മനുഷ്യശരീരത്തിന്റെ സുഗമമായ പ്രവർത്തനത്തിന് ഭക്ഷണത്തോളം പ്രാധാന്യമുള്ള ഒന്നാണ് ശുദ്ധജലം. ശരീരത്തിലെ വിഷാംശങ്ങളെ പുറന്തള്ളാനും ഊർജം നിലനിർത്താനും കൃത്യമായ അളവിൽ വെള്ളം കുടിക്കേണ്ടത് അത്യാവശ്യമാണ്. എന്നാൽ നാം കുടിക്കുന്ന വെള്ളത്തിന്റെ ശുദ്ധിയോടൊപ്പം തന്നെ പ്രധാനമാണ് അത് സൂക്ഷിക്കുന്ന പാത്രങ്ങളുടെ ശുചിത്വവും.
പലപ്പോഴും യാത്രാവേളകളിലും ജോലിസ്ഥലത്തും വെള്ളം കൊണ്ടുപോകാൻ ഉപയോഗിക്കുന്ന കുപ്പികൾ വേണ്ടത്ര വൃത്തിയാക്കാറില്ല എന്നതാണ് വാസ്തവം. കുപ്പികൾക്കുള്ളിൽ രൂപപ്പെടുന്ന ബാക്ടീരിയകളും ഫംഗസുകളും ഗുരുതര ആരോഗ്യപ്രശ്നങ്ങൾക്ക് കാരണമായേക്കാം. വാട്ടർ ബോട്ടിലുകൾ വെട്ടിത്തിളങ്ങാനും അണുവിമുക്തമാക്കാനും വീട്ടിൽ തന്നെ ചെയ്യാവുന്ന ചില പൊടിക്കൈകൾ നോക്കാം.
ഡിഷ് വാഷും അരിയും ഉപയോഗിച്ചുള്ള വൃത്തിയാക്കൽ
കുപ്പിക്കകത്തെ പശപശപ്പും അഴുക്കും കളയാൻ അല്പം പച്ചരി കുപ്പിയിലിടുക. ഇതിനൊപ്പം ഡിഷ് വാഷ് ലിക്വിഡും ചൂടുവെള്ളവും ചേർത്ത് നന്നായി കുലുക്കുക. അരിയുടെ ഉരസൽ കുപ്പിയുടെ ഉൾഭാഗം തിളങ്ങാൻ സഹായിക്കും.
ചൂടുവെള്ളവും സോപ്പും
കുപ്പിയിൽ വലിയ അഴുക്കുകളില്ലെങ്കിൽ ഈ രീതി മതിയാകും.ബോട്ടിലിൽ ചൂടുവെള്ളം നിറച്ച് അതിൽ കുറച്ച് ഡിഷ് വാഷ് ലിക്വിഡ് ചേർക്കുക. നന്നായി കുലുക്കിയ ശേഷം ഒരു ബോട്ടിൽ ബ്രഷ് ഉപയോഗിച്ച് ഉരച്ചു കഴുകുന്നത് അഴുക്ക് വേഗത്തിൽ നീക്കം ചെയ്യാൻ സഹായിക്കും.
ഐസും ഉപ്പും
സ്റ്റീൽ കുപ്പി വൃത്തിയാക്കാൻ ഏറ്റവും അനുയോജ്യമായ മാർഗമാണിത്. പൊടിച്ച ഐസ് കട്ടകളും കല്ലുപ്പും കുപ്പിയിലിട്ട് നന്നായി കുലുക്കുക. കുലക്കത്തിൽ ഐസ് കട്ടകൾ കുപ്പിക്കുള്ളിൽ ഉരസി അഴുക്ക് നീക്കം ചെയ്യുമ്പോൾ കുപ്പി അണുവിമുക്തമാകും.
ഉപ്പും നാരങ്ങയും
നാരങ്ങാനീരും ഒരു ടേബിൾ സ്പൂൺ ഉപ്പും കുപ്പിയിലിട്ട് എല്ലാ ഭാഗത്തും എത്തുന്ന രീതിയിൽ നന്നായി ഒഴിക്കുക. ശേഷം ചൂടുവെള്ളം ഉപയോഗിച്ച് കഴുകിയാൽ കുപ്പിയിലെ ദുർഗന്ധം മാറി പുതുമ ലഭിക്കും.
ബേക്കിംഗ് സോഡ -വിനാഗിരി
കഠിനമായ അഴുക്കുകൾ നീക്കാൻ ഇവ മികച്ചതാണ്. ഒരു ടേബിൾ സ്പൂൺ ബേക്കിംഗ് സോഡ + 2 ടേബിൾ സ്പൂൺ വിനാഗിരി. ഇത് കുപ്പിയിൽ ഒഴിച്ച് പത്ത് മിനിട്ട് വച്ച ശേഷം ചൂടുവെള്ളം ഒഴിച്ച് കുലുക്കിയോ ബ്രഷ് ഉപയോഗിച്ചോ കഴുകുക. കുപ്പിയുടെ മൂലകളിൽ പറ്റിപ്പിടിച്ചിരിക്കുന്ന അഴുക്ക് ഇതിലൂടെ കളയാൻ സഹായിക്കും.
