വ്യായാമം ഏത് സമയത്ത് ചെയ്യുന്നതാണ് ഏറ്റവും നല്ലത്?

ദിവസവും വ്യായാമം ചെയ്യുന്നത് നിരവധി ആരോ​ഗ്യ​ഗുണങ്ങളാണ് നൽകുന്നത്. ശരീരഭാരം നിയന്ത്രിക്കൽ മുതൽ മികച്ച ഹൃദയാരോഗ്യം വരെ, ദിവസേനയുള്ള വ്യായാമം ഒന്നിലധികം ഗുണങ്ങൾ നൽകുന്നു. പതിവ് വ്യായാമം വളരെ പ്രധാനമാണെങ്കിലും വ്യായാമത്തിന്റെ സമയം വ്യായാമ ഫലങ്ങളെയും ബാധിക്കും.

അതിരാവിലെ വ്യായാമം ചെയ്യുന്ന ആളുകൾക്ക് വൈകി വ്യായാമം ചെയ്യുന്നവരെ അപേക്ഷിച്ച് ഹൃദയ, ഉപാപചയ രോഗങ്ങൾക്കുള്ള സാധ്യത വളരെ കുറവാണെന്ന് ഗവേഷകർ കണ്ടെത്തി. അമേരിക്കൻ കോളേജ് ഓഫ് കാർഡിയോളജിയുടെ വാർഷിക ശാസ്ത്ര സെഷനിൽ അവതരിപ്പിച്ച സമീപകാല പഠനത്തിൽ ഇതിനെ കുറിച്ച് വ്യക്തമാക്കുന്നു.

നിങ്ങൾ എത്ര സമയം വ്യായാമം ചെയ്യുന്നു എന്നതുപോലെ തന്നെ പ്രധാനമാണ് എപ്പോൾ വ്യായാമം ചെയ്യുന്നു എന്നതും. ദിവസവും രാവിലെ വ്യായാമം ചെയ്യുന്നത് മാനസികാരോ​ഗ്യം മെച്ചപ്പെടുത്താൻ സഹായിക്കുന്നതായി മസാച്യുസെറ്റ്സ് ചാൻ മെഡിക്കൽ സ്കൂളിലെ മെഡിക്കൽ വിദ്യാർത്ഥിയും പഠനത്തിന്റെ മുഖ്യ രചയിതാവുമായ പ്രേം പട്ടേൽ പറഞ്ഞു

14,000-ത്തിലധികം ആളുകളിൽ നിന്നുള്ള ഡാറ്റ പഠനം വിശകലനം ചെയ്തു. ആളുകൾ ഒരേ അളവിൽ വ്യായാമം ചെയ്തപ്പോഴും, രാവിലെ അത് ചെയ്തവരുടെ ആരോഗ്യ ഫലങ്ങൾ വളരെ മികച്ചതായിരുന്നതായി ​ഗവേഷകർ പറയുന്നു.

പൊണ്ണത്തടി സാധ്യത 35% കുറവ്, കൊറോണറി ആർട്ടറി രോഗ (ഹൃദ്രോഗം) സാധ്യത 31% കുറവ്, ടൈപ്പ് 2 പ്രമേഹ സാധ്യത 30% കുറവ്, ഉയർന്ന കൊളസ്ട്രോൾ സാധ്യത 21% കുറവ് (ഹൈപ്പർലിപിഡീമിയ), ഉയർന്ന രക്തസമ്മർദ്ദ സാധ്യത 18% കുറവ് എന്നിവ കണ്ടെത്തി.

രാവിലെ 7:00 നും 8:00 നും ഇടയിൽ വ്യായാമം ചെയ്യുന്നത് ഹൃദ്രോഗ സാധ്യത കുറയ്ക്കുമെന്ന് പഠനം തെളിയിച്ചു. ദിവസവും രാവിലെ വ്യായാമം ചെയ്യുന്നത് ശരീരത്തിലെ അധിക കൊഴുപ്പ് കുറയ്ക്കുകയും ഊർജനില കൂട്ടുന്നതായും കണ്ടെത്തി.