉള്ളിയിൽ നിന്നും വെളുത്തുള്ളിയിൽ നിന്നും എടുത്ത നീര് വെള്ളത്തിൽ കലർത്തി വീടിന് ചുറ്റും തളിക്കുകയോ മോപ്പിംഗ് വെള്ളത്തിൽ ചേർക്കുകയോ ചെയ്യാം. അവയുടെ ശക്തമായ ഗന്ധം പല്ലികളെയും പാറ്റകളെയും അകറ്റിനിർത്താൻ സഹായിക്കും. ഫർണിച്ചറുകൾ, മൂലകൾ, പ്രവേശന കവാടങ്ങൾ എന്നിവിടങ്ങളിൽ ഈ ലായനി തളിക്കുന്നത് നല്ലതാണ്.
വിനാഗിരിയും ബേക്കിംഗ് സോഡയും: വൃത്തിയാക്കിയാലും വീണ്ടും വരുന്ന പാറ്റകളെയും പല്ലികളെയും തുരത്താൻ ഈ മിശ്രിതം സഹായിക്കും. മോപ്പിംഗ് വെള്ളത്തിൽ വിനാഗിരിയും ബേക്കിംഗ് സോഡയും ചേർത്ത് ഉപയോഗിക്കുക. ഈ മിശ്രിതത്തിൻ്റെ രൂക്ഷമായ മണം കീടങ്ങൾ വീട് വിട്ടുപോകാൻ കാരണമാകും.
ഉപ്പും നാരങ്ങാനീരും: 4-5 ടേബിൾസ്പൂൺ ഉപ്പും രണ്ട് നാരങ്ങാനീരും മോപ്പിംഗ് വെള്ളത്തിൽ കലർത്തുക. ഈ ലായനി തറയിലും ചുമരുകളിലും ഫർണിച്ചറുകളിലും തളിക്കാം. മൂലകളിൽ ഒളിച്ചിരിക്കുന്ന പാറ്റകളെ തുരത്താൻ ഇത് വളരെ ഫലപ്രദമാണ്.
കറുവപ്പട്ട ഇല: പാറ്റകൾക്ക് കറുവപ്പട്ട ഇലയുടെ ഗന്ധം തീരെ ഇഷ്ടമല്ല. കുറച്ച് ഉണങ്ങിയ കറുവപ്പട്ട ഇലകൾ ചതച്ച് പാറ്റകൾ സാധാരണയായി ഒളിച്ചിരിക്കുന്ന അലമാരകളിലും ഷെൽഫുകളിലും വെക്കുക. ഈ ലളിതമായ മാർഗം അവയെ എളുപ്പത്തിൽ അകറ്റും.
പെപ്പർമിന്റ് ഓയിൽ: പെപ്പർമിന്റ് ഓയിലിലെ മെന്തോൾ സുഗന്ധം ഒരു പ്രകൃതിദത്ത കീടനാശിനിയാണ്. 10-15 തുള്ളി പെപ്പർമിന്റ് ഓയിൽ വെള്ളത്തിൽ കലർത്തി സ്പ്രേ കുപ്പിയിലാക്കി കീടങ്ങൾ വരുന്ന സ്ഥലങ്ങളിൽ തളിക്കുന്നത് ഫലപ്രദമാണ്.
കാപ്പിയും പുകയിലയും: കാപ്പിയും പുകയിലയും ചേർന്ന മിശ്രിതം പല്ലികൾക്ക് മാരകമാണ്. ഈ മിശ്രിതം ചെറിയ ഉരുളകളാക്കി ജനലുകൾക്കും വാതിലുകൾക്കും സമീപം വെച്ചാൽ പല്ലികളെ തുരത്താം. വളർത്തുമൃഗങ്ങളുള്ളവർ ഈ മാർഗം ശ്രദ്ധയോടെ ഉപയോഗിക്കണം.
ദോഷകരമായ രാസവസ്തുക്കൾ ഉപയോഗിക്കാതെ തന്നെ വീട്ടിൽ എളുപ്പത്തിൽ ലഭ്യമായ ഈ ചേരുവകൾ ഉപയോഗിച്ച് പാറ്റകളെയും പല്ലികളെയും അകറ്റിനിർത്താം. ഈ ലളിതമായ വഴികൾ നിങ്ങളുടെ വീടിനെ വൃത്തിയുള്ളതും കീടരഹിതവുമാക്കാൻ ഉറപ്പായും സഹായിക്കും.
