തിളക്കമുള്ളതും ആരോഗ്യവുമുള്ള ചർമ്മത്തിനായി പുതിയ വഴികൾ തേടുന്നവർക്കിടയിൽ കൊറിയൻ ബ്യൂട്ടി ലോകത്തിൽ നിന്നുള്ള ‘ടൈഗർ ഗ്രാസ്’ ഇപ്പോൾ വലിയ ശ്രദ്ധ നേടുകയാണ്. ഈ വർഷത്തെ പ്രധാന സ്കിൻ കെയർ ഘടകങ്ങളിലൊന്നായി ടൈഗർ ഗ്രാസിനെ വിദഗ്ധർ വിലയിരുത്തുന്നു. ചർമ്മത്തിലെ ചുവന്ന തടിപ്പുകൾ കുറയ്ക്കാനും മൃദുത്വവും തിളക്കവും നൽകാനും ഇത് സഹായിക്കുമെന്ന് പഠനങ്ങൾ പറയുന്നു.
പരിക്കേറ്റ കടുവകൾ മുറിവുകൾ ഉണങ്ങാൻ ഈ ചെടിയിൽ ഉരുളുന്നതായുള്ള വിശ്വാസത്തിൽ നിന്നാണ് ഇതിന് ‘ടൈഗർ ഗ്രാസ്’ എന്ന പേര് ലഭിച്ചത്. ആയുർവേദത്തിലും ചൈനീസ് പരമ്പരാഗത ചികിത്സയിലും നൂറ്റാണ്ടുകളായി ഈ സസ്യം ഉപയോഗിച്ചു വരുന്നു.
ടൈഗർ ഗ്രാസ് ചർമ്മത്തിന് നിരവധി ഗുണങ്ങൾ നൽകുന്നു. ഇതിൽ അടങ്ങിയിരിക്കുന്ന ‘മഡെക്കാസോസൈഡ്’ എന്ന ഘടകം ചർമ്മകോശങ്ങളുടെ പുനരുദ്ധാരണത്തിന് സഹായിക്കുകയും മുറിവുകളും പാടുകളും വേഗത്തിൽ ഉണക്കുകയും ചെയ്യുന്നു. വെയിൽ കൊണ്ടോ അലർജി മൂലമോ ഉണ്ടാകുന്ന ചുവന്ന തടിപ്പുകളും നീറ്റലും കുറയ്ക്കാൻ ഇത് സഹായിക്കുന്നതിനാൽ സെൻസിറ്റീവ് ചർമ്മമുള്ളവർക്ക് ഏറെ പ്രയോജനകരമാണ്.
ചർമ്മത്തിലെ കൊളാജൻ വർദ്ധിപ്പിക്കുന്നതിനും ഇലാസ്തികത നിലനിർത്തുന്നതിനും ടൈഗർ ഗ്രാസ് സഹായിക്കുന്നു. ഇതുവഴി ചുളിവുകൾ പോലുള്ള പ്രായലക്ഷണങ്ങൾ കുറയ്ക്കാനും സാധിക്കും. കൂടാതെ ചർമ്മത്തിലെ ഈർപ്പം നിലനിർത്തുന്ന ഒരു സംരക്ഷണ പാളിയായി ഇത് പ്രവർത്തിക്കുകയും ചെയ്യുന്നു.
നിലവിൽ വിപണിയിലെ നിരവധി പ്രമുഖ ബ്യൂട്ടി ബ്രാൻഡുകൾ ടൈഗർ ഗ്രാസ് അടങ്ങിയ സീറങ്ങൾ, ക്രീമുകൾ, മാസ്കുകൾ, സൺസ്ക്രീമുകൾ എന്നിവ പുറത്തിറക്കിയിട്ടുണ്ട്. മുഖം വൃത്തിയാക്കിയ ശേഷം ടൈഗർ ഗ്രാസ് സീറം ഉപയോഗിക്കുന്നത് ചർമ്മത്തിന് പെട്ടെന്ന് ആശ്വാസം നൽകും. ‘സിസ ക്രീം’ എന്ന പേരിൽ ലഭിക്കുന്ന ടൈഗർ ഗ്രാസ് ക്രീമുകൾ രാത്രി ഉപയോഗിക്കുന്നത് കൂടുതൽ ഗുണകരമാണെന്ന് വിദഗ്ധർ പറയുന്നു.
എന്നാൽ, പുതിയ ഏതെങ്കിലും ഉൽപ്പന്നം ഉപയോഗിക്കുന്നതിന് മുൻപ് പാച്ച് ടെസ്റ്റ് നിർബന്ധമായും നടത്തണം. ചർമ്മരോഗ വിദഗ്ധരുടെ നിർദേശമനുസരിച്ച് മാത്രം ടൈഗർ ഗ്രാസ് ഉൽപ്പന്നങ്ങൾ ഉപയോഗിക്കുന്നത് സുരക്ഷിതമാണെന്നും അവർ ഓർമ്മിപ്പിക്കുന്നു
