സഹോദരങ്ങൾ തമ്മിൽ സ്നേഹത്തോടൊപ്പം വഴക്കും അസൂയയും മത്സരബുദ്ധിയും ഉണ്ടാകുന്നത് സാധാരണമാണ്. മനഃശാസ്ത്രത്തിൽ ഇത് ‘സിബ്ലിങ് റൈവൽറി’ എന്നാണ് അറിയപ്പെടുന്നത്. കളിപ്പാട്ടങ്ങൾക്കായുള്ള തർക്കം മുതൽ മാതാപിതാക്കളുടെ ശ്രദ്ധ നേടാനുള്ള ശ്രമം വരെ ഇതിന്റെ ഭാഗമായി കുട്ടികൾക്കിടയിൽ ഉണ്ടാകാം. സ്വാഭാവികമായ ഇത്തരം പെരുമാറ്റങ്ങൾ ശരിയായ രീതിയിൽ കൈകാര്യം ചെയ്തില്ലെങ്കിൽ ഭാവിയിലെ സഹോദരബന്ധങ്ങളെയും കുട്ടികളുടെ വ്യക്തിത്വ വളർച്ചയെയും ബാധിക്കാനിടയുണ്ടെന്നാണ് വിദഗ്ധർ ചൂണ്ടിക്കാട്ടുന്നത്.
എന്തുകൊണ്ടാണ് സഹോദരങ്ങൾ തമ്മിൽ മത്സരബുദ്ധി ഉണ്ടാകുന്നത്?
മാതാപിതാക്കളുടെ സ്നേഹവും പരിഗണനയും മറ്റൊരു സഹോദരന് കൂടുതലായി ലഭിക്കുന്നു എന്ന തോന്നലാണ് കുട്ടികളിൽ അസൂയയ്ക്ക് പ്രധാന കാരണമാകുന്നത്. പ്രത്യേകിച്ച് കുടുംബത്തിലേക്ക് രണ്ടാമത്തെ കുട്ടി എത്തുമ്പോൾ, തനിക്ക് ലഭിച്ചിരുന്ന ശ്രദ്ധ കുറഞ്ഞതായി മൂത്തകുട്ടിക്ക് തോന്നാം.
മാതാപിതാക്കൾ കുട്ടികളെ പരസ്പരം താരതമ്യം ചെയ്യുന്നതും പ്രശ്നം വർധിപ്പിക്കാം. ‘അവനെ കണ്ടുപഠിക്ക്’ എന്ന തരത്തിലുള്ള വാക്കുകൾ കുട്ടികളിൽ അപര്യാപ്തതാ ബോധവും മത്സര മനോഭാവവും വളർത്താൻ സാധ്യതയുണ്ട്. സ്വന്തം കളിപ്പാട്ടങ്ങളും മറ്റ് സാധനങ്ങളും സഹോദരങ്ങളുമായി പങ്കിടാനുള്ള മടിയും തർക്കങ്ങൾക്ക് കാരണമാകാം.
മാതാപിതാക്കൾ എന്താണ് ശ്രദ്ധിക്കേണ്ടത്?
ഓരോ കുട്ടിയും വ്യത്യസ്ത കഴിവുകളും സ്വഭാവ സവിശേഷതകളുമുള്ള വ്യക്തികളാണെന്ന് മാതാപിതാക്കൾ തിരിച്ചറിയണം. അതിനാൽ പഠനം, കഴിവ്, പെരുമാറ്റം തുടങ്ങിയ കാര്യങ്ങളിൽ കുട്ടികളെ പരസ്പരം താരതമ്യം ചെയ്യുന്നത് ഒഴിവാക്കുന്നതാണ് നല്ലത്.
ഒരു കുട്ടിയെ അഭിനന്ദിക്കുമ്പോൾ മറ്റൊരു കുട്ടിയെ നേരിട്ടോ അല്ലാതെയോ തരംതാഴ്ത്തുന്ന രീതിയിലുള്ള സമീപനം ഒഴിവാക്കണം. ഓരോ കുട്ടിക്കും പ്രത്യേകം സ്നേഹവും ശ്രദ്ധയും ലഭിക്കുന്നുണ്ടെന്ന് അവർക്ക് ബോധ്യപ്പെടുന്നതും പ്രധാനമാണ്.
വഴക്കുണ്ടായാൽ പക്ഷംപിടിക്കരുത്
സഹോദരങ്ങൾ തമ്മിൽ വഴക്കുണ്ടാകുമ്പോൾ ഉടൻ ഒരാളുടെ പക്ഷം മാത്രം പിടിക്കുന്നതിന് പകരം ഇരുവരുടെയും വാദം കേൾക്കാൻ മാതാപിതാക്കൾ ശ്രമിക്കണം. പ്രശ്നത്തിന്റെ കാരണം മനസ്സിലാക്കി പരസ്പരം ബഹുമാനിക്കാനും പങ്കുവെക്കാനും കുട്ടികളെ പഠിപ്പിക്കാം.
സ്നേഹത്തോടെയും ക്ഷമയോടെയും കുട്ടികളുടെ ഇത്തരം പെരുമാറ്റങ്ങളെ കൈകാര്യം ചെയ്യുന്നതിലൂടെ സഹോദരങ്ങൾക്കിടയിലെ അനാവശ്യ മത്സരവും തർക്കങ്ങളും ഒരു പരിധിവരെ കുറയ്ക്കാൻ സാധിക്കും. അതോടൊപ്പം ഓരോ കുട്ടിയുടെയും വ്യക്തിത്വവും കഴിവുകളും പ്രത്യേകം അംഗീകരിക്കുകയും പ്രോത്സാഹിപ്പിക്കുകയും ചെയ്യുന്നത് ആരോഗ്യകരമായ സഹോദരബന്ധം വളർത്താൻ സഹായിക്കും.
