വയനാട്: ബത്തേരിയിൽ ശാരീരിക അസ്വസ്ഥത അനുഭവപ്പെട്ട രണ്ട് കുട്ടികൾക്ക് ഷിഗെല്ല രോഗബാധ സ്ഥിരീകരിച്ചു. കോളിയാടി മാർ ബസേലിയോസ് സ്കൂളിലെ വിദ്യാർഥികൾക്കാണ് രോഗം സ്ഥിരീകരിച്ചത്. മാനന്തവാടി മെഡിക്കൽ കോളേജിലെ ലബോറട്ടറി പരിശോധനയിലാണ് ഷിഗെല്ല കണ്ടെത്തിയത്.
സമാന ലക്ഷണങ്ങളായ ഛർദി, വയറിളക്കം തുടങ്ങിയവ അനുഭവപ്പെട്ട 339 വിദ്യാർഥികൾ നിലവിൽ ബത്തേരിയിലെ വിവിധ ആശുപത്രികളിലായി ചികിത്സയിലാണ്. കഴിഞ്ഞ വ്യാഴാഴ്ചയാണ് നിരവധി കുട്ടികൾ അസ്വസ്ഥത അനുഭവപ്പെട്ടതിനെ തുടർന്ന് ചികിത്സ തേടിയത്.
രോഗബാധ സ്ഥിരീകരിച്ച സാഹചര്യത്തിൽ കുട്ടികളുടെ കുടുംബാംഗങ്ങൾക്ക് ആരോഗ്യവകുപ്പ് മുൻകരുതൽ നിർദേശങ്ങൾ നൽകിയിട്ടുണ്ട്. നിലവിൽ 25 കുട്ടികൾ ആശുപത്രികളിൽ അഡ്മിറ്റായിട്ടുണ്ടെന്നും ആശങ്കപ്പെടേണ്ട സാഹചര്യമില്ലെന്നും ആരോഗ്യമന്ത്രി K. Muralidharan അറിയിച്ചു.
സംഭവത്തെ തുടർന്ന് നാളെ വയനാട് സന്ദർശിക്കുമെന്നും മന്ത്രി വ്യക്തമാക്കി. ഡിസ്ചാർജ് ചെയ്ത കുട്ടികളുടെ വീടുകളിൽ ആരോഗ്യവകുപ്പ് പ്രത്യേക അന്വേഷണം നടത്തും. മറ്റ് ആരോഗ്യപ്രശ്നങ്ങൾ ഉണ്ടോയെന്ന് പരിശോധിക്കുമെന്നും അദ്ദേഹം പറഞ്ഞു.
ഭക്ഷ്യസുരക്ഷ ഉറപ്പാക്കുന്നതിനായി സംസ്ഥാനത്തുടനീളം ശക്തമായ പരിശോധന നടത്താൻ ഫുഡ് ആൻഡ് സേഫ്റ്റി കമ്മീഷണർക്ക് നിർദേശം നൽകിയിട്ടുണ്ടെന്നും മന്ത്രി അറിയിച്ചു. ഡിഎംഒമാർക്ക് ജാഗ്രതാ നിർദേശങ്ങളും നൽകിയിട്ടുണ്ട്. വൃത്തിഹീനമായ സാഹചര്യങ്ങളിൽ പ്രവർത്തിക്കുന്ന തട്ടുകടകൾക്കും ഭക്ഷണശാലകൾക്കുമെതിരെ കർശന നടപടി സ്വീകരിക്കുമെന്നും ആരോഗ്യമന്ത്രി മുന്നറിയിപ്പ് നൽകി.
സംഭവത്തിന്റെ പശ്ചാത്തലത്തിൽ ആരോഗ്യവകുപ്പും ഭക്ഷ്യസുരക്ഷാ വിഭാഗവും സംയുക്തമായി അന്വേഷണം തുടരുകയാണ്.
