ലാപ്ടോപ്പ് മടിയിൽ വെച്ച് മണിക്കൂറുകളോളം തല കുനിച്ച് ജോലി ചെയ്യുന്നത് ഗുരുതരമായ ആരോഗ്യപ്രശ്നങ്ങൾക്ക് കാരണമാകുമെന്ന് വിദഗ്ധർ മുന്നറിയിപ്പ് നൽകുന്നു. 2026-ൽ നടത്തിയ പഠനപ്രകാരം, സർവകലാശാലാ വിദ്യാർത്ഥികളിൽ 52.4 ശതമാനം പേർക്കും കഴിഞ്ഞ ഒരാഴ്ചയ്ക്കിടെ കഴുത്തുവേദന അനുഭവിച്ചിട്ടുണ്ട്. ഫോണുകളെ അപേക്ഷിച്ച് ലാപ്ടോപ്പ് ഉപയോഗിക്കുന്നവരിൽ ഇതിനുള്ള സാധ്യത 2.7 മടങ്ങ് കൂടുതലാണെന്നും പഠനങ്ങൾ വ്യക്തമാക്കുന്നു.
കൂടാതെ, സോഷ്യൽ മീഡിയയുടെ അമിത ഉപയോഗം മൂലം 64.5 ശതമാനം കോളേജ് വിദ്യാർത്ഥികൾക്കും കഴുത്തുവേദന ഉണ്ടാകുന്നതായി മറ്റൊരു സർവേയിലും കണ്ടെത്തിയിട്ടുണ്ട്. മുംബൈയിലെ സൈഫി ഹോസ്പിറ്റലിലെ കൺസൾട്ടന്റ് സ്പൈൻ സർജനായ ഡോ. സാഹിർ അബ്ബാസ് മെർച്ചന്റിന്റെ അഭിപ്രായത്തിൽ, യഥാർത്ഥ പ്രശ്നം ലാപ്ടോപ്പ് അല്ല, മറിച്ച് ആളുകൾ അത് ഉപയോഗിക്കുന്ന തെറ്റായ രീതിയാണ്.
എന്താണ് ‘ടെക് നെക്ക്’?
ഡിജിറ്റൽ ഉപകരണങ്ങളിലേക്ക് ദീർഘനേരം താഴേക്ക് നോക്കിയിരിക്കുന്നതുമൂലം കഴുത്തിലും പുറത്തിന്റെ മുകൾഭാഗത്തും ഉണ്ടാകുന്ന അസ്വസ്ഥതകളെയാണ് ‘ടെക് നെക്ക്’ എന്ന് വിളിക്കുന്നത്. തല മുന്നിലേക്കും താഴേക്കും കുനിഞ്ഞിരിക്കുമ്പോൾ കഴുത്തിലെ പേശികൾ, സന്ധികൾ, നട്ടെല്ലിന്റെ മുകൾഭാഗം എന്നിവയിൽ നിരന്തരമായ സമ്മർദ്ദം ഉണ്ടാകുന്നു.
പ്രധാന ലക്ഷണങ്ങൾ
കഴുത്തിന്റെ പിൻഭാഗത്തും തോളുകളിലും പേശീവേദനയോ മുറുക്കമോ അനുഭവപ്പെടുക.
തല തിരിക്കാൻ ബുദ്ധിമുട്ടോ കാഠിന്യമോ തോന്നുക.
തലയോട്ടിക്ക് താഴെയായി ആരംഭിച്ച് തലവേദന ഉണ്ടാകുക.
തോളെല്ലുകൾക്കിടയിൽ വേദന അനുഭവപ്പെടുക.
തെറ്റായ രീതിയിലുള്ള ഇരിപ്പ് ശീലം കഴുത്തിലെ നട്ടെല്ലിന്റെ സ്വാഭാവിക ആകൃതി മാറ്റാനും, സന്ധികൾ വേഗത്തിൽ തേയ്മാനത്തിന് വിധേയമാകാനും കാരണമാകും. തല മുന്നോട്ട് കുനിച്ച് പിടിക്കുമ്പോൾ അതിനെ താങ്ങിനിർത്താൻ കഴുത്തിലെ പേശികൾക്ക് കൂടുതൽ പ്രയേണ്ടി വരുന്നു. ഇത് പേശികളുടെ ക്ഷീണത്തിനും വിട്ടുമാറാത്ത വേദനയ്ക്കും വഴിവെക്കുന്നു.
പരിഹാരങ്ങൾ
സ്ക്രീൻ എപ്പോഴും കണ്ണിന്റെ നിരപ്പിൽ ക്രമീകരിക്കുക.
നടുവിനും കൈകൾക്കും ആവശ്യമായ താങ്ങ് ഉറപ്പാക്കുക.
ഓരോ 30 മുതൽ 40 മിനിറ്റ് കൂടുമ്പോഴും ജോലിയിൽ നിന്ന് ചെറിയൊരു ഇടവേള എടുത്ത് എഴുന്നേറ്റ് നടക്കുക.
