ചൂട് കാലം എത്തുന്നതോടെ വീടിനുള്ളിലും പുറത്തും ഒരുപോലെ അസഹനീയമായ ചൂടാണ് അനുഭവപ്പെടുന്നത്. ശരീരത്തിലെ ജലാംശം നഷ്ടപ്പെട്ട് നിർജ്ജലീകരണം സംഭവിക്കാനും കടുത്ത ക്ഷീണം അനുഭവപ്പെടാനും ഈ സമയം സാധ്യത കൂടുതലാണ്. മരുന്നുകളെ ആശ്രയിക്കുന്നതിനേക്കാൾ സ്വാഭാവികമായ ഭക്ഷണരീതിയിലൂടെ ശരീരത്തിലെ ചൂട് കുറയ്ക്കുന്നതാണ് ഏറ്റവും ഉചിതം. അതിനായി താഴെ പറയുന്ന ഭക്ഷണങ്ങൾ ഭക്ഷണക്രമത്തിൽ ഉൾപ്പെടുത്താം.
പുതിന: പുതിനയില ചേർത്ത വെള്ളം കുടിക്കുന്നത് ശരീരത്തിന് പെട്ടെന്ന് തണുപ്പ് ലഭിക്കാൻ സഹായിക്കുന്നു. ഇതിന് പുറമെ, ദഹനപ്രക്രിയ സുഗമമാക്കാനും വയറ് വീർക്കുന്നത് ഒഴിവാക്കാനും പുതിന മികച്ചതാണ്.
തണ്ണിമത്തൻ: വേനലിലെ ഏറ്റവും മികച്ച പഴങ്ങളിൽ ഒന്നാണ് തണ്ണിമത്തൻ. ഉയർന്ന ജലാംശം അടങ്ങിയിട്ടുള്ളതിനാൽ ശരീരത്തെ തണുപ്പിക്കാനും നിർജ്ജലീകരണം തടയാനും ഇത് ഏറെ ഫലപ്രദമാണ്.
വെള്ളരി: ധാരാളം വെള്ളം അടങ്ങിയ വെള്ളരി വേനൽക്കാലത്ത് നിർബന്ധമായും കഴിക്കേണ്ട ഒന്നാണ്. പൊട്ടാസ്യം, മഗ്നീഷ്യം, വിറ്റാമിൻ കെ എന്നിവയാൽ സമ്പന്നമായ വെള്ളരി ശരീരത്തെ ഉള്ളിൽ നിന്ന് തണുപ്പിക്കുന്നു.
തൈര്: ദഹനത്തിന് സഹായിക്കുന്ന പ്രോബയോട്ടിക് ഗുണങ്ങളാൽ സമ്പന്നമാണ് തൈര്. വേനൽക്കാലത്ത് തൈരോ മോരോ ഭക്ഷണത്തിന്റെ ഭാഗമാക്കുന്നത് കുടലിന്റെ ആരോഗ്യം മെച്ചപ്പെടുത്താനും ശരീരത്തിന് കുളിർമ നൽകാനും സഹായിക്കും.
ഇളനീർ: ശരീരത്തിന് ആവശ്യമായ ഇലക്ട്രോലൈറ്റുകളുടെ (പൊട്ടാസ്യം, സോഡിയം, മഗ്നീഷ്യം) കലവറയാണ് ഇളനീർ. ചൂടുസമയത്ത് ഇളനീർ കുടിക്കുന്നത് ശരീരത്തെ എപ്പോഴും ഹൈഡ്രേറ്റായി നിലനിർത്താൻ സഹായിക്കും.
