കൊച്ചി: സംസ്ഥാനത്തെ സർക്കാർ ആശുപത്രികളിൽ കടുത്ത മരുന്ന് ക്ഷാമം. പ്രമേഹം, ഉയർന്ന രക്തസമ്മർദ്ദം തുടങ്ങിയ ജീവിതശൈലീ രോഗങ്ങൾക്കും കീമോതെറാപ്പി, അപസ്മാരം എന്നിവയ്ക്കും ആവശ്യമായ അവശ്യമരുന്നുകൾ കിട്ടാനില്ലാത്ത സ്ഥിതിയാണ്. മരുന്ന് ക്ഷാമം പുറത്തറിയാതിരിക്കാൻ പ്രാദേശികമായി മരുന്നുകൾ വാങ്ങാൻ നിർദേശമുണ്ടെങ്കിലും, ഭീമമായ കുടിശ്ശിക കാരണം സ്വകാര്യ വിതരണക്കാർ മരുന്നുകളും ഉപകരണങ്ങളും നൽകാൻ വിസമ്മതിക്കുന്നത് പ്രതിസന്ധി ഇരട്ടിയാക്കുന്നു.
മെഡിക്കൽ കോളേജുകൾക്ക് പുറമേ പ്രധാന ജനറൽ, ജില്ലാ ആശുപത്രികൾക്കും നൂറുകോടി രൂപയ്ക്ക് മുകളിലാണ് കുടിശ്ശികയുള്ളത്. തിരുവനന്തപുരം, എറണാകുളം ജനറൽ ആശുപത്രികൾക്ക് മാത്രം 120 കോടിയോളം രൂപ നൽകാനുണ്ട്. കാരുണ്യ പദ്ധതി വഴി നൽകിയ സൗജന്യ ചികിത്സയുടെ തുകയും ലഭിക്കാത്തതിനാൽ അപ്പപ്പോൾ പണം നൽകി മരുന്ന് വാങ്ങാൻ ആശുപത്രി അധികൃതർക്ക് കഴിയുന്നില്ല.
അടുത്തയാഴ്ചയോടെ പുതിയ സ്റ്റോക്ക് എത്തുെന്നാണ് ആരോഗ്യവകുപ്പ് നൽകുന്ന വിശദീകരണം. എന്നാൽ മരുന്നുകൾ എത്തിയില്ലെങ്കിൽ സ്ഥിതി വഷളാകുമെന്ന് ആശുപത്രി അധികൃതർ മുന്നറിയിപ്പ് നൽകിയിട്ടുണ്ട്. വൺ ടൈം സെറ്റിൽമെന്റ് വഴി കുടിശ്ശിക തീർക്കാനും റീ-ടെൻഡർ നടപടികൾ വേഗത്തിലാക്കി മരുന്ന് വിതരണം പുനഃസ്ഥാപിക്കാനും സർക്കാർ ശ്രമങ്ങൾ ആരംഭിച്ചിട്ടുണ്ട്.
