കോവിഡ്-19 നെ നേരിടാൻ ഉപയോഗിച്ച mRNA സാങ്കേതികവിദ്യ ഇപ്പോൾ കാൻസർ ചികിത്സയിലും പ്രതീക്ഷ നൽകുകയാണ്. പുതിയ പഠനങ്ങൾ പ്രകാരം, mRNA വാക്സിൻ എടുത്ത കാൻസർ രോഗികൾ, വാക്സിൻ എടുക്കാത്തവരെക്കാൾ കൂടുതൽ കാലം ജീവിക്കുന്നതായി കണ്ടെത്തിയിരിക്കുന്നു.ഫ്ലോറിഡ യൂണിവേഴ്സിറ്റിയും ടെക്സസിലെ എംഡി ആൻഡേഴ്സൺ കാൻസർ സെന്ററും ചേർന്നാണ് ഈ പഠനം നടത്തിയത്. പഠന ഫലങ്ങൾ ബെർലിനിൽ നടന്ന യൂറോപ്യൻ സൊസൈറ്റി ഫോർ മെഡിക്കൽ ഓങ്കോളജി കോൺഗ്രസിൽ അവതരിപ്പിച്ചു. പിന്നീട് ‘നേച്ചർ’ ജേണലിലും പ്രസിദ്ധീകരിച്ചു.
ഗവേഷകർ ഇമ്മ്യൂണോതെറാപ്പി ആരംഭിക്കുന്നതിന് മുമ്പ് COVID-19 mRNA വാക്സിൻ എടുത്ത രോഗികളുടെ രേഖകൾ പരിശോധിച്ചു. വാക്സിൻ എടുക്കാത്ത രോഗികളുമായി താരതമ്യം ചെയ്തപ്പോൾ, വാക്സിൻ എടുത്തവർക്ക് അതിജീവന നിരക്ക് ഇരട്ടിയായി വർധിച്ചതായി കണ്ടെത്തി.ഉദാഹരണത്തിന്, ശ്വാസകോശ കാൻസർ രോഗികളിൽ വാക്സിൻ എടുത്തവർ ശരാശരി 37.3 മാസം ജീവിച്ചു, വാക്സിൻ എടുക്കാത്തവർ 20.6 മാസം മാത്രം.
പഠനം കാണിച്ചതനുസരിച്ച്, വാക്സിൻ രോഗപ്രതിരോധ സംവിധാനത്തെ ഉണർത്തി കാൻസർ കോശങ്ങളെ തിരിച്ചറിയാനും നശിപ്പിക്കാനും സഹായിക്കുന്നു.
മറ്റൊരു പഠനത്തിൽ, ത്വക്ക് കാൻസർ (മെലനോമ) രോഗികളിൽ വാക്സിൻ എടുത്തവർ മൂന്ന് വർഷത്തിലധികം ജീവിച്ചു, എടുക്കാത്തവർക്ക് രണ്ടുവർഷം മാത്രമാണ് ശരാശരി ആയുസ്.mRNA വാക്സിൻ പ്രവർത്തിക്കുന്നത് ജനിതക കോഡ് (മെസഞ്ചർ RNA) ഉപയോഗിച്ച് ശരീരത്തിന് പ്രതിരോധ ശക്തി നൽകുന്നതിലൂടെയാണ്. ഇത് വൈറസിനെയും കാൻസർ കോശങ്ങളെയും തിരിച്ചറിയാൻ ശരീരത്തെ സഹായിക്കുന്നു.
ശാസ്ത്രജ്ഞർ പറയുന്നത്, ഈ കണ്ടെത്തൽ ഓങ്കോളജി മേഖലയിൽ വിപ്ലവം സൃഷ്ടിക്കുമെന്ന്. കാൻസർ രോഗികൾക്ക് ഭാവിയിൽ ഒരു “സാർവത്രിക കാൻസർ വാക്സിൻ” ലഭിക്കാനാകും എന്നും പ്രതീക്ഷിക്കുന്നു. ഇപ്പോൾ ഗവേഷകർ മൂന്നാം ഘട്ട ക്ലിനിക്കൽ പരീക്ഷണം ആരംഭിച്ചിരിക്കുകയാണ്. ഈ പരീക്ഷണം വിജയിച്ചാൽ, COVID-19 mRNA വാക്സിനുകൾ കാൻസർ ചികിത്സയുടെ ഭാഗമാകാം.
കോവിഡ് മഹാമാരിയുടെ സമയത്ത് വികസിപ്പിച്ച ഈ സാങ്കേതികവിദ്യ, ഇപ്പോൾ കാൻസർ രോഗികൾക്ക് പുതിയ ജീവൻ നൽകുന്ന ഒരു പ്രതീക്ഷയായി മാറുകയാണ്.
