ഇന്നത്തെ കാലത്ത് യുവാക്കൾ നേരിടുന്ന ഏറ്റവും വലിയ ആരോഗ്യ വെല്ലുവിളികളിലൊന്നാണ് അമിതവണ്ണം. വ്യായാമമില്ലാത്ത ജീവിതശൈലിയും ജങ്ക് ഫുഡുകളുടെ അമിത ഉപയോഗവുമാണ് ഇതിന് പ്രധാന കാരണമായി പറയപ്പെടാറുള്ളത്. എന്നാൽ പലപ്പോഴും നാം തിരിച്ചറിയാതെ പോകുന്ന മറ്റൊരു ഗുരുതരമായ ഘടകമാണ് ‘ക്രോണിക് ഇൻഫ്ലമേഷൻ’ അഥവാ ശരീരത്തിനുള്ളിലെ വീക്കം. വണ്ണം കുറയ്ക്കാൻ എത്ര ശ്രമിച്ചിട്ടും പരാജയപ്പെടുന്നവരില് ഭൂരിഭാഗം പേരിലും ഈ അവസ്ഥ വില്ലനായി മാറുന്നുണ്ടെന്നാണ് ആരോഗ്യ വിദഗ്ധർ ചൂണ്ടിക്കാട്ടുന്നത്.
എങ്ങനെയാണ് ഇൻഫ്ലമേഷൻ വണ്ണം കൂട്ടുന്നത്?
ശരീരത്തിലെ ഉപാപചയ പ്രവർത്തനങ്ങളെയും ഹോർമോണുകളുടെ സന്തുലിതാവസ്ഥയെയും ഇൻഫ്ലമേഷൻ നേരിട്ട് ബാധിക്കുന്നു. വിശപ്പിനെ നിയന്ത്രിക്കുന്ന ലെപ്റ്റിൻ, മാനസിക സമ്മർദ്ദവുമായി ബന്ധപ്പെട്ട കോർട്ടിസോൾ, രക്തത്തിലെ പഞ്ചസാരയെ നിയന്ത്രിക്കുന്ന ഇൻസുലിൻ തുടങ്ങിയ ഹോർമോണുകളുടെ പ്രവർത്തനം ഇത് തകിടം മറിക്കുന്നു. ഇതിന്റെ ഫലമായി ശരീരം അമിതമായി കൊഴുപ്പ് സംഭരിക്കാൻ തുടങ്ങുകയും, ഊർജ്ജനില കുറയുന്നത് വഴി മധുരപലഹാരങ്ങളോടുള്ള അമിതമായ ആസക്തി ഉണ്ടാവുകയും ചെയ്യുന്നു.
സാധാരണ തടിയും ഇൻഫ്ലമേഷനും തിരിച്ചറിയാം
ശരീരത്തിലെ തടി ഇൻഫ്ലമേഷൻ കൊണ്ടാണോ എന്ന് തിരിച്ചറിയാൻ ലളിതമായ ചില വഴികളുണ്ട്. വസ്ത്രങ്ങൾ ധരിക്കുമ്പോഴുണ്ടാകുന്ന വ്യത്യാസമാണ് ഇതിൽ പ്രധാനം. രാവിലെ കൃത്യമായി പാകമാകുന്ന വസ്ത്രങ്ങൾ വൈകുന്നേരമോ അല്ലെങ്കിൽ അടുത്ത ദിവസമോ ധരിക്കുമ്പോൾ വല്ലാതെ ഇറുക്കമുള്ളതായി അനുഭവപ്പെടുന്നത് ശരീരത്തിലെ നീർക്കെട്ടിന്റെ ലക്ഷണമാണ്. അതുപോലെ പെട്ടെന്ന് വണ്ണം വയ്ക്കുന്നതും കുറയുന്നതും ഇൻഫ്ലമേഷൻ മൂലമുള്ള മാറ്റങ്ങളാകാം.
അമിതവണ്ണമുള്ളവരിൽ ഏകദേശം 20 ശതമാനത്തോളം പേരിലും വണ്ണത്തിന് പിന്നിലെ പ്രധാന കാരണം ഇത്തരം ഇൻഫ്ലമേഷനുകളാണ്. ഇത് കൃത്യമായി തിരിച്ചറിഞ്ഞ് ചികിത്സിച്ചാൽ തന്നെ വലിയൊരു പരിധി വരെ വണ്ണം കുറയ്ക്കാൻ സാധിക്കും. എന്നാൽ ദീർഘകാലം നിലനിൽക്കുന്ന ശരീര വീക്കം മറ്റ് ഗുരുതരമായ രോഗങ്ങളുടെ തുടക്കമാകാൻ സാധ്യതയുള്ളതിനാൽ ഇതിനെ നിസ്സാരമായി കാണരുതെന്നും വിദഗ്ധർ മുന്നറിയിപ്പ് നൽകുന്നു. ശരിയായ ഭക്ഷണക്രമവും സജീവമായ ജീവിതശൈലിയും പിന്തുടരുന്നതിലൂടെ ഇൻഫ്ലമേഷൻ നിയന്ത്രിക്കാൻ സാധിക്കും.
