ആരോഗ്യം: വേഗത്തിലുള്ള ശ്വാസോച്ഛ്വാസം, നെഞ്ചിടിപ്പ്, കഴുത്തുവേദന, വിട്ടുമാറാത്ത തലവേദന തുടങ്ങിയ ലക്ഷണങ്ങൾ പലപ്പോഴും പനിയുടെയോ സാധാരണ ശാരീരിക അസ്വസ്ഥതകളുടെയോ ഭാഗമായി കരുതാറുണ്ട്. എന്നാൽ ഇവ ശരീരം പ്രകടിപ്പിക്കുന്ന അമിതമായ ഉത്കണ്ഠയുടെ ലക്ഷണങ്ങളാകാമെന്ന് വിദഗ്ധർ മുന്നറിയിപ്പ് നൽകുന്നു.
ഡോ. വൈശാലി ഭാരംഭെയുടെ വിശദീകരണമനുസരിച്ച്, ഉത്കണ്ഠ മനസിനെ മാത്രം ബാധിക്കുന്ന ഒന്നല്ല. നിയന്ത്രണം വിട്ടാൽ അത് ശരീരത്തെയും ഗൗരവമായി ബാധിക്കും. വെല്ലുവിളികളെയും ഭീഷണികളെയും നേരിടാൻ ശരീരം നൽകുന്ന ജാഗ്രതാ സന്ദേശമാണ് ഉത്കണ്ഠ.
ഉത്കണ്ഠ അനുഭവപ്പെടുമ്പോൾ ശരീരത്തിലെ സിംപതറ്റിക് സിസ്റ്റം സജീവമാകുകയും അഡ്രിനാലിൻ, കോർട്ടിസോൾ പോലുള്ള ഹോർമോണുകൾ കൂടുതലായി ഉൽപാദിപ്പിക്കപ്പെടുകയും ചെയ്യുന്നു. ഇതോടെ നെഞ്ചിൽ മുറുക്കം, പൾസ് ഉയരുക, ശ്വാസമെടുക്കൽ വേഗത്തിലാകുക തുടങ്ങിയ പ്രശ്നങ്ങൾ ഉണ്ടാകാം. തലകറക്കം, ക്ഷീണം എന്നിവയും ഇതിന്റെ ഭാഗമാകാം.
സമ്മർദ്ദം കൂടുമ്പോൾ ദഹനപ്രക്രിയയെ ബാധിക്കുകയും ഓക്കാനം, വയർവീക്കം, ഇടയ്ക്കിടെ ശൗചാലയത്തിൽ പോകേണ്ടി വരിക തുടങ്ങിയ അസ്വസ്ഥതകൾ ഉണ്ടാകുകയും ചെയ്യും. പേശികൾ വലിഞ്ഞു മുറുകുന്നതിനാൽ കഴുത്തുവേദനയും നടുവേദനയും അനുഭവപ്പെടാം.
വരാനിരിക്കുന്ന അപകടങ്ങളിൽ നിന്ന് ശരീരം സ്വയം സംരക്ഷിക്കാൻ ശ്രമിക്കുന്നതിനാലാണ് ഇത്തരം ലക്ഷണങ്ങൾ ഉണ്ടാകുന്നതെന്ന് വിദഗ്ധർ പറയുന്നു. സമയത്ത് തിരിച്ചറിഞ്ഞ് ആവശ്യമായ വിശ്രമവും പരിചരണവും ഉറപ്പാക്കിയാൽ ഈ അവസ്ഥയിൽ നിന്ന് മോചനം നേടാമെന്നും അവർ നിർദേശിക്കുന്നു.
