ക്യാൻസർ പ്രതിരോധത്തിനുള്ള വഴികളെക്കുറിച്ചുള്ള അന്വേഷണങ്ങൾക്കിടയിൽ, മരുന്നുകൾക്കും ചികിത്സകൾക്കും അപ്പുറം സ്നേഹവും സാമൂഹിക പിന്തുണയും രോഗത്തെ ചെറുക്കുമെന്ന് പുതിയ പഠനങ്ങൾ തെളിയിക്കുന്നു. ക്യാൻസർ റിസർച്ച് കമ്മ്യൂണിക്കേഷനിൽ പ്രസിദ്ധീകരിച്ച പുതിയ ഗവേഷണ റിപ്പോർട്ട് അനുസരിച്ച്, വിവാഹബന്ധം വ്യക്തികളുടെ ആരോഗ്യത്തിൽ വലിയ സ്വാധീനം ചെലുത്തുന്നുണ്ട്. അവിവാഹിതരായ വ്യക്തികളിൽ വിവാഹിതരെ അപേക്ഷിച്ച് ക്യാൻസർ വരാനുള്ള സാധ്യത വളരെയധികം കൂടുതലാണെന്നാണ് ഈ പഠനം വ്യക്തമാക്കുന്നത്.
ഗവേഷണത്തിലെ കണക്കുകൾ പ്രകാരം, വിവാഹം കഴിക്കാത്ത പുരുഷന്മാരിൽ 68 ശതമാനവും സ്ത്രീകളിൽ 83 ശതമാനവും അധികമായി ക്യാൻസർ സാധ്യത നിലനിൽക്കുന്നുണ്ട്. വിവാഹം വ്യക്തികൾക്ക് നൽകുന്ന വൈകാരികവും സാമൂഹികവുമായ സുരക്ഷിതത്വമാണ് ഇതിൽ പ്രധാന പങ്കുവഹിക്കുന്നത്. പങ്കാളിയിൽ നിന്നുള്ള കരുതൽ മൂലം ആരോഗ്യപ്രശ്നങ്ങൾ ഉണ്ടാകുമ്പോൾ നേരത്തെ വൈദ്യസഹായം തേടാനുള്ള പ്രവണത വിവാഹിതരിൽ കൂടുതലാണ്. കൂടാതെ പുകവലി, അമിത മദ്യപാനം തുടങ്ങിയ ആരോഗ്യത്തിന് ഹാനികരമായ ശീലങ്ങളിൽ ഏർപ്പെടാനുള്ള സാധ്യതയും ഇവർക്കിടയിൽ കുറവാണെന്ന് പഠനം നിരീക്ഷിക്കുന്നു.
സ്ത്രീകളുടെ കാര്യത്തിൽ ജൈവശാസ്ത്രപരമായ ചില ഘടകങ്ങളും ഇതിന് പിന്നിലുണ്ട്. ഒരിക്കലും പ്രസവിക്കാത്ത സ്ത്രീകളിൽ അണ്ഡാശയ അർബുദം പോലുള്ള രോഗങ്ങൾക്ക് സാധ്യത കൂടുതലാണെന്ന് വിദഗ്ധർ ചൂണ്ടിക്കാട്ടുന്നു. ഇതിനുപുറമെ, കൃത്യമായ ആരോഗ്യ ഇൻഷുറൻസ് പരിരക്ഷയും കുടുംബത്തിൽ നിന്നുള്ള സ്ഥിരമായ പരിചരണവും വിവാഹിതർക്ക് അനുകൂലമായ ഘടകങ്ങളാണ്. ജോൺസ് ഹോപ്കിൻസ് സർവകലാശാലയിലെ വിദഗ്ധരുടെ അഭിപ്രായത്തിൽ, വിവാഹം സൃഷ്ടിക്കുന്ന സ്ഥിരതയുള്ള അന്തരീക്ഷം മൊത്തത്തിലുള്ള ശാരീരിക-മാനസിക ആരോഗ്യത്തെ മെച്ചപ്പെടുത്തുന്നു.
എന്നിരുന്നാലും, വിവാഹബന്ധം മാത്രമല്ല, ശക്തമായ സാമൂഹിക ബന്ധങ്ങളാണ് ക്യാൻസറിനെ ചെറുക്കുന്നതിൽ യഥാർത്ഥത്തിൽ സഹായിക്കുന്നതെന്ന് ഗവേഷകർ വ്യക്തമാക്കുന്നുണ്ട്. സുഹൃത്തുക്കൾ, കുടുംബം, അല്ലെങ്കിൽ മറ്റ് കമ്മ്യൂണിറ്റി ഗ്രൂപ്പുകൾ എന്നിവരിൽ നിന്ന് ലഭിക്കുന്ന വൈകാരിക പിന്തുണ രോഗമുക്തി നിരക്ക് വർദ്ധിപ്പിക്കാൻ സഹായിക്കും. ലോകത്ത് വിവാഹബന്ധങ്ങൾ കുറഞ്ഞുവരുന്ന സാഹചര്യത്തിൽ, ഒറ്റപ്പെട്ടുപോകാതെ മറ്റേതെങ്കിലും തരത്തിലുള്ള പിന്തുണാ സംവിധാനങ്ങൾ വളർത്തിയെടുക്കേണ്ടത് രോഗപ്രതിരോധത്തിന് അനിവാര്യമാണെന്ന് ഈ പഠനം ഓർമ്മിപ്പിക്കുന്നു. കൃത്യമായ പരിശോധനകളും സ്ക്രീനിംഗും ആരോഗ്യകരമായ സാമൂഹിക ജീവിതവും ക്യാൻസർ എന്ന വിപത്തിനെ അകറ്റിനിർത്താൻ സഹായിക്കും
