ഉയർന്ന രക്തസമ്മർദ്ദം ഹൃദയാഘാതം, സ്ട്രോക്ക് തുടങ്ങിയ നിരവധി ആരോഗ്യപ്രശ്നങ്ങളിലേക്ക് നയിക്കുമെന്നതിനെക്കുറിച്ച് നാം പലപ്പോഴും ചർച്ച ചെയ്യാറുണ്ട്. ലോകാരോഗ്യ സംഘടനയുടെ കണക്കനുസരിച്ച്, മാനസിക സമ്മർദ്ദം, അമിതമായ ഉപ്പിന്റെ ഉപയോഗം, അമിതവണ്ണം, പുകവലി, മദ്യപാനം തുടങ്ങിയ കാരണങ്ങളാണ് രക്തസമ്മർദ്ദം വർദ്ധിപ്പിക്കുന്നത്.
എന്നാൽ, കുറഞ്ഞ രക്തസമ്മർദ്ദത്തിന്റെ ലക്ഷണങ്ങളെ പലപ്പോഴും ആളുകൾ നിസ്സാരമായി കാണാറുണ്ട്. രക്തസമ്മർദ്ദം 90/60 mmHg-യിൽ താഴെ വരുന്ന അവസ്ഥയെയാണ് ഹൈപ്പോടെൻഷൻ എന്ന് കണക്കാക്കുന്നത്. ഈ അവസ്ഥ ഹൃദയം, തലച്ചോറ്, കരൾ, വൃക്കകൾ തുടങ്ങിയ സുപ്രധാന അവയവങ്ങളുടെ പ്രവർത്തനത്തെ മോശമായി ബാധിക്കാൻ സാധ്യതയുണ്ട്.
കുറഞ്ഞ രക്തസമ്മർദ്ദത്തിന്റെ പ്രധാന മുന്നറിയിപ്പുകൾ
ബിപി കുറയുമ്പോൾ തലയിലേക്കും മറ്റ് അവയവങ്ങളിലേക്കുമുള്ള രക്തയോട്ടം കുറയുന്നു. ഇത് ഗുരുതരമായ ആരോഗ്യപ്രശ്നങ്ങൾക്ക് കാരണമാകുന്നതിന് മുമ്പ് ശരീരം നൽകുന്ന പ്രധാന ലക്ഷണങ്ങൾ ഇവയാണ്.
തലകറക്കം അല്ലെങ്കിൽ വീഴാൻ പോകുന്നതുപോലെയുള്ള തോന്നൽ.
പെട്ടെന്ന് ഓർമ്മ നഷ്ടപ്പെടുന്നതുപോലെയുള്ള അവസ്ഥ.
കാഴ്ച മങ്ങൽ.
അമിതമായ ദാഹം.
കഠിനമായ ക്ഷീണം അല്ലെങ്കിൽ ഛർദ്ദിക്കാനുള്ള തോന്നൽ.
ശരീരം തണുക്കുക.
ശ്വാസതടസ്സം അനുഭവപ്പെടുക.
രക്തസമ്മർദ്ദം കുറയുന്നതിനുള്ള കാരണങ്ങൾ
രക്തസമ്മർദ്ദം താഴാൻ പല കാരണങ്ങളുണ്ട്. അതിലൊന്ന് ശരീരത്തിലെ ജലാംശം കുറയുന്നതാണ്. അതിനാൽ ധാരാളം വെള്ളം കുടിക്കാൻ ശ്രദ്ധിക്കുക. കൂടാതെ, രക്തം നഷ്ടമാകുമ്പോൾ, ഹൃദയ സംബന്ധമായ രോഗങ്ങൾ, പരിക്കുകൾ, ചിലതരം അലർജികൾ, എൻഡോക്രെയ്ൻ രോഗങ്ങൾ, ചില മരുന്നുകളുടെ ഉപയോഗം എന്നിവ മൂലവും രക്തസമ്മർദ്ദം കുറയാം. രക്തയോട്ടം കുറയുന്നത് വൃക്കയുടെയും ഹൃദയത്തിന്റെയും തകരാറുകൾക്ക് കാരണമായേക്കാം എന്നതിനാൽ, ലോ ബിപി നിസ്സാരമായി കാണരുത്.
