ഗര്‍ഭിണികളില്‍ സാധാരണവും വളരെയധികം ബുദ്ധിമുട്ടുണ്ടാക്കുന്നതുമായ ഒന്നാണ് ഗ്യാസ്ട്രിക് പ്രശ്നങ്ങള്‍. വയറു വീര്‍ക്കുക, ഗ്യാസ്, അസ്വസ്ഥത, വയര്‍ നിറഞ്ഞതായുള്ള തോന്നല്‍ ഇവയൊക്കെ ഭൂരിഭാഗം ഗര്‍ഭിണികളെയും അലട്ടുന്ന പ്രശ്നങ്ങളാണ്. ഹോര്‍മോണ്‍ വ്യതിയാനം മുതല്‍ ഭക്ഷണക്രമത്തിലെ മാറ്റങ്ങള്‍ വരെ ഈ അവസ്ഥയിലേക്ക് നയിക്കുന്നു. ഗര്‍ഭകാലത്ത് സ്ത്രീകളില്‍ ഉണ്ടാകുന്ന ശാരീരികവും ഹോര്‍മോണ്‍ അളവിലുണ്ടാകുന്നതുമായ പല മാറ്റങ്ങള്‍ കാരണം വയറ്റില്‍ അസ്വസ്ഥത ഉണ്ടാകുന്നത് സാധാരണമാണെന്ന് ഒണ്‍ലി മൈഹെല്‍ത്ത് ടീം ഗുരുഗ്രാമിലെ ക്ലൗഡ്നൈന്‍ ഗ്രൂപ്പ് ഓഫ് ഹോസ്പിറ്റലിലെ ഒബ്സ്റ്റട്രിക്സ് ആന്‍ഡ് ഗൈനക്കോളജി വിഭാഗം ഡയറക്ടര്‍ ഡോ ചേത്ന ജെയിന്‍ പറയുന്നു. ഗര്‍ഭകാലത്ത് വയറ്റില്‍ അസ്വസ്ഥത തോന്നുന്നതിന്റെ പ്രധാന കാരണങ്ങളും ഈ പ്രശ്നത്തെ എങ്ങനെയാണ് കൈകാര്യം ചെയ്യേണ്ടതെന്നും ഡോ. ജെയിന്‍ പറയുന്നു.
ഗര്‍ഭിണികളില്‍ ഗ്യാസ്ട്രിക് പ്രശ്നങ്ങള്‍ ഉണ്ടാകുന്നതിന്റെ കാരണങ്ങള്‍
ഹോര്‍മോണ്‍ മാറ്റങ്ങള്‍ : ഗര്‍ഭകാലത്ത് പ്രൊജസ്‌ട്രോണുകളുടെ അളവ് വളരെ കൂടുതലായിരിക്കും. ഇത് ദഹനനാളത്തിലെ പേശികള്‍ക്ക് വിശ്രമം നല്‍കുന്നു. ഇത് ദഹനം മന്ദഗതിയിലാക്കുകയും വാതക ഉത്പാദനം വര്‍ധിപ്പിക്കുകയും ചെയ്യും. ഇത് വയറു വീര്‍ക്കുന്നതിന് കാരണമാകും.
ഉയര്‍ന്ന രക്തത്തിന്റെ അളവ് : ഗര്‍ഭസ്ഥ ശിശുവിന്റെ വളര്‍ച്ചയെ പിന്തുണയ്ക്കുന്നതിനായി ഗര്‍ഭകാലത്ത് അമ്മയുടെ ശരീരം കൂടുതല്‍ രക്തം ഉത്പാദിപ്പിക്കും. ഇതും വയര്‍ വീര്‍ക്കുന്നത്‌പോലുള്ള തോന്നല്‍ ഉണ്ടാക്കും.
ഗര്‍ഭാശയത്തില്‍ നിന്നുണ്ടാകുന്ന സമ്മര്‍ദ്ദം : ഗര്‍ഭാശയം വികസിക്കും തോറും കുടലില്‍ സമ്മര്‍ദ്ദം ചെലുത്തും. ഇത് ദഹനനാളത്തിലൂടെ വാതകം കടന്നുപോകാന്‍ ബുദ്ധിമുട്ടുണ്ടാക്കും. ഇതും വയറ്റില്‍ പല തരത്തിലുള്ള അസ്വസ്ഥതകള്‍ക്ക് കാരണമാകും.
ദഹനപ്രക്രിയയിലെ മാറ്റങ്ങള്‍ : ഗര്‍ഭധാരണം നടന്നു കഴിഞ്ഞാല്‍ ദഹനവ്യവസ്ഥയുടെ സാധാരണ പ്രവര്‍ത്തനങ്ങളില്‍ ചില മാറ്റങ്ങള്‍ സംഭവിക്കുന്നു. ഇത് മലബന്ധം, വയറുവീര്‍ക്കല്‍ പോലുള്ള അവസ്ഥകളിലേക്ക് നയിക്കും.
ഭക്ഷണക്രമത്തിലെ മാറ്റങ്ങള്‍ : കൂടുതല്‍ അളവില്‍ നാരുകള്‍ അടങ്ങിയിയതോ ഗ്യാസ്ട്രിക് പ്രശ്നങ്ങള്‍ക്ക് കരണമായതോ ആയ ചില ഭക്ഷണങ്ങള്‍ അമിതമായി കഴിക്കുന്നത് വയര്‍ വീര്‍ക്കുന്നതിന് കാരണമാകും.
ദ്രാവകം അടിഞ്ഞുകൂടുക : ഗര്‍ഭിണികളില്‍ പലപ്പോഴും ദ്രാവകം നിലനിര്‍ത്താന്‍ കാരണമാകും. ഇത് വീക്കം, വയറു വീര്‍ക്കുന്നതായുള്ള തോന്നല്‍ എന്നിവയിലേക്ക് നയിക്കും.
വായു വിഴുങ്ങുക : വേഗത്തില്‍ ഭക്ഷണം കഴിക്കുകയോ ഭക്ഷണം കഴിക്കുമ്പോള്‍ സംസാരിക്കുകയോ സ്‌ട്രോയിലൂടെ വെള്ളം കുടിക്കുകയോ ചെയ്യുന്നത് അധികം വായു വിഴുങ്ങാന്‍ ഇടയാക്കും. ഇത് വയറു വീര്‍ക്കുന്നതിന് കാരണമാകും.
ചികിത്സ മാര്‍ഗങ്ങള്‍
ഗര്‍ഭകാലത്ത് ദഹനസംബന്ധമായ പ്രശ്നങ്ങള്‍ സ്ത്രീകളില്‍ വലിയ തോതിലുള്ള അസ്വസ്ഥതയ്ക്കും ദൈനംദിന ജോലികള്‍ ചെയ്യുന്നതിന് ബുദ്ധിമുട്ടുണ്ടാക്കുകയും ചെയ്തേക്കും. ഇത്തരം പ്രശ്നങ്ങള്‍ പരിഹരിക്കുന്നതിനും തടയുന്നതിനും ഡോ ജെയിന്‍ നിര്‍ദേശിക്കുന്ന ചില വഴികള്‍ ഇതാ.
ഇടയ്ക്കിടെ ഭക്ഷണം കഴിക്കുക : ഇടയ്ക്കിടെ കുറഞ്ഞ അളവില്‍ ലഘുവായ ഭക്ഷണങ്ങള്‍ കഴിക്കുക. ഇത് ഗ്യാസ് നിറയുന്നത് തടയാന്‍ സഹായിക്കും.
ഗ്യാസ് ഉണ്ടാക്കുന്ന ഭക്ഷണങ്ങള്‍ ഒഴിവാക്കുക: ഗ്യാസ്, വയറുവീര്‍ക്കല്‍ പോലുള്ള പ്രശ്നങ്ങള്‍ക്ക് കാരണമാകുന്ന ബീന്‍സ്, കാബേജ്, കാര്‍ബണേറ്റഡ് പാനീയങ്ങള്‍, കൊഴുപ്പ് കൂടിയ ഭക്ഷണങ്ങള്‍ കഴിക്കുന്നത് പരിമിതപ്പെടുത്തുക.
ജലാംശം നിലനിര്‍ത്തുക : ദിവസേന ധാരാളം വെള്ളം കുടിക്കുക. മലബന്ധം തടയാനും ആരോഗ്യകരമായ ദഹനം പ്രോത്സാഹിപ്പിക്കാനും ഇത് സഹായിക്കും.
വ്യായാമം പതിവാക്കുക : ദഹനത്തെ പിന്തുണയ്ക്കാനും വയറുവീര്‍ക്കല്‍ പോലുള്ള ബുദ്ധിമുട്ടുകള്‍ ഒഴിവാക്കാനും നടത്തം, യോഗ പോലുള്ള വ്യായാമങ്ങള്‍ ചെയ്യുക.
ഭക്ഷണം ചവച്ചരച്ച് കഴിക്കുക : ഭക്ഷണം നന്നായി ചവച്ചരച്ച് കഴിക്കാന്‍ ശ്രദ്ധിക്കുക. ഇങ്ങനെ കഴിക്കുന്നത് വായു വിഴുങ്ങുന്നത് കുറയ്ക്കുകയും ദഹനത്തെ മെച്ചപ്പെടുത്താന്‍ സഹായിക്കുകയും ചെയ്യും.
നാരുകള്‍ അടങ്ങിയ ഭക്ഷണങ്ങള്‍ പരിമിതപ്പെടുത്തുക : അമിതമായി നാരുകള്‍ അടങ്ങിയ ഭക്ഷണം കഴിക്കുന്നത് വയറു വീര്‍ക്കാന്‍ ഇടയാക്കും. നാരുകള്‍ അടങ്ങിയ ഭക്ഷണം കഴിച്ചാല്‍ ആവശ്യത്തിന് വെള്ളം കുടിക്കുന്നുണ്ടെന്ന് ഉറപ്പ് വരുത്തുക.
കാര്‍ബണേറ്റഡ് പാനീയങ്ങള്‍ ഒഴിവാക്കുക : കാര്‍ബണേറ്റഡ് പാനീയങ്ങള്‍ കുടിക്കുന്നത് ഗ്യാസ്, വയറു വേദന എന്നീ പ്രശ്നങ്ങള്‍ക്ക് കാരണമാകും. അതിനാല്‍ ഇത്തരം പാനീയങ്ങള്‍ ഒഴിവാക്കുക. പകരം ഹെര്‍ബല്‍ ടീ, ഡ്രിങ്ക്‌സ് എന്നിവ തെരഞ്ഞെടുക്കുക.
