ശരീരഭാരം കുറയ്ക്കാൻ ലക്ഷ്യമിട്ട് ഡയറ്റ് പിന്തുടരുന്നവരുടെ നിരയാണ് ഇന്ന് കൂടുതലും. അത്തരക്കാർക്ക് ഭക്ഷണക്രമത്തിൽ ഒഴിവാക്കാനാവാത്ത ഒന്നായി ആപ്പിൾ സ്മൂത്തി മാറുന്നു. നാരുകളുടെയും വിറ്റാമിനുകളുടെയും സമ്പന്നമായ ഉറവിടമായ ആപ്പിൾ, ശരീരത്തിന് ദോഷകരമായ ബോഡി മാസ് ഇൻഡക്‌സ് (ബി.എം.ഐ) സുരക്ഷിതമായ അളവിൽ ക്രമീകരിക്കാൻ ഏറെ സഹായകരമാണെന്ന് ആരോഗ്യ വിദഗ്ധർ ചൂണ്ടിക്കാണിക്കുന്നു.
ആപ്പിളിൽ അടങ്ങിയിരിക്കുന്ന പെക്റ്റിൻ പോലുള്ള ലയിക്കുന്ന നാരുകളും പോളിഫെനോളുകൾ, ക്വെർസെറ്റിൻ തുടങ്ങിയ സസ്യജന്യ ആന്റിഓക്‌സിഡന്റുകളും ശരീരത്തിലെ ‘മോശം’ കൊളസ്‌ട്രോൾ അഥവാ എൽ.ഡി.എൽ കുറയ്ക്കാൻ മികച്ചതാണ്.
ഇത് രക്തസമ്മർദ്ദം ഫലപ്രദമായി നിയന്ത്രിക്കാനും പക്ഷാഘാതം, ഹൃദ്രോഗം എന്നിവയിൽ നിന്നുള്ള സുപ്രധാന സംരക്ഷണം നൽകാനും സഹായിക്കുന്നു. ഉയർന്ന അളവിലുള്ള ജലാംശവും നാരുകളും വയറു നിറഞ്ഞതായി തോന്നിപ്പിക്കുകയും ദഹനം സാവധാനത്തിലാക്കുകയും ചെയ്യുന്നു. ഇത് അമിതമായ വിശപ്പും ആഗ്രഹങ്ങളും അകറ്റി, അധിക കലോറി ശരീരത്തിലെത്താതെ നിയന്ത്രിക്കാൻ സഹായിക്കുന്ന മികച്ചൊരു മാർഗ്ഗമാണ്.
ആവശ്യമായ ചേരുവകൾ
ആപ്പിൾ – 2 എണ്ണം (ചെറുതായി അരിഞ്ഞത്)
പാൽ – 3 കപ്പ്
ഏലയ്ക്ക – ആവശ്യത്തിന്
പഞ്ചസാര – ആവശ്യത്തിന്
ഐസ്ക്യൂബ് – ആവശ്യത്തിന്
നട്സ് – ആവശ്യത്തിന്
തയ്യാറാക്കുന്ന വിധം
ആദ്യം ആപ്പിൾ വൃത്തിയായി കഴുകി കുരുവും തൊലിയും കളഞ്ഞ് ചെറുതായി അരിഞ്ഞെടുക്കുക. അതിലേക്ക് മധുരത്തിനനുസരിച്ച് പഞ്ചസാരയും 3 കപ്പ് പാലും ചേർത്ത് നന്നായി അരച്ചെടുക്കുക. നന്നായി അരച്ചെടുത്ത ആപ്പിളിലേക്ക് ഏലയ്ക്ക പൊടിച്ചതും ചേർത്ത് മറ്റൊരു പാത്രത്തിലേക്ക് മാറ്റാം. ശേഷം ഒരു ഗ്ലാസിൽ കുറച്ച് നട്സ് ചേർത്ത് ഈ സ്മൂത്തി ഒഴിച്ച്, രണ്ട് ഐസ്ക്യൂബ് കൂടി ചേർത്ത് ഉപയോഗിക്കാവുന്നതാണ്.
ആരോഗ്യകരമായ ജീവിതശൈലിയിലേക്കും ഫിറ്റ്‌നസിലേക്കും എളുപ്പത്തിൽ ചുവടുവെക്കാൻ ആഗ്രഹിക്കുന്നവർക്ക് വീട്ടിൽ തന്നെ തയ്യാറാക്കാവുന്ന ഏറ്റവും മികച്ചൊരു പാനീയമാണിത്.
