കൊളസ്ട്രോൾ കുറയ്ക്കാൻ മരുന്നുകളെ മാത്രം ആശ്രയിക്കാതെ ഭക്ഷണക്രമത്തിൽ വരുത്താവുന്ന മാറ്റങ്ങളെക്കുറിച്ച് അമേരിക്കൻ ഡോക്ടറായ ഡോ. സൂദ് പറഞ്ഞിട്ടുണ്ട്. ഹൃദയാരോഗ്യം മെച്ചപ്പെടുത്തുന്നതിനും ചീത്ത കൊളസ്ട്രോൾ പ്രകൃതിദത്തമായി കുറയ്ക്കുന്നതിനും സഹായിക്കുന്ന 5 കാര്യങ്ങളെക്കുറിച്ചാണ് അദ്ദേഹം ഇൻസ്റ്റഗ്രാമിൽ പോസ്റ്റ് ചെയ്ത വീഡിയോയിൽ വിശദീകരിച്ചത്.
1. സൈലിയം ഹസ്ക്
നാരുകളാൽ സമ്പന്നമായ സൈലിയം ഹസ്ക് കുടലിൽ വെച്ച് കൊളസ്ട്രോളിനെ ആഗിരണം ചെയ്യുകയും ശരീരത്തിൽ നിന്ന് പുറന്തള്ളാൻ സഹായിക്കുകയും ചെയ്യുന്നു. ദിവസവും ഏകദേശം 10 ഗ്രാം സൈലിയം ഹസ്ക് കഴിക്കുന്നത് ചീത്ത കൊളസ്ട്രോൾ 6 മുതൽ 7 ശതമാനം വരെ കുറയ്ക്കാൻ സഹായിക്കുമെന്ന് പഠനങ്ങൾ സൂചിപ്പിക്കുന്നു
2. പ്ലാന്റ് സ്റ്റെറോളുകൾ
സസ്യങ്ങളിൽ കാണപ്പെടുന്ന ഒരു ഘടകമാണ് പ്ലാന്റ് സ്റ്റെറോളുകൾ. ഇവയുടെ ഘടന കൊളസ്ട്രോളിന് സമാനമായതിനാൽ, കുടലിൽ വെച്ച് കൊളസ്ട്രോൾ രക്തത്തിലേക്ക് കലരുന്നത് തടയാൻ ഇവയ്ക്ക് സാധിക്കും. ദിവസവും 0.6 മുതൽ 3.3 ഗ്രാം വരെ ഇവ അടങ്ങിയ ഭക്ഷണങ്ങൾ കഴിക്കുന്നത് എൽഡിഎൽ കൊളസ്ട്രോൾ 6 മുതൽ 12 ശതമാനം വരെ കുറയ്ക്കാൻ സഹായിക്കും.
3. ഒമേഗ-3 ഫാറ്റി ആസിഡുകൾ
ഒമേഗ-3 ഫാറ്റി ആസിഡുകൾ ട്രൈഗ്ലിസറൈഡുകളുടെ അളവ് കുറയ്ക്കാൻ മികച്ചതാണ്. ഇത് കരൾ ഉത്പാദിപ്പിക്കുന്ന ചീത്ത കൊളസ്ട്രോളിന്റെ അളവ് നിയന്ത്രിക്കുകയും ഹൃദയാരോഗ്യം സംരക്ഷിക്കുകയും ചെയ്യുന്നു.
4. വെളുത്തുള്ളി
വെളുത്തുള്ളിയിലെ അലിസിൻ എന്ന ഘടകം കരളിലെ കൊളസ്ട്രോൾ നിർമ്മാണത്തെ തടയുന്നു. കൊളസ്ട്രോൾ കൂടുതലുള്ളവർ വെളുത്തുള്ളി പതിവായി ഭക്ഷണത്തിൽ ഉൾപ്പെടുത്തുന്നത് ഗുണകരമാണ്.
5. ഗ്രീൻ ടീ
ഗ്രീൻ ടീയിലടങ്ങിയിരിക്കുന്ന കാറ്റെച്ചിനുകൾ എന്ന ആന്റിഓക്സിഡന്റുകൾ ശരീരത്തിലെ കൊളസ്ട്രോൾ ആഗിരണം കുറയ്ക്കുന്നു
