ജനീവ: സിക്കിൾ സെൽ രോഗം ബാധിച്ച കുട്ടികൾക്കും കൗമാരക്കാർക്കും ജീവൻരക്ഷാ ചികിത്സയും പരിചരണവും കൂടുതൽ എളുപ്പത്തിൽ ലഭ്യമാക്കാനുള്ള നടപടികൾ ശക്തമാക്കി ലോകാരോഗ്യ സംഘടന (WHO). ഗുണനിലവാരം ഉറപ്പാക്കിയതും കുട്ടികൾക്ക് അനുയോജ്യവും താങ്ങാവുന്നതുമായ മരുന്നുകളുടെ ലഭ്യത വർധിപ്പിക്കുന്നതിനൊപ്പം, രോഗനിർണയവും സമഗ്ര ചികിത്സയും മെച്ചപ്പെടുത്തുന്നതിനുള്ള പുതിയ മാർഗനിർദേശങ്ങളും WHO പുറത്തിറക്കി.
2021-ൽ മാത്രം അഞ്ച് വയസ്സിന് താഴെയുള്ള കുട്ടികളിൽ സിക്കിൾ സെൽ രോഗവുമായി ബന്ധപ്പെട്ട് ഏകദേശം 81,100 മരണങ്ങൾ ഉണ്ടായെന്നാണ് WHOയുടെ കണക്ക്. ലോകത്ത് ഏറ്റവും സാധാരണമായ പാരമ്പര്യ രക്തരോഗമാണ് സിക്കിൾ സെൽ രോഗം. സബ്-സഹാറൻ ആഫ്രിക്കയിലാണ് രോഗബാധിതരിൽ ഏകദേശം 80 ശതമാനവും ഉള്ളത്. എന്നാൽ കിഴക്കൻ മെഡിറ്ററേനിയൻ മേഖല, കരീബിയൻ, ദക്ഷിണേഷ്യ, ലാറ്റിനമേരിക്ക എന്നിവിടങ്ങളിലും രോഗം വ്യാപകമാണ്.
2026 മേയിൽ കുട്ടികളിലും കൗമാരക്കാരിലും സിക്കിൾ സെൽ രോഗത്തിന്റെ രോഗനിർണയം, പ്രതിരോധം, ചികിത്സ എന്നിവ സംബന്ധിച്ച ആദ്യ സമഗ്ര മാർഗനിർദേശം WHO പുറത്തിറക്കിയിരുന്നു. 9 മാസം മുതൽ 19 വയസ്സ് വരെ പ്രായമുള്ള സിക്കിൾ സെൽ അനീമിയ ബാധിതരായ എല്ലാ കുട്ടികൾക്കും, രോഗത്തിന്റെ തീവ്രത പരിഗണിക്കാതെ ഹൈഡ്രോക്സിയൂറിയ ഉപയോഗിക്കണമെന്നാണ് മാർഗനിർദേശത്തിലെ ശക്തമായ ശുപാർശ.
ഗുരുതരമായ സങ്കീർണതകൾ തടയാനും ജീവൻ രക്ഷിക്കാനും സഹായിക്കുന്ന ഹൈഡ്രോക്സിയൂറിയ കുട്ടികൾക്ക് എളുപ്പത്തിൽ ഉപയോഗിക്കാവുന്ന രീതിയിൽ ലഭ്യമാക്കുന്നതിനാണ് ഇപ്പോഴത്തെ പ്രധാന ശ്രദ്ധ. കുട്ടികളുടെ പ്രായത്തിനും ഭാരത്തിനും അനുസരിച്ച് അളവ് ക്രമീകരിക്കാനാകുന്ന ഫോർമുലേഷനുകൾ, പാക്കേജിങ്, സ്ഥിരത, താങ്ങാവുന്ന വില തുടങ്ങിയ കാര്യങ്ങൾ ഉൾപ്പെടുത്തി WHO പുതിയ Target Product Profile തയ്യാറാക്കിയിട്ടുണ്ട്.
സിക്കിൾ സെൽ രോഗത്തിനുള്ള ചികിത്സാരംഗത്ത് ജീൻ തെറാപ്പി ഉൾപ്പെടെയുള്ള പുതിയ ചികിത്സാ രീതികളും വികസിച്ചുവരുന്ന സാഹചര്യത്തിൽ, ഭാവിയിലെ ചികിത്സകൾ കുട്ടികളിലേക്ക് എത്തിക്കുന്നതിനുള്ള ഗവേഷണ മുൻഗണനകളും WHO നിശ്ചയിച്ചിട്ടുണ്ട്.
സർക്കാരുകൾ, മരുന്ന് നിർമാതാക്കൾ, ഗവേഷകർ, ആരോഗ്യപ്രവർത്തകർ, ഫണ്ടിംഗ് ഏജൻസികൾ, രോഗബാധിതരുടെ കൂട്ടായ്മകൾ തുടങ്ങിയവരുടെ സഹകരണത്തിലൂടെയാണ് പുതിയ മാർഗനിർദേശങ്ങൾ ഫലപ്രദമായി നടപ്പാക്കേണ്ടതെന്ന് WHO വ്യക്തമാക്കി.
