ബാക്കിവരുന്ന പാകം ചെയ്ത ഭക്ഷണങ്ങൾ ഫ്രിഡ്ജിൽ സൂക്ഷിക്കുന്നത് സാധാരണമായ ശീലമാണ്. ഇതിലൂടെ ഭക്ഷണം ദിവസങ്ങളോളം ഉപയോഗിക്കാനാകുമെങ്കിലും, ശരിയായ രീതിയിൽ സൂക്ഷിക്കാതിരുന്നാൽ ഭക്ഷണം പെട്ടെന്ന് കേടുവരും. ഇങ്ങനെ കേടുവന്ന ഭക്ഷണം വീണ്ടും ചൂടാക്കി കഴിക്കുന്നത് ആരോഗ്യത്തിന് ദോഷകരമാണെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. ഭക്ഷണം സുരക്ഷിതമായി സൂക്ഷിക്കാൻ ശ്രദ്ധിക്കേണ്ട പ്രധാന കാര്യങ്ങൾ ഇവയാണ്.
പാകം ചെയ്ത ഭക്ഷണങ്ങൾ അധികനേരം റൂം ടെമ്പറേച്ചറിൽ വെക്കരുത്. രണ്ടുമണിക്കൂറിൽ കൂടുതൽ പുറത്ത് സൂക്ഷിച്ചാൽ ഭക്ഷണത്തിൽ ബാക്ടീരിയകൾ വളരാൻ സാധ്യതയുണ്ട്. ഇത് ഭക്ഷണം പെട്ടെന്ന് കേടുവരാനും ആരോഗ്യപ്രശ്നങ്ങൾക്കും കാരണമാകാം.
ചൂടുള്ള ഭക്ഷണം നേരിട്ട് ഫ്രിഡ്ജിൽ വെക്കുന്നതും ഒഴിവാക്കണം. ഭക്ഷണം നന്നായി തണുത്തതിന് ശേഷം മാത്രമേ ഫ്രിഡ്ജിൽ സൂക്ഷിക്കാവൂ. ചൂടുള്ള ഭക്ഷണം ഉടൻ ഫ്രിഡ്ജിൽ വെച്ചാൽ താപനിലയിലെ മാറ്റം മൂലം ഭക്ഷണത്തിന്റെ ഗുണനിലവാരം കുറയുകയും അത് വേഗത്തിൽ നശിക്കുകയും ചെയ്യും. അതിനാൽ കുറഞ്ഞത് അരമണിക്കൂർ വരെ ഭക്ഷണം തണുക്കാൻ അനുവദിക്കണം.
ഫ്രിഡ്ജിൽ നിന്ന് പുറത്തെടുത്ത ഭക്ഷണം വീണ്ടും ഫ്രിഡ്ജിൽ സൂക്ഷിക്കുന്നത് ഒഴിവാക്കുന്നതാണ് നല്ലത്. ഒരിക്കൽ പുറത്തെടുത്ത ഭക്ഷണം ഒരുതവണ മാത്രമേ ഉപയോഗിക്കാവൂ. പലതവണ ഫ്രിഡ്ജിൽ വെക്കുകയും പുറത്തെടുക്കുകയും ചെയ്യുന്നത് ഭക്ഷണം എളുപ്പത്തിൽ കേടുവരാൻ ഇടയാക്കും.
ഓരോ ഭക്ഷണസാധനത്തിനും സൂക്ഷിക്കേണ്ട രീതികൾ വ്യത്യസ്തമാണെന്നും ശ്രദ്ധിക്കണം. ജലാംശം കൂടുതലുള്ള ഭക്ഷണങ്ങൾ പെട്ടെന്ന് നശിക്കാനുള്ള സാധ്യത കൂടുതലാണ്. അതിനാൽ ഇത്തരം ഭക്ഷണങ്ങൾ പ്രത്യേകം സൂക്ഷിക്കുകയും കഴിയുന്നത്ര വേഗം ഉപയോഗിക്കുകയും ചെയ്യുന്നത് സുരക്ഷിതമാണ്.
ഭക്ഷണം ശരിയായ രീതിയിൽ സൂക്ഷിക്കുന്നത് ആരോഗ്യ സംരക്ഷണത്തിന് അനിവാര്യമാണെന്നും, ചെറിയ അശ്രദ്ധ പോലും ഭക്ഷ്യവിഷബാധ പോലുള്ള പ്രശ്നങ്ങളിലേക്ക് നയിക്കാമെന്നും വിദഗ്ധർ ഓർമ്മിപ്പിക്കുന്നു.
