ചര്മ്മം നല്ലതാക്കി നിലനിര്ത്തുവാന് ഏറ്റവും സഹായിക്കുന്നത് സോപ്പാണോ അതോ ബോഡിവാഷാണോ? മിക്കവരും സോപ്പായിരിക്കും ഉപയോഗിക്കുന്നുണ്ടാവുക. കാരണം, സോപ്പ് ഉപയോഗിക്കുന്നതിലൂടെ സ്കിന് നല്ല ക്ലിയര് ആയി കിട്ടുന്നു എന്നാണ് പലരും വിചാരിക്കുന്നത്. മാത്രവുമല്ല, ലോഷന് വേഗം തീരുവാനും എന്നാല് സോപ്പ് കുറേകാലം നിലനില്ക്കുകയും ചെയ്യുന്നു. എന്നാല്, വരണ്ട ചര്മ്മമുള്ളവര്ക്ക് ഏറ്റവും നല്ലത് എല്ലായ്പ്പോഴും ബോഡിവാഷാണ് എന്നുതന്നെ പറയാം.
സോപ്പായാലും ബോഡിവാഷായാലും രണ്ടും ചെയ്യുന്നത് ഒരേ പ്രവര്ത്തി തന്നെയാണ്. അതായത്, ചര്മ്മത്തിന് മുകളിലുള്ള അഴുക്കെല്ലാം നീക്കം ചെയ്യുക എന്നതാണ് ഇവ ചെയ്യുന്നത്. എന്നാല്, സോപ്പ് ചര്മ്മത്തിലെ അഴുക്ക് നീക്കം ചെയ്യുന്നതിനോടൊപ്പം തന്നെ ചര്മ്മത്തിന്റെ സ്വാഭാവികത നഷ്ടപ്പെടുത്തി ഡ്രൈ ആക്കി മാറ്റുന്നു. എന്നാല് ബോഡിവാഷ് ക്ലീന് ആക്കുന്നതിനോടൊപ്പം ചര്മ്മം മോയ്സ്ച്വറാക്കി നിലനിര്ത്തുവാനും സഹായിക്കുന്നു. കൂടാതെ സോപ്പ് ഉപയോഗിക്കുന്നതിലൂടെ ചര്മ്മത്തില് വരള്ച്ച മാത്രമല്ല, ചര്മ്മത്തില് മൊരി ഉണ്ടാകുന്നതിനും ചര്മ്മം വിണ്ടു കീറുന്നതിനും ഇത് കാരണമാകുന്നുണ്ട്.
ബോഡിവാഷ് ഉപയോഗിക്കേണ്ടത് എപ്പോള് ?
സ്കിന് കുളിച്ചതിനുശേഷം നന്നായി വരണ്ടുപോകുന്നതായി തോന്നുന്നുണ്ടെങ്കില് ഇതിന് സോപ്പിനു പകരം ബോഡിവാഷ് ഉപയോഗിക്കാവുന്നതാണ്. ഇത് ഉപയോഗിക്കുന്നതിലൂടെ ശരീരം ഈര്പ്പമുള്ളതാക്കി നിലനിര്ത്തുവാനും സഹായിക്കും. അതേപോലെ തന്നെ സോറിയാസീസ് പോലുള്ള ചര്മ്മ രോഗങ്ങള് ഉള്ളവരും ബോഡിവാഷ് ഉപയോഗിക്കുന്നതാണ് നല്ലത്.
സോപ്പിന്റെ ഗുണങ്ങള്
ബോഡി വാഷിനേക്കാള് എന്തുകൊണ്ടും കുറച്ചുംകൂടെ പ്രകൃതിക്ക് ദോഷം ചെയ്യാത്തത് സോപ്പാണ്. അതേപോലെ പ്രകൃതിദത്തമായ സോപ്പുകള് ഉപയോഗിക്കുന്നതിലൂടെ സ്കിന് അലര്ജികള് കുറയ്ക്കുവാനും സാധിക്കും. അതേപോലെ സോപ്പ് തിരഞ്ഞെടുക്കുമ്പോള് അതില് ഗ്ലിസറിന്, കോക്കനട്ട് ഓയില് എന്നിവയെല്ലാം ധാരാളം അടങ്ങിയിട്ടുണ്ടെങ്കില് അത് ഉപയോഗിക്കുന്നത് നല്ലതാണ്. പ്രത്യേകിച്ച് ബേബി സോപ്പുകള് ഉപയോഗിക്കുന്നത് ചര്മ്മം വരണ്ടതാക്കാതെ സംരക്ഷിക്കുന്നതിന് സഹായിക്കും.
ഒഴിവാക്കേണ്ടവ ഏതെല്ലാം?
നല്ലപോലെ ആന്റിബാക്ടീരിയല് ഏജന്റായി പ്രവര്ത്തിക്കുന്ന ട്രൈക്ലോസന് അടങ്ങിയ സോപ്പുകള് ഉപയോഗിക്കുന്നത് ചര്മ്മത്തിന് ഒട്ടും നല്ലതല്ല. ഇത് 2016 ല് എഫ്ഡിഎ നിരോധിച്ച സാധനമാണ്. അതേപോലെ തന്നെ ഇത്തരം പ്രോഡക്ടുകള് കൂടുതല് കാലം നിലനില്ക്കുന്നതിനായി പാരബീന് ചേര്ക്കുന്നതും സര്വ്വസാധാരണമാണ്. എന്നാല് ഈ കെമിക്കല് നമ്മളുടെ ചര്മ്മത്തിന്റെ ആരോഗ്യത്തേയും ഒപ്പം മറ്റു ആരോഗ്യപ്രശ്നങ്ങളും ഉണ്ടാക്കുന്നു. എന്നതാണ് യാഥാര്ത്ഥ്യം. അതേപോലെ നല്ല സുഗന്ധമുള്ള സോപ്പും ബോഡിവാഷുമെല്ലാം തിരഞ്ഞെടുക്കുവാന് ഇഷ്ടപ്പെടുന്ന നിരവധി ആളുകളുണ്ട്. എന്നാല് ഇത്തരത്തില് ചേര്ക്കുന്ന സുഗന്ധങ്ങള് ചര്മ്മം വരണ്ടതാക്കുന്നതിനും ചൊറിച്ചില് പോലുള്ള ബുദ്ധിമുട്ടുകള് ഉണ്ടാക്കുന്നതിനും കാരണമാകുന്നു.
സ്കിന് ഡ്രൈ ആകാതിരിക്കുവാന് ചെയ്യാവുന്നത്
കുളിക്കുന്നതിനു മുന്പ് നല്ല ഓയില് മസാജ് ചെയ്ത് കുളിക്കുന്നത് നല്ലതാണ്. അതേപോലെ സ്കിന് ഡ്രൈ ആകുന്ന പ്രശ്നമുള്ളവര്ക്ക് സോപ്പിനും ബോഡി വാഷിനും പകരം കടലപ്പൊടി, പയര്പൊടി എന്നിവയെല്ലാം ഉപയോഗിച്ച് കുളിക്കാവുന്നതാണ്. അതേപോലെ ഈഞ്ച തേച്ച് കുളിക്കുന്നതും നല്ലതാണ്.
കുളി കഴിഞ്ഞതിനു ശേഷം ദേഹത്ത് മോയ്സ്ച്വറൈസര് പുരട്ടുന്നതോ അല്ലെങ്കില് കറ്റാര്വാഴ ജെല് ഉപയോഗിക്കുന്നതുമെല്ലാം നല്ലതുതന്നെ. അതേപോലെ രാത്രി കിടക്കുന്നതിനുമുന്പ് ഗ്ലിസറിനും റോസ്വാട്ടറും ചേര്ത്ത് നല്ലൊരു മോയ്സ്ച്വറൈസര് ഉണ്ടാക്കി അത് മുഖത്തും ദേഹത്തും പുരട്ടാവുന്നതാണ്. അതേപോലെ സ്കിന് ഡ്രൈ ആക്കാത്ത സോപ്പുകളും ഉപയോഗിക്കാം. ഇതും ചര്മ്മ സംരക്ഷണത്തിന് സഹായക്കുന്ന ഘടകങ്ങളാണ്.