കൊളസ്‌ട്രോള്‍ ഇന്നത്തെ കാലത്ത് ചെറുപ്പക്കാരെ പോലും അലട്ടുന്ന ഒന്നാണ്. ഹൃദയാരോഗ്യത്തെ തകരാറിലാക്കുന്നു എന്നതാണ് ഇതുണ്ടാക്കുന്ന പ്രധാനപ്പെട്ട പ്രശ്‌നം. ശരീരത്തില്‍ നല്ലതും മോശവുമായ കൊളസ്‌ട്രോളുണ്ട്. എല്‍ഡിഎല്‍ മോശം കൊളസ്‌ട്രോളും എച്ച്ഡിഎല്‍ നല്ല കൊളസ്‌ട്രോളുമാണ്. എല്‍ഡിഎല്‍ കുറയ്ക്കുക, എച്ച്ഡിഎല്‍ കൂട്ടുക എന്നതാണ് ഹൃദയാരോഗ്യത്തിനും ശാരീരിക ആരോഗ്യത്തിനും ഗുണം ചെയ്യുക. കൊളസ്‌ട്രോള്‍ പോലുളള രോഗങ്ങള്‍ ഹൃദയവുമായി ബന്ധപ്പെട്ടിരിയ്ക്കുന്ന ഒന്നാണ്. ഹൃദയത്തിലേയ്ക്കുള്ള രക്തപ്രവാഹം തടസപ്പെടുത്തി ഹൃദയാഘാതം പോലുളള പ്രശ്‌നങ്ങള്‍ക്ക് വഴിയൊരുക്കുന്ന ഒന്നാണ്. പല കാര്യങ്ങളും കൊളസ്ട്രോൾ ലെവലിനെ ബാധിക്കും. ഒരാളുടെ പ്രായം, ജനിതക പാരമ്പര്യം , പുകവലി പോലുള്ള ശീലങ്ങൾ, പ്രായം, വ്യായാമം തുടങ്ങി പല കാര്യങ്ങളും അതിൽ ഉൾപ്പെടും.
മുരിങ്ങ ടീ
മുരിങ്ങ ടീ കൊണ്ട് ദിവസം ആരംഭിയ്ക്കുകയെന്നത് ഏറെ ഗുണം നല്‍കും. മുരിങ്ങയിലെ ഐസോസയനേറ്റുകള്‍ക്ക് കൊളസ്‌ട്രോള്‍ കുറയ്ക്കാനുള്ള കഴിവുണ്ട്. ഇത് മൃഗങ്ങളില്‍ പരീക്ഷിച്ച് തെളിഞ്ഞതുമാണ്. രാവിലെ മുരിങ്ങായില ഇട്ട് വെള്ളം തിളപ്പിച്ച് കുടിയ്ക്കാം. ഇതിലേയ്ക്ക് വേണമെങ്കില്‍ തേന്‍ കൂടി ചേര്‍ക്കാം. ഇതല്ലെങ്കില്‍ മുരിങ്ങയില പൊടി ചേര്‍ത്ത് തിളപ്പിച്ച് കുടിയ്ക്കാം. ഇത് ദിവസവും ചെയ്യാവുന്നതാണ്. ഇതല്ലെങ്കില്‍ സാധാരണ കട്ടന്‍ചായയ്‌ക്കോ മറ്റോ വെള്ളം തിളപ്പിയ്ക്കുമ്പോള്‍ ഇതില്‍ അല്‍പം മുരിങ്ങയിലയോ പൊടിയോ ചേര്‍ക്കാം. ഇതോടെ ദിവസം തുടങ്ങുന്നത് കൊളസ്‌ട്രോള്‍ കുറയ്ക്കാന്‍ നല്ലതാണ്. കൊളസ്‌ട്രോള്‍ മാത്രമല്ല, ബിപിയും പ്രമേഹവും കുറയ്ക്കാനും ഇത് സഹായിക്കുന്നു.
നടപ്പ്
ദിനവും അര മണിക്കൂര്‍ നടപ്പ് ശീലമാക്കുക. ഇത് കൊളസ്‌ട്രോള്‍ കുറയ്ക്കാന്‍ ഏറെ നല്ലതാണ്. ഇത് നല്ല കൊളസ്‌ട്രോള്‍ വര്‍ദ്ധിപ്പിയ്ക്കുകയും മോശം കൊളസ്‌ട്രോള്‍ കുറയ്ക്കുകയും ചെയ്യുമെന്ന് പഠനങ്ങള്‍ തെളിയിച്ചിട്ടുണ്ട്. ദിവസവും അര മണിക്കൂര്‍ വച്ച് നടക്കുന്നത് കാര്‍ഡിയോ ആരോഗ്യം മെച്ചപ്പെടുത്തുമെന്ന് ഹാര്‍വാര്‍ഡ് നടത്തിയ പഠനത്തില്‍ തെളിഞ്ഞിട്ടുണ്ട്. ശരീരത്തിന്റെ ആകെയുള്ള ആരോഗ്യത്തിനും നടപ്പ് നല്ലതാണ്. വേഗത്തില്‍, നിവര്‍ന്ന് കൈകള്‍ വീശി നടക്കുക. കുറഞ്ഞത് 30 മിനിറ്റെങ്കിലും വ്യായാമത്തിൽ ഏർപ്പെടുന്നത് ഹൃദയത്തിന്റെ പ്രവർത്തനം മെച്ചപ്പെടുത്തും.
ഭക്ഷണം
ധാരാളം നാരുകള്‍ കലര്‍ന്ന ഭക്ഷണം കഴിയ്ക്കാം. പ്രത്യേകിച്ചും സോലുബിള്‍ ഫൈബര്‍. ഓട്‌സ്, ആപ്പിള്‍, ബീന്‍സ് എന്നിവയെല്ലാം ഇത്തരത്തിലുള്ളതാണ്. ഇത് ദഹനപ്രക്രിയ ശക്തിപ്പെടുത്തി ഇതിലൂടെ കൊളസ്‌ട്രോള്‍ നീക്കാനും സഹായിക്കുന്നു. ദിവസവും 5-10 ഗ്രാം വരെ സോലുബിള്‍ കൊളസ്‌ട്രോള്‍ കഴിയ്ക്കുന്നത് 5-10 ശതമാനം കൊളസ്‌ട്രോള്‍ കുറയ്ക്കാന്‍ സഹായിക്കുന്നതായി പഠനങ്ങള്‍ കണ്ടെത്തിയിട്ടുണ്ട്. ഇതുപോലെ ആരോഗ്യകരമായ കൊഴുപ്പുകള്‍ കഴിയ്ക്കുക. അവോക്കാഡോ, നട്‌സ്, ഒലീവ് ഓയില്‍ എന്നിവയെല്ലാം ഇതിന് സഹായിക്കുന്നവയാണ്.
ദിവസവും 5 ശതമാനം സാച്വറേറ്റഡ് ഫാറ്റിനൊപ്പം അണ്‍സാച്വറേറ്റ് ഫാറ്റ് കൂടി കഴിയ്ക്കുന്നത് ഹൃദയസംബന്ധമായ പ്രശ്‌നങ്ങളുടെ പരിഹാരത്തിന് സഹായിക്കുന്നു. ഒമേഗ 3 ഫാററി ആസിഡുകള്‍ കൊളസ്‌ട്രോള്‍ കുറയ്ക്കും. ഇതുപോലെ മധുരം കുറയ്ക്കുക. ആവശ്യമെങ്കില്‍ നാച്വറല്‍ ഫാറ്റ് മാത്രം ഉപയോഗിയ്ക്കുക. ഇതും ഏറെ ഗുണകരമാണ്. മധുരം ട്രൈഗ്ലിസറൈഡുകള്‍ വര്‍ദ്ധിപ്പിയ്ക്കാന്‍ കാരണമാകുന്നു. ഇത് ആകെയുള്ള കൊളസ്‌ട്രോള്‍ തോതും വര്‍ദ്ധിപ്പിയ്ക്കുന്നു. അതായത് മധുരം കഴിയ്ക്കുന്നത് പ്രമേഹം മാത്രമല്ല, കൊളസ്‌ട്രോള്‍ കൂടി വര്‍ദ്ധിപ്പിയ്ക്കാന്‍ സഹായിക്കും എന്നര്‍ത്ഥം.
ഉറങ്ങുക
നല്ലതുപോലെ ഉറങ്ങുക. ഇത് ആരോഗ്യകരമായ കൊളസ്‌ട്രോള്‍ തോത് വര്‍ദ്ധിയ്ക്കാന്‍ സഹായിക്കുന്നു. ഉറക്കക്കുറവ് എല്‍ഡിഎല്‍ കൂടാനും എച്ച്ഡിഎല്‍ കുറയാനും ഇടയാക്കുന്നു. ദിനവും 8 മണിക്കൂര്‍ ഉറക്കം ശീലമാക്കുന്നത് ഏറെ നല്ലതാണ്. ഇതിന് സഹായിക്കുന്ന വഴികള്‍ അവലംബിയ്ക്കുക. ഉറങ്ങുമ്പോള്‍ അത് നല്ല ഉറക്കമാകാന്‍ ശ്രദ്ധിയ്ക്കുക. സ്‌ട്രെസ് പോലുള്ള കാര്യങ്ങള്‍ ഉറക്കക്കുറവിന് ഇടയാക്കുന്ന ഒന്നാണ്. ഇത്തരം കാര്യങ്ങള്‍ നിയന്ത്രിയ്ക്കാന്‍ ശ്രദ്ധിയ്ക്കണം.
