സ്ത്രീകളിലെ ഹൃദയാരോഗ്യവുമായി ബന്ധപ്പെട്ട് അടുത്തിടെ പുറത്തുവന്ന ഒരു പഠനം ആരോഗ്യലോകത്ത് ഏറെ ചർച്ചയാകുന്നുണ്ട്. ആർത്തവവിരാമത്തിനു ശേഷമാണ് ഹൃദയസംബന്ധമായ പ്രശ്നങ്ങൾ കൂടുതലായി കണ്ടുവരുന്നത് എന്ന ധാരണയെ തിരുത്തിക്കുറിച്ചുകൊണ്ട്, സ്ത്രീകളിൽ ഹൃദയത്തിലെ വാർദ്ധക്യലക്ഷണങ്ങൾ 30-കളുടെ അവസാനത്തിൽ തന്നെ തുടങ്ങാമെന്നാണ് പുതിയ ഗവേഷണങ്ങൾ വ്യക്തമാക്കുന്നത്. പ്രശസ്തമായ ‘ഹൈപ്പർടെൻഷൻ’ ജേണലിൽ ഈ അടുത്തിടെയാണ് ഈ പഠനം പ്രസിദ്ധീകരിച്ചിരിക്കുന്നത്.
ഫ്രെയിമിംഗ്ഹാം ഹാർട്ട് സ്റ്റഡിയുടെ ഭാഗമായി 9,500-ലധികം പേരിൽ നടത്തിയ ഡാറ്റ വിശകലനത്തിലാണ് ഈ നിർണായക കണ്ടെത്തലുള്ളത്. പ്രായത്തിനനുസരിച്ച് സ്ത്രീകളിലും പുരുഷന്മാരിലും പൾസ് മർദ്ദം എങ്ങനെ വ്യത്യാസപ്പെടുന്നു എന്നാണ് ഗവേഷകർ പരിശോധിച്ചത്. രക്തസമ്മർദ്ദത്തിലെ സിസ്റ്റോളിക്, ഡയസ്റ്റോളിക് സംഖ്യകൾ തമ്മിലുള്ള വ്യത്യാസമാണ് പൾസ് മർദ്ദം എന്നത് കൊണ്ട് അർത്ഥമാക്കുന്നത്.
പഠനഫലങ്ങൾ പ്രകാരം, സ്ത്രീകളിൽ പൾസ് പ്രഷർ 30-കളുടെ അവസാനത്തിൽ തന്നെ ഉയരാൻ തുടങ്ങുന്നുണ്ട്. എന്നാൽ പുരുഷന്മാരിൽ ഇത് 40-കളുടെ അവസാനത്തിലാണ് ആരംഭിക്കുന്നത്. ഏകദേശം 47-ാമത്തെ വയസ്സിൽ സ്ത്രീകളിൽ പൾസ് മർദ്ദം കുറയുന്നതിൽ നിന്ന് ഉയരുന്നതിലേക്കുള്ള മാറ്റം സംഭവിക്കുന്നു. തുടർന്ന് 60 വയസ്സ് ആകുമ്പോഴേക്കും പുരുഷന്മാരേക്കാൾ ഉയർന്ന പൾസ് മർദ്ദം സ്ത്രീകൾക്ക് ഉണ്ടെന്ന് കണ്ടെത്തുകയുണ്ടായി.
ഈ മാറ്റങ്ങൾക്ക് ആർത്തവവിരാമത്തിന്റെ സമയവുമായി നേരിട്ട് ബന്ധമില്ലെന്നും പഠനം തെളിയിക്കുന്നു. ആർത്തവവിരാമം നേരത്തെയാണോ വൈകിയാണോ എന്നത് ഈ പ്രക്രിയയെ ബാധിക്കുന്നില്ല. പകരം പ്രധാന ധമനിയായ അയോർട്ടയുടെ ഘടനയിലും കാഠിന്യത്തിലുമുണ്ടാകുന്ന മാറ്റങ്ങളാണ് പൾസ് മർദ്ദം ഉയരുന്നതിന് പ്രധാന കാരണമെന്ന് ഗവേഷകർ ചൂണ്ടിക്കാണിക്കുന്നു.
എന്നിരുന്നാലും, ഈ കണ്ടെത്തലുകൾ അർത്ഥമാക്കുന്നത് 30-കളുടെ അവസാനത്തിലുള്ള എല്ലാ സ്ത്രീകൾക്കും ഹൃദ്രോഗം വരുമെന്നല്ല. പൾസ് മർദ്ദം എന്നത് ഒരു ഹൃദയ സംബന്ധമായ അളവുകോൽ മാത്രമാണ്, അതൊരു രോഗനിർണയമല്ല. എന്നിരുന്നാലും, ഹൃദയാരോഗ്യം മുൻകൂട്ടി സംരക്ഷിക്കേണ്ടതിന്റെ പ്രാധാന്യമാണ് ഇത് ഓർമ്മിപ്പിക്കുന്നത്.
ഭാവിയിലെ ആരോഗ്യപ്രശ്നങ്ങൾ ഒഴിവാക്കാൻ ചെറുപ്പം മുതലേ ചില മുൻകരുതലുകൾ എടുക്കേണ്ടതുണ്ട്. രക്തസമ്മർദ്ദം പതിവായി പരിശോധിക്കുക, ശാരീരികമായി സജീവമായിരിക്കുക, പുകയില ഉൽപ്പന്നങ്ങൾ ഒഴിവാക്കുക, സമീകൃതാഹാരം ശീലമാക്കുക എന്നിവ വളരെ പ്രധാനമാണ്. കുടുംബത്തിൽ ഹൃദ്രോഗ ചരിത്രമുള്ള സ്ത്രീകൾ കൃത്യമായ ഇടവേളകളിൽ ആരോഗ്യ വിദഗ്ധരുടെ നിർദ്ദേശപ്രകാരം ഹൃദയ പരിശോധനകൾ നടത്തേണ്ടതാണ്.
