ശരീരത്തിന്റെ മൊത്തത്തിലുള്ള ആരോഗ്യത്തിന്റെ പ്രതിഫലനമാണ് കുടലിന്റെ ആരോഗ്യം. എന്നാൽ ഇന്നത്തെ മാറിയ ജീവിതശൈലിയിലും ഭക്ഷണരീതിയിലും പലരും കുടലിന്റെ ആരോഗ്യത്തെ ഗൗരവമായി കാണുന്നില്ല. ദഹനപ്രക്രിയയെ മാത്രമല്ല, ശരീരത്തിന്റെ പ്രതിരോധശേഷിയെയും മാനസികാരോഗ്യത്തെയും പോലും കുടലിലെ മാറ്റങ്ങൾ സ്വാധീനിക്കുന്നുണ്ട്. കുടലിന്റെ ആരോഗ്യം നശിപ്പിക്കുന്ന പ്രധാന വില്ലൻ ശീലങ്ങൾ താഴെ പറയുന്നവയാണ്.
- സംസ്കരിച്ച ഭക്ഷണങ്ങളുടെ ഉപയോഗം
ടിന്നിലടച്ചതും ദീർഘകാലം കേടു കൂടാതെ സൂക്ഷിക്കുന്നതുമായ ഭക്ഷണങ്ങളിൽ അടങ്ങിയിരിക്കുന്ന അനാരോഗ്യകരമായ കൊഴുപ്പുകളും പ്രിസർവേറ്റീവുകളും കുടലിലെ ഗുണകരമായ ബാക്ടീരിയകളെ നശിപ്പിക്കുന്നു. ഇത് ദഹനക്കേടിനും മറ്റ് ആമാശയ രോഗങ്ങൾക്കും കാരണമാകുന്നു.
- അമിതമായ പഞ്ചസാരയും ഉപ്പും
മധുരത്തിന്റെ അമിത ഉപയോഗം കുടലിലെ മൈക്രോബയോമിനെ അസന്തുലിതമാക്കുന്നു. അതുപോലെ തന്നെ ഉപ്പുകൂടിയ ഭക്ഷണങ്ങൾ ശരീരത്തിൽ ജലാംശം നിലനിർത്തുകയും കുടലിന്റെ സ്വാഭാവിക ചലനങ്ങളെ തടസ്സപ്പെടുത്തുകയും ചെയ്യുന്നു.
- എണ്ണയിൽ പൊരിച്ച ഭക്ഷണങ്ങൾ
എണ്ണയിൽ വറുത്തതും പൊരിച്ചതുമായ ഭക്ഷണങ്ങൾ ദഹിക്കാൻ പ്രയാസമാണ്. ഇവ കുടലിൽ വീക്കം ഉണ്ടാക്കാനും അസിഡിറ്റി പോലുള്ള പ്രശ്നങ്ങൾ വർധിപ്പിക്കാനും ഇടയാക്കുന്നു.
- റെഡ് മീറ്റിന്റെ അമിത ഉപയോഗം
പോത്തിറച്ചി, ആട്ടിറച്ചി തുടങ്ങിയ റെഡ് മീറ്റുകൾ അമിതമായി കഴിക്കുന്നത് കുടൽ ആരോഗ്യത്തിന് നല്ലതല്ല. ഇവ ദഹിക്കാൻ കൂടുതൽ സമയം എടുക്കുന്നതിനാൽ കുടലിലെ സൂക്ഷ്മാണുക്കളുടെ പ്രവർത്തനത്തെ ഇത് ബാധിക്കുന്നു.
- നാരുകളുടെ അഭാവം
ഭക്ഷണത്തിൽ പച്ചക്കറികളും പഴവർഗങ്ങളും ഉൾപ്പെടുത്താത്തത് മലബന്ധത്തിന് കാരണമാകുന്നു. കുടലിന്റെ ശുദ്ധീകരണത്തിന് നാരുകൾ അത്യാവശ്യമാണ്. നാരുകൾ കുറയുന്നത് കുടലിലെ ചീത്ത ബാക്ടീരിയകൾ വളരാൻ സഹായിക്കുന്നു.
- മാനസിക സമ്മർദ്ദവും ഉറക്കമില്ലായ്മയും
കുടലിന്റെ പ്രവർത്തനത്തെ നിയന്ത്രിക്കുന്നതിൽ മസ്തിഷ്കത്തിന് വലിയ പങ്കുണ്ട്. നിരന്തരമായ സ്ട്രെസ് കുടലിന്റെ ചലനശേഷിയെ ബാധിക്കും. കൂടാതെ മതിയായ ഉറക്കം ലഭിക്കാത്തത് ഹോർമോൺ വ്യതിയാനങ്ങളുണ്ടാക്കുകയും ദഹനവ്യവസ്ഥയെ തകിടം മറിക്കുകയും ചെയ്യുന്നു.
പരിഹാരം: നാരുകൾ അടങ്ങിയ ഭക്ഷണങ്ങൾ ധാരാളമായി കഴിക്കുക, ധാരാളം വെള്ളം കുടിക്കുക, കൃത്യസമയത്ത് ഉറങ്ങുക, വ്യായാമം ശീലമാക്കുക എന്നിവയിലൂടെ കുടലിന്റെ ആരോഗ്യം വീണ്ടെടുക്കാം.
