കുട്ടിക്ക് ഓട്ടിസം സ്പെക്ട്രം ഡിസോർഡർ (ASD) സ്ഥിരീകരിക്കുമ്പോൾ പല മാതാപിതാക്കളുടെയും മനസ്സിൽ ആദ്യം ഉയരുന്ന ചോദ്യമാണ്—“ഗർഭകാലത്ത് ഞങ്ങൾ എന്തെങ്കിലും തെറ്റ് ചെയ്തോ?” കുട്ടിയുടെ അവസ്ഥയ്ക്ക് തങ്ങളാണോ കാരണമെന്ന കുറ്റബോധവും പലരിലും ഉണ്ടാകാറുണ്ട്. എന്നാൽ നിലവിലെ ശാസ്ത്രീയ തെളിവുകൾ പറയുന്നത് ഓട്ടിസത്തിന് ഒരൊറ്റ കാരണം കണ്ടെത്തിയിട്ടില്ലെന്നും മാതാപിതാക്കളുടെ പരിചരണത്തിലെ വീഴ്ചയോ “മോശം parenting”ഓ ഓട്ടിസത്തിന് കാരണമല്ലെന്നുമാണ്.
മസ്തിഷ്കത്തിന്റെ വളർച്ചയിലും പ്രവർത്തനത്തിലും ഉണ്ടാകുന്ന വ്യത്യാസങ്ങളുമായി ബന്ധപ്പെട്ട വികസനാവസ്ഥയാണ് ഓട്ടിസം. ജനിതകവും ജൈവികവും പാരിസ്ഥിതികവുമായ നിരവധി ഘടകങ്ങൾ പരസ്പരം സ്വാധീനിച്ചാകാം ഓട്ടിസം ഉണ്ടാകാനുള്ള സാധ്യത വർധിപ്പിക്കുന്നത്. എന്നാൽ ഓരോ കുട്ടിയിലും ഓട്ടിസത്തിന് കാരണമായ കൃത്യമായ ഘടകം കണ്ടെത്താൻ എല്ലായ്പ്പോഴും സാധിക്കില്ല.
ഗർഭകാലവുമായി ബന്ധപ്പെട്ട ചില ഘടകങ്ങൾ ഓട്ടിസത്തിന്റെ സാധ്യതയുമായി ബന്ധപ്പെട്ടതായി പഠനങ്ങളിൽ കണ്ടെത്തിയിട്ടുണ്ട്. മാതാപിതാക്കളുടെ ഉയർന്ന പ്രായം, ഗർഭകാലത്തെ ചില ആരോഗ്യപ്രശ്നങ്ങൾ, മാസം തികയാതെയുള്ള പ്രസവം, ജനനസമയത്തെ ഗുരുതരമായ സങ്കീർണതകൾ, കുറഞ്ഞ ജനനഭാരം തുടങ്ങിയവയിൽ ചിലത് അപകടസാധ്യതയുമായി ബന്ധപ്പെട്ടതായി WHOയും CDCയും ചൂണ്ടിക്കാട്ടുന്നു. എന്നാൽ ഇവയിൽ ഏതെങ്കിലും ഒരു കാരണമുണ്ടായതുകൊണ്ട് മാത്രം ഒരു കുട്ടിക്ക് ഓട്ടിസം ഉണ്ടാകുമെന്ന് പറയാനാകില്ല.
ചില മരുന്നുകളുടെയും ഗർഭകാലത്തെ മറ്റ് ഘടകങ്ങളുടെയും സ്വാധീനത്തെക്കുറിച്ചും ഗവേഷണം തുടരുകയാണ്. അതേസമയം, ഒരു മരുന്ന് കഴിച്ചതുകൊണ്ടോ ഒരു പ്രത്യേക ഭക്ഷണം കഴിച്ചതുകൊണ്ടോ മാത്രം ഓട്ടിസം ഉണ്ടാകുമെന്ന് ഉറപ്പിച്ച് പറയാനുള്ള തെളിവുകളില്ല. ഗർഭകാലത്ത് മരുന്നുകൾ സ്വമേധയാ നിർത്തുകയോ തുടങ്ങുകയോ ചെയ്യാതെ ഡോക്ടറുടെ നിർദേശം തേടുകയാണ് സുരക്ഷിതമായ മാർഗം.
പ്രധാനമായി, ഓട്ടിസം മാതാപിതാക്കളുടെ തെറ്റല്ല. WHOയുടെ വിവരങ്ങൾ പ്രകാരം മോശം മാതാപിതൃപരിപാലനമാണ് ഓട്ടിസത്തിന് കാരണമെന്നതിന് തെളിവില്ല. അതിനാൽ കുട്ടിക്ക് ഓട്ടിസം സ്ഥിരീകരിച്ചാൽ കുറ്റബോധത്തിൽ കഴിയുന്നതിനുപകരം കുട്ടിയുടെ വികസന ആവശ്യങ്ങൾ തിരിച്ചറിഞ്ഞ് ആവശ്യമായ പിന്തുണയും ഇടപെടലുകളും സമയത്ത് ലഭ്യമാക്കുന്നതിലാണ് ശ്രദ്ധ നൽകേണ്ടത്.
കുട്ടിയുടെ സംസാരശേഷി, സാമൂഹിക ഇടപെടൽ, പെരുമാറ്റം തുടങ്ങിയ മേഖലകളിൽ വികസന വൈകല്യങ്ങൾ ശ്രദ്ധയിൽപ്പെട്ടാൽ വിദഗ്ധരുടെ വിലയിരുത്തൽ തേടുന്നത് പ്രധാനമാണ്. നേരത്തെയുള്ള തിരിച്ചറിയലും ആവശ്യമായ ഇടപെടലുകളും കുട്ടിയുടെ വികസനത്തെ സഹായിക്കുമെന്ന് CDC വ്യക്തമാക്കുന്നു.
 സ്ഥിരീകരിക്കുമ്പോൾ പല മാതാപിതാക്കളുടെയും മനസ്സിൽ ആദ്യം ഉയരുന്ന ചോദ്യമാണ്—“ഗർഭകാലത്ത്){kind=link}