ചെവി നമ്മുടെ ശരീരത്തിലെ അത്ഭുതകരമായ സ്വയം-ശുചീകരണ സംവിധാനങ്ങളിലൊന്നാണ്. ചെവിയിൽ രൂപപ്പെടുന്ന മെഴുകിനെ പലരും അഴുക്കായി കരുതി നീക്കം ചെയ്യാൻ ശ്രമിക്കാറുണ്ടെങ്കിലും, യഥാർത്ഥത്തിൽ ഇത് ചെവിയെ സംരക്ഷിക്കുന്ന സ്വാഭാവിക പ്രതിരോധ കവചമാണ്. പുറത്തുനിന്നുള്ള പൊടി, ബാക്ടീരിയ, അണുക്കൾ എന്നിവ ചെവിക്കുള്ളിലേക്ക് കടക്കുന്നത് തടയുന്നതിൽ ഈ മെഴുകിന് നിർണായക പങ്കുണ്ട്.
ഇക്കാര്യം മനസ്സിലാക്കാതെ പലരും കോട്ടൺ സ്വാബുകൾ ഉപയോഗിച്ച് ചെവിക്കുള്ളിൽ ആഴത്തിൽ വൃത്തിയാക്കാൻ ശ്രമിക്കുന്നത് അപകടകരമാണ്. ഇത്തരത്തിൽ വൃത്തിയാക്കുമ്പോൾ മെഴുക് പുറത്തുവരുന്നതിന് പകരം കൂടുതൽ ഉള്ളിലേക്ക് തള്ളപ്പെടുകയും കട്ടിയായി അടിഞ്ഞുകൂടുകയും ചെയ്യാം. ഇത് കേൾവി കുറയാനും ചെവിയിൽ വേദന, അസ്വസ്ഥത എന്നിവ ഉണ്ടാകാനും കാരണമാകും.
വിദഗ്ധർ നൽകുന്ന പ്രധാന മുന്നറിയിപ്പ് — ‘എൽബോയ്ക്ക് താഴെ വലിപ്പമുള്ള ഒന്നും ചെവിയിലേക്ക് കടത്തരുത്’ എന്നതാണ്. കോട്ടൺ സ്വാബുകൾ, ഹെയർ പിൻ, തീപ്പെട്ടിക്കൊള്ളി തുടങ്ങിയവ ഉപയോഗിക്കുന്നത് ചെവിയുടെ അതിലോലമായ ഭാഗങ്ങൾക്ക് പരിക്കേൽപ്പിക്കാനും ചെവിക്കല്ലിന് കേടുപാടുകൾ വരുത്താനും സാധ്യതയുണ്ട്.
ചെവി സുരക്ഷിതമായി വൃത്തിയാക്കാനുള്ള ഏറ്റവും നല്ല മാർഗം കുളിക്കുമ്പോൾ പുറംചെവി മാത്രം നനഞ്ഞ തുണി ഉപയോഗിച്ച് മൃദുവായി തുടയ്ക്കുന്നതാണ്. ചെവിയിൽ അമിതമായി മെഴുക് അടിഞ്ഞതായി തോന്നുകയോ കേൾവിയിൽ ബുദ്ധിമുട്ട് അനുഭവപ്പെടുകയോ ചെയ്യുന്നുവെങ്കിൽ സ്വമേധയാ ചികിത്സ ചെയ്യാതെ ഡോക്ടറെ സമീപിക്കുന്നത് നല്ലതാണ്.
ചിലർ പരീക്ഷിക്കുന്ന ‘ഇയർ കാൻഡ്ലിങ്’ പോലുള്ള രീതികളും അപകടകരമാണെന്ന് വിദഗ്ധർ മുന്നറിയിപ്പ് നൽകുന്നു. ഇത്തരം രീതികൾ പൊള്ളലിനും ചെവിക്കുള്ളിലെ ഗുരുതര പ്രശ്നങ്ങൾക്കും കാരണമായേക്കാം.
ചെവിയിൽ അസ്വസ്ഥത, വേദന, കേൾവിക്കുറവ് തുടങ്ങിയ ലക്ഷണങ്ങൾ അനുഭവപ്പെടുന്നുണ്ടെങ്കിൽ ഉടൻ തന്നെ ഒരു ENT doctorനെ സമീപിക്കണമെന്ന് ആരോഗ്യവിദഗ്ധർ നിർദേശിക്കുന്നു.
