ശമ്പളം കിട്ടിയാലുടൻ തന്നെ തീർന്നു പോകുന്നവരാണോ നിങ്ങൾ? മാസാവസാനം എത്തുമ്പോൾ പണം കൈവശമില്ലാതെ ബുദ്ധിമുട്ടുന്നവർക്ക് സഹായകരമായ ഒരു ലളിതമായ സാമ്പത്തിക ക്രമീകരണ മാർഗമാണ് വിദഗ്ധർ നിർദ്ദേശിക്കുന്നത്. 70/10/10/10 ഫോർമുല എന്നറിയപ്പെടുന്ന ഈ രീതിയിലൂടെ ശമ്പളത്തെ നാല് ഭാഗങ്ങളായി വിഭജിച്ചാൽ ചെലവുകൾ നിയന്ത്രിക്കാനും ഭാവിക്കായി പണം മാറ്റിവെക്കാനും കഴിയും.
ഈ ഫോർമുല പ്രകാരം, ശമ്പളത്തിന്റെ 70 ശതമാനം ദൈനംദിന ആവശ്യങ്ങൾക്കായി മാറ്റിവെക്കണം. വീട്ടുവാടക, ലോൺ തിരിച്ചടവ്, കുട്ടികളുടെ പഠനം, വൈദ്യുതി ബിൽ, മരുന്നുകൾ, ഭക്ഷണം തുടങ്ങിയ അത്യാവശ്യ ചെലവുകൾ ഇതിൽ ഉൾപ്പെടും. ഇത് നിങ്ങളുടെ മാസ ബജറ്റിന്റെ പ്രധാന ഭാഗമാണ്.
ശമ്പളത്തിന്റെ 10 ശതമാനം ദീർഘകാല സമ്പാദ്യത്തിനായി മാറ്റിവെക്കണം. പെൻഷൻ ഫണ്ട്, മ്യൂച്വൽ ഫണ്ട് തുടങ്ങിയ നിക്ഷേപങ്ങൾക്കായി ഈ തുക ഉപയോഗിക്കാം. ഇതിലൂടെ ഭാവിയിലെ സാമ്പത്തിക സുരക്ഷ ഉറപ്പാക്കാൻ സാധിക്കും.
മറ്റൊരു 10 ശതമാനം അടിയന്തര ആവശ്യങ്ങൾക്കായുള്ള ഫണ്ടായി സൂക്ഷിക്കണം. അപ്രതീക്ഷിതമായ ആശുപത്രി ചെലവുകൾക്കോ മറ്റ് അടിയന്തര സാഹചര്യങ്ങൾക്കോ ഈ തുക വലിയ സഹായമാകും.
ശേഷിക്കുന്ന 10 ശതമാനം കടം തീർക്കുന്നതിനോ സ്വയം മെച്ചപ്പെടുത്തുന്നതിനോ ഉപയോഗിക്കാം. പഴയ കടങ്ങൾ ഉണ്ടെങ്കിൽ അവ അടയ്ക്കാൻ ഈ പണം ഉപയോഗിക്കാം. കടങ്ങളില്ലെങ്കിൽ പുതിയ കഴിവുകൾ പഠിക്കാനോ വിനോദങ്ങൾക്കോ യാത്രകൾക്കോ ഈ തുക മാറ്റിവെക്കാം.
സാമ്പത്തിക ശാസ്ത്രജ്ഞർ പറയുന്നത്, ശമ്പളം ലഭിക്കുന്നതോടൊപ്പം തന്നെ ഈ നാല് ഭാഗങ്ങളിലേക്കായി പണം മാറ്റിവെക്കുന്നത് നല്ല ശീലമാക്കണമെന്നാണ്. അനാവശ്യ ചെലവുകൾ ഒഴിവാക്കി 70 ശതമാനത്തിനുള്ളിൽ ജീവിതച്ചെലവ് നിയന്ത്രിക്കാൻ ശ്രമിച്ചാൽ സാമ്പത്തിക സമ്മർദ്ദം കുറയ്ക്കാൻ സാധിക്കുമെന്നാണ് വിലയിരുത്തൽ.
