സ്ത്രീകൾ എപ്പോഴും ആരോഗ്യപ്രശ്നങ്ങളെക്കുറിച്ച് പരാതി പറയുന്നവരാണെന്ന പൊതുസമൂഹത്തിന്റെ പരിഹാസങ്ങളെയും നിസ്സാരവൽക്കരണങ്ങളെയും തിരുത്തിക്കുറിക്കുന്ന പുതിയ പഠനറിപ്പോർട്ട് പുറത്ത്. ജീവിതത്തിലുടനീളം പുരുഷന്മാരേക്കാൾ കൂടുതൽ ശാരീരിക വേദന അനുഭവിക്കുന്നത് സ്ത്രീകളാണെന്ന് പ്രമുഖ ശാസ്ത്ര മാസികയായ ‘നേച്ചർ മെഡിസിൻ’ പ്രസിദ്ധീകരിച്ച പഠനത്തിൽ വ്യക്തമാക്കുന്നു.
118 രാജ്യങ്ങളിലായി 61 ലക്ഷത്തിലധികം ആളുകളിൽ നിന്ന് ശേഖരിച്ച വിവരങ്ങൾ വിശകലനം ചെയ്താണ് ഗവേഷകർ ഈ ആഗോള റിപ്പോർട്ട് തയ്യാറാക്കിയത്. അഞ്ചു വയസ്സുമുതൽ നൂറു വയസ്സിനു മുകളിലുള്ളവർ വരെ പങ്കെടുത്ത ഈ പഠനം, സ്ത്രീകളുടെ വേദനകൾ വൈദ്യശാസ്ത്ര മേഖലയിലും കുടുംബങ്ങളിലും വേണ്ടത്ര പരിഗണിക്കപ്പെടുന്നില്ലെന്ന ഗുരുതരമായ ആശങ്കയും പങ്കുവെക്കുന്നുണ്ട്.
പഠനവിധേയമാക്കിയ 11 പ്രധാന ശരീരഭാഗങ്ങളിലും പുരുഷന്മാരേക്കാൾ കൂടുതൽ വേദന അനുഭവിക്കുന്നത് സ്ത്രീകളാണെന്ന് കണ്ടെത്തി. തലവേദന, മുഖത്തെ വേദന, വയറുവേദന എന്നിവയിലാണ് ലിംഗഭേദമനുസരിച്ചുള്ള ഈ വ്യത്യാസം ഏറ്റവും കൂടുതൽ പ്രകടമായത്.
പുരുഷന്മാരേക്കാൾ 83 ശതമാനം അധികം സ്ത്രീകൾ മുഖത്തെ വേദനയും 74 ശതമാനം പേർ തലവേദനയും 60 ശതമാനം അധികം പേർ വയറുവേദനയും അനുഭവിക്കുന്നതായി വെളിപ്പെടുത്തി. വേദന അനുഭവപ്പെടുമ്പോൾ ആവശ്യത്തിന് വേദനസംഹാരികളോ കൃത്യമായ ചികിത്സയോ സ്ത്രീകൾക്ക് ലഭിക്കാനുള്ള സാധ്യത കുറവാണെന്നും പലപ്പോഴും അവരുടെ അസ്വസ്ഥതകൾ അവഗണിക്കപ്പെടുകയാണെന്നും ഗവേഷകർ ചൂണ്ടിക്കാട്ടുന്നു.
വാർധക്യത്തിലാണ് വേദന വർധിക്കുന്നതെന്ന പരമ്പരാഗത ധാരണ തെറ്റാണെന്നും മധ്യവയസ്സിലാണ് ഭൂരിഭാഗം ആളുകളിലും വേദന ഉച്ചസ്ഥായിയിലെത്തുന്നതെന്നും പഠനം സൂചിപ്പിക്കുന്നു. അതേസമയം, ദരിദ്ര-വികസ്വര രാജ്യങ്ങളിൽ വാർധക്യകാലത്ത് കഠിനമായ വേദന അനുഭവിക്കുന്നവരുടെ എണ്ണം കൂടുതലാണ്. വികസിത രാജ്യങ്ങളെ അപേക്ഷിച്ച് ഇത്തരം രാജ്യങ്ങളിൽ നടുവേദനയുടെ തോത് ഇരട്ടിയാണ്.
ജോലി ചെയ്യുന്ന പ്രായത്തിലുള്ളവരിലാണ് ആഗോളതലത്തിൽ ശാരീരിക വേദനകൾ ഏറ്റവും വേഗത്തിൽ വർധിക്കുന്നത്. ലോകമെമ്പാടും 40 ശതമാനം ആളുകളെ ബാധിക്കുന്ന നടുവേദനയാണ് ഏറ്റവും വ്യാപകമായ ആരോഗ്യപ്രശ്നം. സ്ത്രീകളുടെ ശാരീരിക അസ്വസ്ഥതകളെ നിസ്സാരമായി കാണാതെ അവ കൃത്യമായി നിരീക്ഷിക്കാനും ചികിത്സ ഉറപ്പാക്കാനും ആഗോള ആരോഗ്യസംവിധാനങ്ങൾ മുന്നോട്ടുവരണമെന്ന് ഗവേഷകർ വ്യക്തമാക്കുന്നു.
