ബീജിംഗ്: ഏകമകനെ നഷ്ടപ്പെട്ട ദുഃഖത്തിൽ കഴിഞ്ഞിരുന്ന 63കാരി ഇൻവിട്രോ ഫെർട്ടിലൈസേഷനിലൂടെ (ഐവിഎഫ്) പെൺകുഞ്ഞിന് ജന്മം നൽകി. ചൈനയിലാണ് സംഭവം. സൗത്ത് ചൈന മോർണിംഗ് പോസ്റ്റാണ് വാർത്ത പുറത്തുവിട്ടത്. കഴിഞ്ഞ വർഷമായിരുന്നു ക്യാൻസർ ബാധിച്ച് ചികിത്സയിലിരിക്കെ വൃദ്ധയുടെ ഏകമകൻ മരിച്ചത്.
ഈ മാസം നാലാം തീയതി ജിലിൻ പ്രവിശ്യയിലെ സോംഗ്യുവാനിലുള്ള ആശുപത്രിയിൽ സിസേറിയനിലൂടെയാണ് വൃദ്ധ കുഞ്ഞിന് ജന്മംനൽകിയത്. അമ്മയും കുഞ്ഞും പൂർണ ആരോഗ്യത്തോടെയിരിക്കുന്നുവെന്ന് റിപ്പോർട്ടിൽ പറയുന്നു.35കാരനായ മകന്റെ മരണം വൃദ്ധയെയും ഭർത്താവിനെയും ഏറെ ദുഃഖത്തിലാഴ്ത്തിയിരുന്നു. പിന്നീട് താൻ ഗർഭിണിയായതോടെയാണ് വീട്ടിൽ വീണ്ടും സന്തോഷം തിരിച്ചെത്തിയതെന്ന് വൃദ്ധ പറയുന്നു. ഈ കുഞ്ഞ് ഇല്ലായിരുന്നുവെങ്കിൽ തങ്ങൾക്ക് മുന്നോട്ട് പോകാനുള്ള ശക്തി ഉണ്ടാകുമായിരുന്നില്ലെന്നും അവർ കൂട്ടിച്ചേർത്തു.പ്രായാധിക്യവും അപകടസാദ്ധ്യതകളും ഉണ്ടായിരുന്നിട്ടും വൃദ്ധ ദമ്പതികൾ ഐവിഎഫ് തിരഞ്ഞെടുത്തു.
തങ്ങളുടെ കുടുംബത്തിന് ദീർഘായുസുണ്ടെന്നും തങ്ങളുടെ മാതാപിതാക്കൾ 90 വയസിന് മുകളിൽ ജീവിച്ചിരുന്നതായും വൃദ്ധ ദമ്പതികൾ പറഞ്ഞു. മാത്രമല്ല, തന്റെയും ഭർത്താവിന്റെയും കാലശേഷം കുഞ്ഞിനെ നോക്കിക്കോളാമെന്ന് അനന്തരവൻ വാഗ്ദാനം ചെയ്തതായും വൃദ്ധ പറഞ്ഞു. ഇപ്പോൾ മകൻ ജീവിതത്തിലേക്ക് തിരിച്ചെത്തിയതായി തോന്നുന്നുവെന്നും ദമ്പതികൾ പറഞ്ഞു.വൃദ്ധയുടെ ആരോഗ്യം ഇപ്പോഴത്തെ ചെറുപ്പക്കാരേക്കാൾ മികച്ചതാണെന്ന് ആരോഗ്യവിദഗ്ദ്ധർ പറഞ്ഞതായി റിപ്പോർട്ടിൽ വ്യക്തമാക്കിയിട്ടുണ്ട്.
വൃദ്ധ കുഞ്ഞിന് മുലയൂട്ടുന്നുമുണ്ട്. എന്നിരുന്നാലും ഇവരുടെ തീരുമാനം ചൈനയിലുടനീളം വ്യാപക ചർച്ചയ്ക്ക് കാരണമായി. പ്രായം കൂടുമ്പോഴുള്ള ഗർഭധാരണത്തിലെ അപകടസാദ്ധ്യതകളെക്കുറിച്ച് പലരും സോഷ്യൽ മീഡിയയിൽ ആശങ്ക പ്രകടിപ്പിച്ചു. മറ്റുചിലരാകട്ടെ, ധീരയായ വൃദ്ധയ്ക്ക് പിന്തുണയുമായും രംഗത്തെത്തിയിട്ടുണ്ട്.
 പെൺകുഞ്ഞിന് ജന്മം നൽകി. ചൈനയിലാണ് സംഭവം){kind=link}