വയറു നിറയെ ആഹാരം കഴിച്ച ശേഷം ഒന്ന് മയങ്ങുക എന്നത് മിക്കവരും ചെയ്യുന്ന കാര്യമാണ്. ഭക്ഷണം കഴിഞ്ഞ് വരുമ്പോൾ ഉണ്ടാകുന്ന ആലസ്യം മാറ്റാൻ ഒരു ഉറക്കം നല്ലതാണെന്ന് തോന്നുമെങ്കിലും, ഇത് ആരോഗ്യത്തിന് അത്ര നല്ലതല്ലെന്നാണ് വിദഗ്ധർ പറയുന്നത്. ഭക്ഷണത്തിന് ശേഷം 10 മുതൽ 15 മിനിറ്റ് വരെ നടക്കുന്നത് ശരീരത്തിന് വലിയ ഗുണങ്ങൾ നൽകുമെന്ന് ഫിറ്റ്നസ് കോച്ചായ ബോബി തന്റെ ഇൻസ്റ്റഗ്രാം പോസ്റ്റിലൂടെ പറയുന്നു. ഈ ശീലത്തിന്റെ പ്രധാന ഗുണങ്ങൾ ഇവയാണ്.
1. രക്തത്തിലെ പഞ്ചസാരയുടെ അളവ് നിയന്ത്രിക്കുന്നു
ഭക്ഷണം കഴിഞ്ഞ ഉടൻ നടക്കുന്നത് രക്തത്തിലെ ഗ്ലൂക്കോസിനെ ഊർജമാക്കി മാറ്റാൻ പേശികളെ സഹായിക്കുന്നു. ഇത് രക്തത്തിലെ പഞ്ചസാരയുടെ അളവ് പെട്ടെന്ന് ഉയരുന്നത് തടയുന്നു.
2. ദഹനം സുഗമമാക്കുന്നു
ഭക്ഷണം കഴിച്ച ഉടൻ കിടക്കുകയോ ഇരിക്കുകയോ ചെയ്യുന്നതിന് പകരം നടക്കുന്നത് ദഹനപ്രക്രിയ വേഗത്തിലാക്കാൻ സഹായിക്കുന്നു. ഇത് ഗ്യാസ്, വയറു വീർക്കൽ തുടങ്ങിയ അസ്വസ്ഥതകൾ ഒഴിവാക്കാൻ സഹായിക്കും.
3. രക്തസമ്മർദം കുറയ്ക്കുന്നു
പതിവായി ഭക്ഷണത്തിന് ശേഷം നടക്കുന്നത് ദീർഘകാലാടിസ്ഥാനത്തിൽ രക്തസമ്മർദം നിയന്ത്രിക്കാൻ സഹായിക്കുമെന്ന് അദ്ദേഹം ചൂണ്ടിക്കാട്ടുന്നു.
4. മാനസികാരോഗ്യം
ശാരീരിക ഗുണങ്ങൾക്കൊപ്പം തന്നെ മനസിനും ഇത് ഉന്മേഷം നൽകുന്നു. സമ്മർദവും ഉത്കണ്ഠയും കുറയ്ക്കാൻ ചെറിയൊരു നടത്തം സഹായിക്കും.
എത്ര സമയം നടക്കണം?
ദിവസവും രണ്ടോ മൂന്നോ തവണ നടക്കാനാണ് ബോബി നിർദേശിച്ചത്. ഭക്ഷണത്തിന് ശേഷം 10 മുതൽ 15 മിനിറ്റ് വരെ മാത്രം നടക്കുക. ഈ രീതിയിൽ ചെയ്യുന്നത് നിങ്ങളുടെ ശരീരം കൂടുതൽ നന്നായി പ്രതികരിക്കാൻ സഹായിക്കും. ഊർജസ്വലത വർദ്ധിപ്പിക്കുക, മാനസിക സമ്മർദം കുറയ്ക്കുക, മെച്ചപ്പെട്ട ആരോഗ്യം നടക്കുക എന്നത് അമിതമായ അധ്വാനം ആവശ്യമുള്ളതോ സങ്കീർണമായതോ ആയ ഒന്നല്ല. ഇത് വളരെ ലളിതമാണ്, ആർക്കും ചെയ്യാവുന്നതുമാണ്. കുറഞ്ഞ പരിശ്രമം മാത്രം ആവശ്യമുള്ള കാര്യമാണെങ്കിലും, വലിയ നേട്ടങ്ങളാണ് ഇത് നൽകുന്നത്.
