മലിനമായ വെള്ളം കുടിക്കുന്നത് ശരീരത്തിന് ഗുരുതരമായ ആരോഗ്യ പ്രശ്നങ്ങൾ ഉണ്ടാക്കുമെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. ഛർദി, വയറിളക്കം, പനി, നിർജ്ജലീകരണം തുടങ്ങി നിരവധി അസുഖങ്ങൾക്ക് മലിനജലം കാരണമാകാം. മലിനജലം ഉപയോഗിക്കുമ്പോൾ ഉണ്ടാകുന്ന പ്രധാന ആരോഗ്യ പ്രശ്നങ്ങൾ എന്തൊക്കെയാണെന്ന് നോക്കാം.
മലിനമായ വെള്ളം കുടിച്ചാൽ ആദ്യം അനുഭവപ്പെടുന്നത് വയറിളക്കവും ഛർദിയുമാണ്. ഇത് ശരീരത്തിൽ വെള്ളക്കുറവിന് കാരണമാകുകയും കടുത്ത ക്ഷീണം, വയറുവേദന, പനി തുടങ്ങിയ ലക്ഷണങ്ങൾ ഉണ്ടാകുകയും ചെയ്യാം. പ്രത്യേകിച്ച് കുട്ടികൾക്കും മുതിർന്നവർക്കും ഇത് ഗുരുതരമായ പ്രശ്നങ്ങളിലേക്ക് നയിക്കാം.
കുട്ടികൾ, പ്രായമായവർ, ഗർഭിണികൾ, രോഗപ്രതിരോധശേഷി കുറഞ്ഞവർ തുടങ്ങിയവർ മലിനജലം കുടിക്കുമ്പോൾ ആരോഗ്യനില വേഗത്തിൽ വഷളാകാനുള്ള സാധ്യത കൂടുതലാണ്. ഇവർക്കു നിർജ്ജലീകരണവും ഗുരുതരമായ അണുബാധകളും ഉണ്ടാകാൻ സാധ്യതയുണ്ട്.
നീണ്ട കാലത്തേക്ക് മലിനമായ വെള്ളം കുടിക്കുന്നതിലൂടെ കരൾ, വൃക്ക എന്നിവയുടെ പ്രവർത്തനം തകരാറിലാകാം. ചില സാഹചര്യങ്ങളിൽ ഇത് കാൻസർ പോലുള്ള ദീർഘകാല രോഗങ്ങളിലേക്കും നയിക്കാമെന്ന് പഠനങ്ങൾ വ്യക്തമാക്കുന്നു.
മലിനജലം വഴി പടരുന്ന ജലജന്യ രോഗങ്ങളും വലിയ ഭീഷണിയാണ്. ചിലരിൽ വെള്ളം കുടിച്ച ഉടൻ തന്നെ രോഗലക്ഷണങ്ങൾ പ്രകടമാകുമ്പോൾ, മറ്റുചിലരിൽ ദിവസങ്ങളോ ആഴ്ചകളോ കഴിഞ്ഞാണ് അസുഖങ്ങൾ കണ്ടുതുടങ്ങുന്നത്.
അതുകൊണ്ട് തന്നെ കുടിക്കുന്ന വെള്ളം എപ്പോഴും തിളപ്പിച്ച് ആറിയതാണെന്ന് ഉറപ്പാക്കണം. വെള്ളം സൂക്ഷിക്കുന്ന പാത്രങ്ങളും പരിസരവും വൃത്തിയാക്കുകയും, ശുദ്ധജലം മാത്രം ഉപയോഗിക്കാനും ശ്രദ്ധിക്കണം. ചെറിയ അശ്രദ്ധ പോലും വലിയ ആരോഗ്യപ്രശ്നങ്ങൾക്ക് വഴിയൊരുക്കുമെന്നതാണ് ആരോഗ്യ വിദഗ്ധരുടെ മുന്നറിയിപ്പ്.
