‘ഒരുപാട് കഴിക്കേണ്ട, വണ്ണം വയ്ക്കും…’– പൊതുവെ തടിച്ചവരോട് പറയുന്ന വാക്കാണ്. എന്നാൽ ഭക്ഷണം കുറവാക്കിയതുകൊണ്ട് മാത്രം അവരുടെ ശരീരഭാരം കുറയണമെന്നില്ല. ചിലർക്ക് നീരുവീക്കം കാരണമാണ് വണ്ണം കൂടുന്നത്. അത് തിരിച്ചറിയാതെ ഡയറ്റും വ്യായാമവും ചെയ്യുന്നതുകൊണ്ട് കാര്യമില്ല. മാനസിക സമ്മർദം കൂടുകയുള്ളൂ. ഇത്തരത്തിൽ ഒരു സാഹചര്യത്തിലൂടെ കടന്നുപോയ നടിയാണ് വിദ്യാ ബാലൻ.
‘പല ഡയറ്റുകളും വ്യായാമങ്ങളും ചെയ്തു. ചിലപ്പോൾ വണ്ണം കുറയും. പിന്നെ വീണ്ടും കൂടും. ശരീരത്തിൽ എന്തോ മാറ്റങ്ങൾ സംഭവിക്കുന്നുണ്ടെന്ന് അറിയാം. പക്ഷേ എന്താണെന്ന് കണ്ടെത്താനായില്ല. മാനസിക സമ്മർദത്തിലായി. ഒടുവിൽ ചെന്നൈയിലെ ഒരു ഡയറ്റ് ടീം ആണ് ഇൻഫ്ലമേഷൻ ആണെന്ന് കണ്ടെത്തിയത്. ശരീരത്തിൽ ഫാറ്റ് ഇല്ലെന്നും നീരുവീക്കമാണ് വണ്ണത്തിന് കാരണമെന്നും മനസ്സിലായി.
ഭക്ഷണം പൂർണമായും ഉപേക്ഷിക്കാതെ കൃത്യമായ ഇടവേളകളിൽ കഴിച്ചു തുടങ്ങി. ശരീരഭാരം കുറഞ്ഞു.’– ദേശീയമാധ്യമത്തിന് നൽകിയ അഭിമുഖത്തിൽ വിദ്യ പറഞ്ഞത് ഇങ്ങനെയാണ്. വിദ്യാ ബാലൻ പറഞ്ഞ ഡയറ്റ് പിന്തുടർന്ന് 3 മാസം കൊണ്ട് 9 കിലോ ശരീര ഭാരം കുറച്ചെന്ന് നടി ജ്യോതികയും വെളിപ്പെടുത്തിയിരുന്നു. നടൻ മാധവൻ, നടി സമാന്ത എന്നിവരും ആന്റി ഇൻഫ്ലമേറ്ററി ഡയറ്റ് പിന്തുടർന്നിട്ടുണ്ട്.
എന്താണ് ആന്റി ഇൻഫ്ലമേറ്ററി ഡയറ്റ്? രോഗ പ്രതിരോധ സംവിധാനത്തിന്റെ ഭാഗമാണ് വീക്കം. മുറിവുണ്ടാകുമ്പോൾ ആ ഭാഗം വീർത്തു വരാറില്ലേ. രോഗാണുക്കൾ ഉള്ളിൽ കടക്കാതിരിക്കാൻ ശരീരം പ്രയോഗിക്കുന്ന പ്രതിരോധമാണിത്. എന്നാൽ, ചിലരിൽ നീരുവീക്കം തുടരെത്തുടരെ ഉണ്ടാകാം. ഇതുവഴി വണ്ണം കൂടാം. (വിദ്യ ബാലന്റെ ശരീര ഭാരം കൂടുന്നതിന്റെ കാരണം കൊഴുപ്പല്ല, നീരുവീക്കമാണെന്ന് അവരുടെ ആരോഗ്യ വിദഗ്ധർ പറയുന്നു.) വിട്ടുമാറാത്ത വീക്കം അപകടകാരിയാണ്. മോശം ആരോഗ്യത്തിലേക്ക് ഇതു വിരൽ ചൂണ്ടുന്നു. ഹൃദയാഘാതം, പക്ഷാഘാതം എന്നിവയ്ക്കും രക്തത്തിലെ പഞ്ചസാരയെ കൈകാര്യം ചെയ്യാനുള്ള ഇൻസുലിന്റെ കഴിവിനെ ബാധിക്കുക വഴി ടൈപ്പ് 2 പ്രമേഹത്തിനും നീർക്കെട്ട് കാരണമാകാം. സമ്മർദം, ലഹരി ഉപയോഗം തുടങ്ങിയവയും വീക്കത്തിനു കാരണമാകാറുണ്ട്.
ഈ ഭക്ഷണങ്ങൾ ശീലമാക്കാം ∙ പഴങ്ങൾ, പച്ചക്കറികൾ, ചെറു ധാന്യങ്ങൾ: ആന്റി ഓക്സിഡന്റുകൾ ധാരാളം അടങ്ങിയ അവക്കാഡോ, ബ്ലൂ ബെറി, മുന്തിരി, കാൻ ബെറി, ആപ്പിൾ, സിട്രസ് പഴങ്ങൾ തുടങ്ങിയവ.
∙ കാരറ്റിൽ അടങ്ങിയിരിക്കുന്ന ബീറ്റ കരോട്ടിൻ, വൈറ്റമിൻ എ, സി എന്നിവയുടെ സ്രോതസ്സായ കാപ്സിക്കം, വൈറ്റമിൻ സി ധാരാളം അടങ്ങിയ ഉള്ളി എന്നിവയൊക്കെ നീരുവീക്കം കുറയ്ക്കാൻ സഹായിക്കുന്ന പച്ചക്കറികളാണ്.
. പ്രോ ബയോട്ടിക് വിഭാഗത്തിൽപെടുന്ന ഓട്സ്, വാഴപ്പഴം, യോഗർട്ട് എന്നിവ ഭക്ഷണത്തിൽ ഉൾപ്പെടുത്താം.
∙ കൊഴുപ്പ് ലഭിക്കാൻ ഒലിവ് എണ്ണ, കടൽ മത്സ്യങ്ങളായ ചൂര, അയല എന്നിവയും ഒമേഗ 3 ഫാറ്റി ആസിഡ് ലഭിക്കാൻ ചിയ സീഡ്, ഫ്ലാക്സീഡ് തുടങ്ങിയവയും സഹായിക്കും.
∙ വെളുത്തുള്ളി, ഇഞ്ചി, മഞ്ഞൾ, കറുവപ്പട്ട എന്നിവ ഭക്ഷണത്തിൽ ഉറപ്പാക്കണം. കുരുമുളകിൽ കാണപ്പെടുന്ന പൈപ്പെറിൻ എന്ന സംയുക്തത്തിന് ആന്റി ഇൻഫ്ലമേറ്ററി ഗുണങ്ങളുണ്ട്. ഗ്രീൻ ടീ, മഞ്ഞൾ ചേർത്ത പാൽ, ജിൻജർ ടീ തുടങ്ങിയവ കുടിക്കുന്നത് നല്ലതാണ്.
പ്രഭാത ഭക്ഷണം നാരങ്ങ ഇട്ട ചൂട് വെള്ളം ഒരു ഗ്ലാസ് കുടിച്ചുകൊണ്ട് ഒരു ദിവസം തുടങ്ങാം. ഹൈഡ്രെറ്റഡ് ആകാനും ദഹനത്തെ ഉത്തേജിപ്പിക്കാനും പോഷകങ്ങളെ ശരിയായി ആഗിരണം ചെയ്യാനും ഇതു സഹായിക്കും ഫൈബർ ധാരാളം അടങ്ങിയ പ്രഭാത ഭക്ഷണമാണ് നല്ലത്. മിക്സഡ് ഫ്രൂട്ട്സ്, നട്സ്, ചിയ സീഡ് എന്നിവ ചേർത്ത ഓട്സ് കഴിക്കാം. ഗ്രീക്ക് യോഗർട്ടും നല്ലതാണ് (ഒരു സ്പൂൺ തേനും കുറച്ചു ഫ്ലാക്സീഡും ബെറികളും ചേർക്കാം). സ്മൂത്തികളും ഉൾപ്പെടുത്താം.
സ്നാക്സ് സ്നാക്കായി ആപ്പിൾ, ബദാം മിൽക്ക്, മഞ്ഞൾ ചേർത്ത പാല് എന്നിവയിൽ ഏതെങ്കിലും. വോൾനട്ടും നല്ലതാണ്.
ഉച്ചഭക്ഷണം ഉച്ചയ്ക്ക് ബ്രൗൺ റൈസ് കൊണ്ടുള്ള ചോറ്, കൂടെ പനീർ അല്ലെങ്കിൽ ചിക്കൻ. ധാരാളം പച്ചക്കറികൾ. ചെറിയ ഒരു സാലഡ് (ഒലിവ് എണ്ണയും മിക്സഡ് പച്ചക്കറികളും ഉൾപ്പെടുന്നത്). കൂടെ ലെമൺ ജ്യൂസും
അത്താഴം ദഹനശേഷി കൂടുതലുള്ള ആഹാരങ്ങളാണ് അത്താഴത്തിന് നല്ലത്. വെജിറ്റബിൾ സൂപ്പോ പരിപ്പും ചോറ്/ റൊട്ടി എന്നിവയിൽ ഏതെങ്കിലും നല്ലത്. കിടക്കുന്നതിനു മുൻപ് ഒരു നുള്ള് മഞ്ഞൾ ചേർത്ത ഒരു ഗ്ലാസ് പാൽ കുടിക്കാം. ഇതു ശരിയായ ഉറക്കത്തിനും ദഹനത്തിനും ശരീരത്തെ ഡി ടോക്സിഫൈ ചെയ്യുന്നതിനും സഹായിക്കും.
ചിലർക്ക് ചില ആഹാരങ്ങൾ പിടിക്കില്ല. പാൽ എല്ലാവർക്കും പറ്റണം എന്നില്ല. ഇത്തരം പ്രശ്നങ്ങൾ വീണ്ടും പഠിക്കും. ചില ആഹാര സാധനങ്ങൾ ഒഴിവാക്കും. ഇതിനെ എലിമിനേറ്റിങ് ഡയറ്റ് എന്നു പറയും. അടുത്ത ഘട്ടത്തിൽ ഇമ്യൂണിറ്റി കൂട്ടുന്ന ആഹാര സാധനങ്ങൾ ഉൾപ്പെടുത്താൻ നിർദേശിക്കും. അതേപോലെ സോഫ്റ്റ് ഡ്രിങ്ക്സ് പോലുള്ളവ ഒഴിവാക്കാനും. ചുരുക്കത്തിൽ പണ്ടുള്ളവർ പറയുന്ന സമീകൃതാഹാരത്തിന്റെ (balanced diet) പരിഷ്കരിച്ച രൂപമാണ് ആന്റി ഇൻഫ്ലമേറ്ററി ഡയറ്റ്.
