മനുഷ്യന് ഒരിക്കലും പ്രവചിക്കാൻ പറ്റാത്ത ഒന്നാണ് മരണം. ഹൃദയം, ശ്വസനവ്യവസ്ഥ, മസ്തിഷ്കം തുടങ്ങിയ ശരീരത്തിലെ സുപ്രധാന അവയവങ്ങളുടെ പ്രവർത്തനം നിൽക്കുമ്പോഴാണ് മരണം സംഭവിക്കുന്നത്. മരണശേഷം ശരീരത്തിൽ എന്തൊക്കെ മാറ്റം സംഭവിക്കുമെന്ന് പലർക്കും അത്ര നിശ്ചയമില്ല. എന്നാൽ ഒരാളുടെ മരണശേഷം ആ മൃതദേഹം ചലിക്കുമെന്ന് പറഞ്ഞാൽ നിങ്ങൾ വിശ്വസിക്കുമോ?ശവശരീരത്തിന്റെ കെെ അനങ്ങുന്നതിന്റെയും കാലുകൾ അനങ്ങുന്നതിന്റെയും ചില സിസിടിവി ദൃശ്യങ്ങൾ പണ്ട് പ്രചരിച്ചിട്ടുണ്ട്.
ഇത്തരം വീഡിയോകൾ ഇപ്പോഴും യൂട്യൂബിൽ കാണാൻ സാധിക്കും. ഇത് പ്രേതം, ഭൂതം പോലുള്ളവയുടെ പണിയാണെന്നാണ് പലരും കരുതുന്നത്. പക്ഷേ മൃതദേഹങ്ങളുടെ ചലനത്തിന് പിന്നിൽ ചില ശാസ്ത്രീയ കാരണങ്ങളുണ്ടെന്ന് വിദഗ്ധർ പറയുന്നു. അവ എന്തൊക്കെയാണെന്ന് നോക്കാം. മരണശേഷം ശരീരം നശിച്ചുതുടങ്ങുമ്പോൾ ഉണ്ടാകുന്ന ചില മാറ്റങ്ങളാണ് ചലനത്തിന് കാരണമെന്നാണ് പറയുന്നത്. ഇതിനെ ലാസറസ് റിഫ്ലെക്സ് എന്നുപറയുന്നു.
എന്താണ് ലാസറസ് റിഫ്ലെക്സ്
മസ്തിഷ്ക മരണം സംഭവിച്ചവരിലാണ് കൂടുതലായി ലാസറസ് റിഫ്ലേക്സ് കണ്ടുവരുന്നത്. കെെകൾ ഉയരുന്നു, കെെമുട്ടിൽ വളയ്ക്കുന്നു, ചെറിയ ചലനം എന്നിവ മൃതദേഹത്തിന് സംഭവിക്കുന്നു. എന്നാൽ ഇത് ജീവൻ തിരിച്ച് ലഭിക്കുന്നതിന്റെ സൂചനയല്ല.സെർവിക്കൽ സുഷുമ്നാ നാഡിയാണ് ഇത് നിയന്ത്രിക്കുന്നത്. പോസ്റ്റ്മോർട്ടം സമയത്തെ ചലനങ്ങളും ഈ വിഭാഗത്തിൽപ്പെടുന്നു.
മരണശേഷം ശരീരം ചലിക്കുന്നത് എന്തുകൊണ്ട്?
മരണം സംഭവിച്ചാലും ചില നാഡീകോശങ്ങൾ ഒരു ചെറിയ സമയത്തേക്ക് സജീവമായി തുടരും. പേശികോശങ്ങൾക്കുള്ളിലെ ഇലക്ട്രിക് സിഗ്നലുകളും രാസപ്രവർത്തനങ്ങളും മൂലമാണ് ശരീരത്തിൽ ചെറിയ ചലനങ്ങൾ ഉണ്ടാകുന്നതെന്നാണ് വിദഗ്ധർ പറയുന്നത്. ക്ലിനിക്കൽ ഡെത്ത് സംഭവിച്ച് മിനിറ്റുകൾക്കുള്ളിൽ ഇത് സംഭവിക്കാം.
മരണശേഷം ശരീരത്തിന് എന്ത് സംഭവിക്കും
ശരീരം നിലച്ചുകഴിഞ്ഞാൽ അത് പലഘട്ടങ്ങളിലൂടെ കടന്നുപോകുന്നുവെന്നാണ് വിദഗ്ധർ പറയുന്നത്. ഹൃദയമിടിപ്പ് നിലച്ച് മിനിട്ടുകൾക്ക് ശേഷം ആദ്യഘട്ടമായ പല്ലോർ മോർട്ടിസ് ഉണ്ടാകും. തൊലിപ്പുറത്ത് ഉണ്ടാകുന്ന വിളർച്ചയെയാണ് പല്ലോർ മോർട്ടിസ് എന്ന് പറയുന്നത്. രക്ത ചംക്രമണം നിലയ്ക്കുന്നതിനെത്തുടർന്ന് ശരീരത്തിലെ ചർമ്മം വിളറിയ നിറമാകുന്നു.
രണ്ടാംഘട്ടം അൽഗോർ മോർട്ടിസ് ആണ്. മരണശേഷം ശരീരത്തിൽ നിന്ന് ക്രമേണ ഊഷ്മാവ് നഷ്ടപ്പെടുന്നു. ഓരോ ശരീരവും വ്യത്യസ്തമായാണ് മരണശേഷം പ്രതികരിക്കുന്നതെന്ന് വിദഗ്ധർ പറയുന്നു. ശരീരം തണുത്ത് തുടങ്ങുന്ന പ്രക്രിയയാണ് ഇത്. മണിക്കൂറിൽ 1.51 ഡിഗ്രി അളവിൽ ശരീരോഷ്മാവ് കുറയാൻ തുടങ്ങുമെന്നാണ് വിവരം.
ഏകദേശം രണ്ടോ ആറോ മണിക്കൂറുകൾക്ക് ശേഷം ശരീരത്തിൽ നിന്ന് രക്തം താഴ്ഭാഗത്തേക്ക് ഒഴുകുന്നു. ഈ മാറ്റമാണ് അടുത്ത ഘട്ടം. ലിവർ മോട്ടിസ് എന്നാണ് ഈ പ്രക്രിയ അറിയപ്പെടുന്നത്. ഗുരുത്വാകർഷണബലം മൂലമാണ് രക്തം താഴേക്ക് ഒഴുകുന്നത്.അടുത്തത് റിഗർ മോർട്ടിസ് എന്ന ഘട്ടമാണ്. മരണശേഷം ശരീരത്തിലെ ഉപാപചയ പ്രക്രിയകൾ നിൽക്കുന്നതോടെ പേശികൾ കൂടുതൽ ദൃഢമാകുന്നു. മരണത്തിന്റെ നാലാം ഘട്ടമാണിത്.
അന്തരീക്ഷത്തിലെ അവസ്ഥയ്ക്കനുസരിച്ചും മരിച്ചയാളുടെ ശാരീരിക പ്രത്യേകതയ്ക്കനുസരിച്ചും ഇതിൽ മാറ്റംവരാം. 2-3 മണിക്കൂറിൽ തുടങ്ങി 72 മണിക്കൂർ വരെ ഇത് നീണ്ടുനിൽക്കാം.പേശികൾ ദൃഢമാകുമ്പോഴും ചലനം ഉണ്ടാകാൻ സാദ്ധ്യതയുണ്ട്. മരണശേഷം ശരീരത്തിനുള്ളിൽ ബാക്ടീരിയകൾ വാതകങ്ങൾ ഉത്പാദിപ്പിക്കുന്നു. ഇത് വയറു വീർക്കുന്നതിനും അന്തരിക സമ്മർദ്ദത്തിനും കാരണമാകും. ഇതും കെെകാലുകളുടെ ചെറിയ ചലനത്തിന് കാരണമാകുമെന്ന് വിദഗ്ധർ വ്യക്തമാക്കുന്നു
