മാനസികാരോഗ്യ സംരക്ഷണത്തിനായി തെറാപ്പിയും കൗൺസിലിംഗും തേടുന്നവർ ഇൻഷുറൻസ് പോളിസിയുടെ നിബന്ധനകൾ കൃത്യമായി പരിശോധിക്കണമെന്ന് വിദഗ്ധരുടെ മുന്നറിയിപ്പ്. മാനസികാരോഗ്യ ചികിത്സകൾക്ക് ഇൻഷുറൻസ് പരിരക്ഷ ലഭ്യമാണെങ്കിലും, എല്ലാ ചികിത്സാ ചെലവുകളും ഇൻഷുറൻസ് കമ്പനി തിരിച്ചുനൽകണമെന്നില്ല. പോളിസിയിലെ വ്യവസ്ഥകൾ മനസ്സിലാക്കാതെ ഇൻഷുറൻസ് എടുക്കുകയോ പുതുക്കുകയോ ചെയ്താൽ സാമ്പത്തിക നഷ്ടമുണ്ടാകാനും സാധ്യതയുണ്ട്.
2017ലെ മാനസികാരോഗ്യ സംരക്ഷണ നിയമത്തിലെ സെക്ഷൻ 21(4) പ്രകാരം, ശാരീരിക രോഗങ്ങൾക്കുള്ളതുപോലെ മാനസിക രോഗങ്ങൾക്കും ആരോഗ്യ ഇൻഷുറൻസ് പരിരക്ഷ നൽകണം. ഇൻഷുറൻസ് നിയന്ത്രണ അതോറിറ്റിയായ ഐ.ആർ.ഡി.എ.ഐയും ഇതുമായി ബന്ധപ്പെട്ട വ്യവസ്ഥകൾ പാലിക്കണമെന്ന് നിർദേശിച്ചിട്ടുണ്ട്.
എന്നാൽ മാനസികാരോഗ്യ ചികിത്സകളുടെ എല്ലാ വിഭാഗങ്ങൾക്കും ഒരേ രീതിയിലുള്ള പരിരക്ഷ ലഭിക്കണമെന്നില്ല. മാനസികാരോഗ്യ പ്രശ്നങ്ങളുമായി ബന്ധപ്പെട്ട ആശുപത്രിവാസം പല പോളിസികളും ഉൾക്കൊള്ളുമ്പോൾ, ആശുപത്രിയിൽ പ്രവേശിക്കാതെ നടത്തുന്ന ഔട്ട്‌പേഷ്യന്റ് തെറാപ്പി, കൗൺസിലിംഗ് തുടങ്ങിയവയ്ക്ക് പരിരക്ഷ പരിമിതമായിരിക്കാം.
സൈക്യാട്രിസ്റ്റിന്റെ കൺസൾട്ടേഷൻ, ഡോക്ടർ നിർദേശിക്കുന്ന മരുന്നുകൾ, സൈക്കോതെറാപ്പി എന്നിവയ്ക്കുള്ള ആനുകൂല്യങ്ങളും പോളിസികൾക്കനുസരിച്ച് വ്യത്യാസപ്പെടാം. ചില ഇൻഷുറൻസ് കമ്പനികൾ നിശ്ചിത എണ്ണം കൗൺസിലിംഗ് സെഷനുകൾ മാത്രമായിരിക്കും അനുവദിക്കുക. ഓരോ സെഷനും ലഭിക്കുന്ന തുകയുടെ പരിധിയും വാർഷിക ആനുകൂല്യത്തിന്റെ പരമാവധി തുകയും ശ്രദ്ധിക്കേണ്ടതാണ്.
വലിയ തുകയുടെ ആരോഗ്യ ഇൻഷുറൻസ് പരിരക്ഷയുണ്ടെന്നതുകൊണ്ട് ഔട്ട്‌പേഷ്യന്റ് തെറാപ്പിയുടെ മുഴുവൻ ചെലവും ലഭിക്കുമെന്ന് ഉറപ്പില്ല. അതിനാൽ പുതിയ പോളിസി എടുക്കുന്നതിന് മുൻപും നിലവിലുള്ളത് പുതുക്കുമ്പോഴും കസ്റ്റമർ ഇൻഫർമേഷൻ ഷീറ്റിലെ (CIS) വ്യവസ്ഥകൾ വിശദമായി പരിശോധിക്കണം. തെറാപ്പി, കൗൺസിലിംഗ്, മരുന്നുകൾ എന്നിവയ്ക്ക് ലഭിക്കുന്ന പരിരക്ഷ, സെഷനുകളുടെ എണ്ണം, ക്ലെയിം പരിധി എന്നിവയെക്കുറിച്ച് ഇൻഷുറൻസ് കമ്പനിയോട് വ്യക്തത തേടുന്നതും പ്രധാനമാണ്.
