ചെറിയ കാര്യങ്ങള്‍ പെട്ടെന്ന് മറന്നുപോകുന്നുണ്ടോ? എന്തെങ്കിലും ചെയ്തുകൊണ്ടിരിക്കുന്നതിന്റെ ഇടയില്‍ ശ്രദ്ധ നഷ്ടപ്പെട്ടു പോകുന്നുണ്ടോ? വായനയിലും മറ്റു ജോലികളിലും അധികസമയം ശ്രദ്ധ കേന്ദ്രീകരിക്കാന്‍ പറ്റാതെ പോകുന്നുണ്ടോ? എങ്കില്‍ നിങ്ങള്‍ക്ക് ഡിജിറ്റല്‍ ഡിമെന്‍ഷ്യയുണ്ടോ എന്ന് സംശയിക്കണം.
ഓര്‍മയെയും ചിന്തയെയും ബാധിക്കുന്ന തരത്തില്‍ തലച്ചോറിന്റെ പ്രവര്‍ത്തനങ്ങള്‍ കുറയുന്നതിനെയാണ് ഡിമെന്‍ഷ്യ എന്ന് പറയുന്നത്. വാര്‍ദ്ധക്യവുമായി ബന്ധപ്പെട്ടണ് ഈ അവസ്ഥ കൂടുതലും കണ്ട് വരുന്നത്. എന്നാല്‍, ഇപ്പോള്‍ ഇത് ചെറുപ്പക്കാരും അഭിമുഖീകരിക്കുന്നുണ്ട്. ഡിജിറ്റല്‍ ടെക്‌നോളജിയുടെ വര്‍ധിച്ചുവരുന്ന ഉപയോഗം കാരണം, യുവാക്കള്‍ പുതിയ അവസ്ഥയായ ഡിജിറ്റല്‍ ഡിമെന്‍ഷ്യയുമായി പൊരുതുകയാണ്.
ഡിജിറ്റല്‍ ഡിമെന്‍ഷ്യ
‘സാധാരണയായി, 65 വയസ്സിനു മുകളിലുള്ളവരിലാണ് ഡിമെന്‍ഷ്യ കാണപ്പെടാറ്. എന്നാല്‍ ഡിജിറ്റല്‍ ഉപകരണങ്ങള്‍ കൂടുതല്‍ ഉപയോഗിക്കുന്നവര്‍ക്ക് അതിനുമുമ്പ് തന്നെ ഡിമെന്‍ഷ്യയുടെ ലക്ഷണങ്ങള്‍ അനുഭവപ്പെട്ടേക്കാം. ഇത് ദൈനംദിന ജീവിതത്തെയും ജോലിയെയും ആശയവിനിമയത്തെയും പ്രതികൂലമായി ബാധിക്കുന്നു. ഡിജിറ്റല്‍ ഉപകരണങ്ങളുടെ അമിത ഉപയോഗം തലച്ചോറിന്റെ പ്രവര്‍ത്തനത്തെ ബാധിക്കും. അതുമൂലം നിരവധി യുവാക്കള്‍ക്ക് ഓര്‍മക്കുറവും ശ്രദ്ധ കേന്ദ്രീകരിക്കാനുള്ള ബുദ്ധിമുട്ടും അനുഭവപ്പെടുന്നു,’- തിരുവനന്തപുരം ഗവണ്‍മെന്റ് മെഡിക്കല്‍ കോളജിലെ സൈക്യാട്രി പ്രൊഫസര്‍ ഡോ. അരുണ്‍ ബി നായര്‍ പറയുന്നു.
‘കാര്യമായി ജോലി ഒന്നും ചെയ്തിട്ടില്ല, എങ്കിലും ഒരു വ്യക്തി മാനസികമായി ക്ഷീണിതനായി തോന്നുകയും, തലച്ചോറിന് അമിതഭാരം അനുഭവപ്പെടുകയും ചെയ്യുന്നുവെങ്കില്‍ – ജോലിയല്ല, മറിച്ച് നിരന്തരമായ ബ്രെയിന്‍ സ്റ്റിമുലേഷന്‍ ആയിരിക്കാം കാരണം. ലക്ഷണങ്ങള്‍ ദൈനംദിന ജീവിതത്തെ തടസ്സപ്പെടുത്താന്‍ തുടങ്ങിയാല്‍ ഒരു പ്രൊഫഷണലിന്റെ സഹായം തേടുന്നത് നല്ലതാണ്. ഈ അവസ്ഥ നേരത്തെ തന്നെ കണ്ടെത്തുന്നത് ദീര്‍ഘകാല ആഘാതം തടയാനും ചിന്താശക്തി പുനഃസ്ഥാപിക്കാനും സഹായിക്കും,’ അങ്കമാലി അപ്പോളോ അഡ്‌ലക്‌സ് ആശുപത്രിയിലെ കണ്‍സള്‍ട്ടന്റ് സൈക്യാട്രിസ്റ്റ് ഡോ. നീരജ് എച്ച് അഭിപ്രായപ്പെടുന്നു.
‘മൂന്ന് മണിക്കൂറില്‍ കൂടുതല്‍ ഡിജിറ്റല്‍ ഉപകരണങ്ങള്‍ ഉപയോഗിക്കുന്നത് തലച്ചോറില്‍ ചില പ്രശ്‌നങ്ങള്‍ അനുഭവപ്പെടാമെന്ന് പഠനങ്ങള്‍ ചൂണ്ടിക്കാണിക്കുന്നു. ‘കാര്‍ട്ടൂണ്‍, ഓണ്‍ലൈന്‍ ഗെയിം അല്ലെങ്കില്‍ ആക്ഷന്‍ സിനിമകള്‍ കാണുമ്പോള്‍ തലച്ചോറ് ചലനങ്ങളുടെ ഉയര്‍ന്ന വേഗതയ്ക്ക് അനുസൃതമായി മാറിയേക്കാം. ഇത് വേഗത കുറഞ്ഞ വീഡിയോ, വായന, മറ്റ് പ്രവര്‍ത്തനങ്ങള്‍ എന്നിവയുമായി പൊരുത്തപ്പെടാന്‍ പ്രയാസമുണ്ടാക്കുന്നു. കൂടാതെ ഓര്‍മക്കുറവിലേക്ക് നയിക്കുന്നു,’ ഡോ. അരുണ്‍ ബി നായര്‍ പറയുന്നു. 40 വയസ്സിനു മുകളിലുള്ളവര്‍ക്കും അവരുടെ കാര്യക്ഷമതയെ ബാധിക്കുന്ന അത്തരം പ്രശ്‌നങ്ങള്‍ അനുഭവപ്പെടുന്നുണ്ടെന്ന് അദ്ദേഹം കൂട്ടിച്ചേര്‍ത്തു.
പുതു തലമുറയുടെ ഐക്യു കുറയുന്നു
ഫ്‌ലിന്‍ ഇഫക്റ്റ് പ്രകാരം, ബുദ്ധിശക്തിയുടെ സ്‌കോറുകള്‍ കാലക്രമേണ വര്‍ധിക്കുകയും പുതിയ തലമുറയുടെത് മുന്‍ തലമുറകളേക്കാള്‍ മികച്ചതായിരിക്കുകയും ചെയ്യുന്നു. എന്നാല്‍ അതിന് വിപരീതമായ പ്രവണതയാണ് ഇപ്പോള്‍ കണ്ടുവരുന്നതെന്ന് ഡോ. അരുണ്‍ അഭിപ്രായപ്പെട്ടു.
‘പുതു തലമുറയുടെ ഐക്യു കുറഞ്ഞുവരികയാണ്. നമ്മള്‍ അധികമായി പല മാധ്യമങ്ങള്‍ ഉപയോഗിക്കുമ്പോള്‍ തലച്ചോറ് ശരിയായി പ്രവര്‍ത്തിക്കണമെന്നില്ല. മൊബൈല്‍ ഫോണില്‍ ഫോണ്‍ നമ്പറുകള്‍ സൂക്ഷിക്കുന്നതിനാല്‍ അവയെ ഓര്‍മിച്ചുവെയ്‌ക്കേണ്ട ആവശ്യമുണ്ടാകാറില്ല. അങ്ങനെ, ഫോണ്‍ നമ്പറുകള്‍ ഓര്‍മിക്കാനുള്ള തലച്ചോറിന്റെ കഴിവ് ക്രമേണ കുറയുന്നു. ഓണ്‍ലൈന്‍ മാപ്പുകള്‍ ഉള്ളതിനാല്‍ ടോപ്പോഗ്രാഫിക്കല്‍ മെമ്മറി, ഒരു സ്ഥലം കണ്ടെത്താനുള്ള കഴിവും കുറയുന്നു. അതിനാല്‍ നമ്മുടെ തലച്ചോറിന്റെ ഈ ഭാഗങ്ങള്‍ മുമ്പത്തെപ്പോലെ ശരിയായി പ്രവര്‍ത്തിക്കുന്നില്ല,’ ഡോ. അരുണ്‍ പറഞ്ഞു.
‘കോവിഡ് കാലത്ത്, ഡിജിറ്റല്‍ സ്‌ക്രീനുകള്‍ നമ്മളെ ബന്ധിപ്പിക്കുകയും സഹായിക്കുകയും ചെയ്തു. എന്നാല്‍ കുട്ടികളിലും യുവാക്കളിലും ഓണ്‍ലൈന്‍ ക്ലാസുകള്‍, ഗെയിമുകള്‍, സോഷ്യല്‍ മീഡിയ എന്നിവയിലേക്കുള്ള ദീര്‍ഘനേരം എക്‌സ്‌പോഷര്‍, പഠനം, ഒഴിവുസമയം, അമിത ഉത്തേജനം എന്നിവയെ ബാധിച്ചു. ഈ മാറ്റം സ്വാഭാവിക വികസന രീതികളെ, പ്രത്യേകിച്ച് ശ്രദ്ധയും, ഇമോഷണല്‍ ഇന്റലിജന്‍സിന്റെ പ്രവര്‍ത്തനത്തെയും തടസ്സപ്പെടുത്തി. വളരുന്ന തലച്ചോറിന് ചലനം, വിരസത, ഭാവന – എല്ലാറ്റിനുമുപരി, യഥാര്‍ത്ഥ മനുഷ്യബന്ധം എന്നിവ ആവശ്യമാണ്. എല്ലാ സ്‌ക്രീന്‍ ഉപയോഗവും ദോഷകരമല്ലെങ്കിലും, പാന്‍ഡെമിക് കാരണം ഉണ്ടായ ശീലങ്ങള്‍ യുവക്കളില്‍ ദീര്‍ഘകാല പ്രത്യാഘാതങ്ങള്‍ ഉണ്ടാക്കിയേക്കാം,’ ഡോ. നീരജ് കൂട്ടിച്ചേര്‍ത്തു.
ശ്രദ്ധിക്കേണ്ട കാര്യങ്ങള്‍
ഡിജിറ്റല്‍ ഡീടോക്‌സിഫിക്കേഷന്‍
ഒന്നോ രണ്ടോ മാസത്തേക്ക് ഡിജിറ്റല്‍ ഉപകരണങ്ങള്‍ ഉപയോഗിക്കുന്നത് ഒഴിവാക്കുക, സംഖ്യകള്‍, പ്രക്രിയകള്‍, സ്ഥലങ്ങള്‍ മുതലായവ ഓര്‍മിക്കാന്‍ ശ്രമിക്കുക.
സൂര്യപ്രകാശവും വ്യായാമവും
ശാരീരിക വ്യായാമവും സൂര്യപ്രകാശം ഏല്‍ക്കുന്നതും ഡോപാമൈന്‍ ഉണ്ടാവാന്‍ സഹായിക്കുന്നു. ഇത് ഏകാഗ്രത മെച്ചപ്പെടുത്തുന്നു. എന്‍ഡോര്‍ഫിനുകള്‍ മനുഷ്യനെ സന്തോഷത്തോടെ നിലനിര്‍ത്താന്‍ സഹായിക്കുന്നു. കൂടുതല്‍ രക്തചംക്രമണം, വിറ്റാമിന്‍ ഡി മുതലായവ എന്നിവയും നല്ലതാണ്.
ഉറക്കം
എട്ട് മണിക്കൂര്‍ ഉറക്കം ഓര്‍മശക്തിയുടെ ഏകീകരണത്തിന് സഹായിക്കുന്നു.
സാമൂഹിക ബന്ധങ്ങള്‍
കൂടുതല്‍ മനുഷ്യബന്ധങ്ങളും നെറ്റ്വര്‍ക്കുകളും വികസിപ്പിക്കുക.
വെള്ളം കുടിക്കുക
ശരീരത്തെ ജലാംശം നിലനിര്‍ത്തുകയും ആരോഗ്യകരമായ ഭക്ഷണക്രമം പിന്തുടരുകയും ചെയ്യുക.
