ന്യൂഡൽഹി: കരിയർ, സാമ്പത്തിക സുരക്ഷ, വ്യക്തിപരമായ ജീവിതലക്ഷ്യങ്ങൾ എന്നിവയ്ക്ക് മുൻഗണന നൽകുന്ന സാഹചര്യത്തിൽ മാതൃത്വവും പിതൃത്വവും വൈകി തിരഞ്ഞെടുക്കുന്ന ദമ്പതികളുടെ എണ്ണം വർധിച്ചുവരികയാണ്. എന്നാൽ 35 വയസിന് ശേഷമുള്ള ഗർഭധാരണത്തെക്കുറിച്ച് ചില കാര്യങ്ങൾ മുൻകൂട്ടി മനസ്സിലാക്കുകയും ആവശ്യമായ ആരോഗ്യ മുൻകരുതലുകൾ സ്വീകരിക്കുകയും ചെയ്യേണ്ടതുണ്ടെന്ന് ആരോഗ്യവിദഗ്ധർ പറയുന്നു.
സാമ്പത്തിക ഭദ്രത കൈവരിക്കാനുമുള്ള ശ്രമങ്ങൾ, വൈകാരിക പക്വത, അനുയോജ്യനായ ജീവിതപങ്കാളിയെ കണ്ടെത്താനുള്ള സമയദൈർഘ്യം എന്നിവയാണ് മാതൃത്വം വൈകാൻ പ്രധാന കാരണങ്ങൾ.
വൈദ്യശാസ്ത്രത്തിൽ 35 വയസിന് ശേഷമുള്ള ഗർഭധാരണത്തെ ‘അഡ്വാൻസ്ഡ് മാറ്റേണൽ ഏജ് (AMA)’ എന്നാണ് വിശേഷിപ്പിക്കുന്നത്. ഈ പ്രായത്തിന് ശേഷം സ്ത്രീകളിൽ അണ്ഡങ്ങളുടെ എണ്ണത്തിലും ഗുണനിലവാരത്തിലും സ്വാഭാവിക കുറവുണ്ടാകാമെന്ന് ഗൈനക്കോളജിസ്റ്റുമാർ ചൂണ്ടിക്കാട്ടുന്നു. ഇതുമൂലം ഗർഭകാല പ്രമേഹം, ഉയർന്ന രക്തസമ്മർദം, സിസേറിയൻ പ്രസവം തുടങ്ങിയ സങ്കീർണതകൾക്ക് സാധ്യത വർധിക്കാം.
അതേസമയം, 35 വയസിന് ശേഷം ഗർഭധാരണം അസാധ്യമല്ല എന്നും വിദഗ്ധർ വ്യക്തമാക്കുന്നു. ഗർഭധാരണത്തിന് മുൻപ് ആരോഗ്യപരിശോധനകൾ നടത്തുക, ആരോഗ്യകരമായ ജീവിതശൈലി പിന്തുടരുക, ആവശ്യമായ സാഹചര്യങ്ങളിൽ എഗ് ഫ്രീസിങ് (Egg Freezing) പോലുള്ള മാർഗങ്ങൾ പരിഗണിക്കുക എന്നിവ അപകടസാധ്യത കുറയ്ക്കാൻ സഹായിക്കും.
മാനസികമായും വൈകിയുള്ള മാതാപിതാക്കൾ കൂടുതൽ പക്വതയും ക്ഷമയും പ്രകടിപ്പിക്കാറുണ്ടെന്ന് മനശാസ്ത്രജ്ഞർ പറയുന്നു. എന്നാൽ ഫെർട്ടിലിറ്റി ചികിത്സകൾ ഉൾപ്പെടെയുള്ള പ്രക്രിയകൾ ചിലപ്പോൾ മാനസിക സമ്മർദം സൃഷ്ടിച്ചേക്കാം. അതിനാൽ ശാരീരിക ആരോഗ്യത്തോടൊപ്പം മാനസിക പിന്തുണയും ഉറപ്പാക്കി, ഡോക്ടറുടെ നിർദേശപ്രകാരം കുടുംബാസൂത്രണം നടത്തുന്നതാണ് ഏറ്റവും ഉചിതമെന്ന് വിദഗ്ധർ നിർദേശിക്കുന്നു.
